របាំងថ្មរពុះចែកទ្រូងផ្លូវចំនួន២កង់ ត្រូវបានរងការខូចខាត ដោយសារតែបុរស់ម្នាក់ បើរថយន្ដកាមរីឆ្លាម១គ្រឿង ស្ថិតក្នុងស្ថានភាពស្រវឹងជោក បើកបុកពេញទំហឹង ។ ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលា ម៉ោង២៣និង៣០នាទីយប់ ថ្ងៃទី០៧ ខែមិថុនា ឆ្នាំ២០១៥ តាមបណ្ដោយផ្លូវលេខ២៧១ នៅជិតនិងស្ពានអាកាស ៧មករា ស្ថិតក្នុងសង្កាត់ទឹកថ្លា ខណ្ឌសែនសុខ ។
តាមប្រភពព័ត៌មានពីសាក្សី នៅជិតកន្លែងកើតហេតុ បានអោយដឹងថា មុនពេលកើតហេតុ គេបានឃើញមានរថយន្ដ១គ្រឿង ម៉ាកកាមរីឆ្លាម ពណ៍ស្ករ ពាក់ស្លាកលេខ ភ្នំពេញ 2V-1536 បើកបរដោយបុរស់ម្នាក់ ស្ថិតក្នុងស្ថានភាពស្រវឹងជោកជាំ ធ្វើដំណើរតាមបណ្ដោយផ្លូវសហព័ន្ធរុស្សី ទិសដៅពីលិចទៅកើត ហើយពេលមកដល់ក្រោមស្ពាន៧ មករា បានបត់ស្ដាំឡើងផ្លូវលេខ២៧១ តែដោយសារតែស្រវឹងខ្លាំងពេក ទាញចង្កូតមិនទាន់ ទើបបុករបាំងថ្មរពេញទំហឹង បណ្ដាលអោយរបាំងថ្មររងការខូចខាតចំនួន២កង់ និងរថយន្ដកល់ជាប់របាំងថ្មរ ទៅមុខលែងរួច ។
ប្រភពដដែលបានបន្តថា ក្រោយកើតហេតុ ម្ចាស់រថយន្ដបានបើកទ្វាររថយន្ដ ចុះរត់គេចខ្លួនបាត់ ។ ក្រោយមក កំលាំងសម្ថតកិច្ចមូលដ្ឋាន បានចុះដល់កន្លែងកើតហេតុ និងសហការជាមួយកំលាំងជំនាញផ្នែកចរាចរណ៍ ចុះធ្វើការវាស់វែង និងស្ទួចយករថយន្ដដែលបង្ករ យកទៅរក្សាទុកនៅការិយាល័យចរាចរណ៍ រាជធានីភ្នំពេញ ដើម្បីរងចាំធ្វើការដោះស្រាយបន្ត ៕
