ខេត្តបន្ទាយមានជ័យ៖ ដោយមើលឃើញអំពីទុក្ខ លំបាករបស់ប្រជាពលរដ្ឋនៅក្នុងស្រុកមង្គលបូរីដែលកំពុងត្រូវការទឹកយកមកប្រើប្រាស់ជាចាំបាច់នោះលោកអ៊ុងអឿនប្រធានក្រុមប្រឹក្សាខេត្តបន្ទាយមានជ័យនិងប្រធានគណបក្សខេត្តនេះបានដឹកនាំកម្លាំងនគរបាលនិងមន្ត្រី
អាជ្ញាធរជាច្រើននាក់យកឡានទឹក៣គ្រឿងដឹកទឹកយកទៅចែកជូនប្រជាពលរដ្ឋចំនួន៤ភូមិ របស់ឃុំ ឫស្សីក្រោក ស្រុកមង្គលបុរី ដែលមានចំនួន២៧៥គ្រួសារ នៅព្រឹកថ្ងៃទី៦ខែមិថុនាឆ្នាំ២០១៥នេះ។លោកអ៊ុងអឿនបានមានប្រសាសន៍ថាស្នងការនគរបាលខេត្តបន្ទាយមានជ័យលោកឧត្តមសេនីយ៍ត្រី អាត់ខែម តាំងពីព្រឹករហូតមកដល់ល្ងាចថ្ងៃដដែលនេះបានដឹកនាំកម្លាំងយកឡាន៣គ្រឿងដឹកទឹកយកទៅចែកជូនប្រជាពលរដ្ឋនៅទីនោះដែលប្រជាពលរដ្ឋនៅ៤ភូមិនេះកំពុងមានការខ្វះខាតទឹកយ៉ាងខ្លាំងលើការប្រើប្រាស់ប្រចាំថ្ងៃ។លោកអ៊ុងអឿនបាន
បន្តទៀតថា ទឹករាប់ម៉ឺនលីត្រ ត្រូវបានដឹកយកទៅចែកជូនប្រជាពលរដ្ឋនៅក្នុងស្រុកមង្គលបូរីនោះដាក់តាមពាងតាមធុងហើយនឹងបន្តទៅថ្ងៃស្អែកទៀតដែលការចំណាយលើប្រេងម៉ាស៊ូតនោះគឺលោកអ៊ុងអឿនជាអ្នកឧបត្ថម្ភទាំងអស់។លោកអាត់ខែមបាននិយាយថានេះជាប្រតិបត្តិការជួយដឹកទឹកផ្គត់ផ្គង់ជូនប្រជាពលរដ្ឋលើកទី៣ហើយដែលលើកទីមួយនៅឃុំឫស្សីក្រោកនេះ លើកទី២ នៅស្រុកម៉ាឡៃ និងលើកទី៣ នៅឃុំដដែលនេះ។ប្រជាពលរដ្ឋបានថ្លែងអំណរគុណយ៉ាងខ្លាំងដល់ ក្រុមការងារ ដែលដឹកនាំដោយ លោក អ៊ុង អឿន ចំពោះ ការជួយអន្តរាគមន៍ភ្លាមៗ ដល់ពួកគាត់ លើការខ្វះខាតទឹកនេះ៕
