+
ខេត្តសៀមរាប នាល្ងាចថ្ងៃទី០៩ ខែមិថុនា ឆ្នាំ២០១៥ បន្ទាប់ពីការផ្ទេរតំណែងប្រធានកិច្ចប្រជុំ ថ្នាក់រដ្ឋមន្ត្រីអាស៊ានលើកទី១៤ ដែលហៅកាត់ថា ស៊ូម ធី ស៊ី ( SOMTC ) ជូនដល់ប្រធាន ស៊ូម ធី ស៊ី ( SOMTC ) លើកទី១៥ និងកិច្ចប្រជុំដែលពាក់ព័ន្ធ តំណាងនានារបស់ប្រទេសអាស៊ាន និង លេខាធិការដ្ឋានអាស៊ាន បានធ្វើការពិភាគ្សាយ៉ាងល្អិតល្អន់ ស្តីពីឧក្រិដ្ឋកម្មឆ្លងដែន ។
ក្នុងឱកាសនៃការបើកកិច្ចប្រជុំនេះ គេសង្កេតឃើញមានវត្តមាន ឯកឧត្តម លោកជំទាវ ឯកអគ្គរាជទូត ឯកអគ្គរដ្ឋទូត នៃប្រទេសដែលពាក់ព័ន្ធ ប្រតិភូមកពីបណ្តាប្រទេសទាំង១០ ជាសមាជិកអាស៊ាន និងប្រទេសជាដៃគូចំនួន១០ ព្រមជាមួយអង្គការអន្តរជាតិចំនួន៣ទៀត រួមមាន UNODC -INTERPOL និង AAPTIP ។
នាយឧត្តមសេនីយ៍ តេង សាវង្ស រដ្ឋលេខាធិការក្រសួងមហាផ្ទៃ ជាតំណាងរបស់ ឯកឧត្តម ឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ ព្រមទាំងក្នុងនាមជាម្ចាស់ផ្ទះ បានថ្លែងថា ៖ ការចូលរួមរបស់តំណាងប្រទេសទាំង២០ និងអង្គការអន្តរជាតិ នាពេលនេះ គឺជាការបង្ហាញឲ្យឃើញនូវការយកចិត្តទុកដាក់ ក្នុងការប្រយុទ្ធប្រឆាំងអំពើភេវរកម្ម ការជួញដូរមនុស្ស ការរត់ពន្ធគ្រឿងញៀន ការរត់ពន្ធអាវុធ ការសំអាតប្រាក់ បទល្មើសសេដ្ឋកិច្ច អំពើប្លន់តាមលំហរសមុទ្រ និងបទល្មើសបច្ចេកវិទ្យា ។
នាយឧត្តមសេនីយ៍ តេង សាវង្ស បានបញ្ជាក់ថា ៖ បទល្មើសទាំងអស់ខាងលើនេះ វាជាបទល្មើស ដ៏គ្រោះថ្នាក់បំផុត ហើយការជួបជុំគ្នានៅពេលនេះ គឺសំដៅស្វែងរកវិធានការ ឆ្លើយតបទៅនឹងការរីករាលដាលនៃបទល្មើសទាំងអស់នេះ ។ លោកបានបន្តថា ៖ បញ្ហាសន្តិសុខ សេដ្ឋកិច្ច សុខុមាលភាព និងសេចក្តីសុខរបស់ប្រជាជន ពិតជាទទួលរងនូវហានីភ័យ និងការបំផ្លិចបំផ្លាញ ប្រសិនបើមិនមានការដាក់ចេញ នូវវិធានការក្នុងការប្រយុទ្ធប្រឆាំងនឹងបទល្មើសទាំងនេះ ឲ្យបានសមស្របទេនោះ ។
នៅក្នុងសន្ទរកថាបើកកិច្ចប្រជុំនេះ នាយឧត្តមសេនីយ៍ តេង សាវង្ស ក្នុងនាមក្រសួងមហាផ្ទៃកម្ពុជា មានប្រសាសន៍ថា ៖ ក្នុងស្មារតីពង្រឹងកិច្ចសហប្រតិបត្តិការឆ្លងដែនរបស់អាស៊ាន និងប្រទេសជាដៃគូទាំងអស់ សូមឲ្យកិច្ចប្រជុំលើកទី១៥ ស្តីពីឧក្រិដ្ឋកម្មឆ្លងដែននាពេលនេះ ពិនិត្យ និងសម្រេច លើសំណើររបស់ព្រះរាជាណាចក្រថៃ ដែលស្នើឲ្យដាក់បញ្ចូល បទល្មើសជួញដូរសត្វព្រៃ និងឈើប្រណិត ទៅជាប្រភេទមួយទៀត នៃឧក្រិដ្ឋកម្មឆ្លងដែន ក្នុងក្របខ័ណអាស៊ាន ។ដោយគឿនវ៉េត
