ខេត្តសៀមរាប គម្រោងកែលម្អដងស្ទឹងសៀមរាបទាំងមូល ប្រមាណជាង១០គីឡូម៉ែត្រ ត្រូវបានបញ្ចប់តំណាក់កាលទី១ជាស្ថាពរហើយ កាលក្នុងអំឡុងឆ្នាំកន្លងទៅ នៅសល់គម្រោងតំណាក់កាលទី២បន្តទៀត ប្រមាណជាង៥គីឡូម៉ែត្រ ដែលកំពុងសិក្សាផលប៉ះពាល់ ។ មានកត្តាជាច្រើនដែលចាំបាច់ត្រូវប្រើប្រាស់គម្រោងនេះ ក្នុងនោះរួមមានការធ្វើឲ្យប្រសើរឡើងវិញនូវសោភ័ណភាពទីក្រុងវប្បធម៌ប្រវត្តិសាស្ត្រ បញ្ហាបរិស្ថាន និងអនាម័យ បន្ទាប់ពីដងស្ទឹងប្រវត្តិសាស្ត្រមួយនេះ ត្រូវបានបាត់បង់សោភ័ណ្ឌភាព ការគោករីងរាក់ រួមតូច ដោយសារអាយុកាល និងបណ្តាលមកពីកត្តាមនុស្ស ។
លោកឃឹម ប៊ុនសុង អភិបាលខេត្តសៀមរាប បានបញ្ជាក់ថា ៖ គឺមិនត្រឹមតែដើម្បីសោភ័ណភាព បរិស្ថាន អនាម័យ ស័ក្តសមជាក្រុងទេសចរណ៍ប៉ុណ្ណោះទេ តែគម្រោងកែលម្អដងស្ទឹងសៀមរាប វាគឺជាការបង្ហាញនូវការគោរពដោយជំនឿសាសនាផងដែរ ដោយសារតែទឹកស្ទឹងសៀមរាប មានប្រភពហូរធ្លាក់មកពីភ្នំគូលែន បានឆ្លងកាត់វត្ថុដ៏ស័ក្តសិទ្ធ គឺសិវលឹង្គ១០០០ នៅបាតអូរលើខ្នងភ្នំគូលែននោះ ។ ឯកឧត្តម បានបញ្ជាក់ទៀតថា ៖ ព្រះរាជាអង្គក្សត្រខ្មែរពីជំនាន់ដើម ព្រមទាំងសព្វមុខមន្ត្រី និង ប្រជារាស្ត្រ មានជំនឿថា ទឹកជ្រោះភ្នំគូលែន ដែលហូរកាត់ចម្លាក់សិវលឹង្គ១០០០ គឺជាទឹកមន្តដ៏ស័ក្តសិទ្ធ ។
លោកញាណ ឡេង អនុរដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ និងជាប្រធានគណកម្មការអន្តរក្រសួង ដោះស្រាយផលប៉ះពាល់ បានឲ្យដឹងថា គម្រោងកែលម្អដងស្ទឹងសៀមរាបតំណាក់កាលទី២ នឹងត្រូវបានដំណើរការបន្ត បន្ទាប់ពីការសិក្សាផលប៉ះពាល់ត្រូវបានបញ្ចប់ ។ ឯកឧត្តម បានបញ្ជាក់ថា យោងតាមលទ្ធផលសិក្សា និងការធ្វើដំណោះស្រាយកន្លងមក ប្រជាពលរដ្ឋចំនួន ៦៩៦គ្រួសារ ត្រូវបានទទួលសំណងគោលនយោបាយដោះស្រាយផលប៉ះពាល់ដោយសារគម្រោងនេះរួចហើយ ហើយក៏ត្រូវបានរុះរើលំនៅដ្ឋាន ទៅកាន់ទីតាំងថ្មីរួចហើយដែរ ។ ឯកឧត្តម បានបញ្ជាក់ទៀតថា ការចុះផ្ទាល់នាព្រឹកថ្ងៃទី២១ ខែកក្កដានេះ គឺត្រូវបានសិក្សាបន្ត ការសម្របសម្រួលផលប៉ះពាល់ដោយសារគម្រោងចំនួន៣៥គ្រួសារ ដែលនៅសេសសល់ ក្នុងនេះចំនួន៤គ្រួសារ ត្រូវបានយល់ព្រម ហើយក្រុមការងារនឹងរួមគ្នាពិនិត្យបន្ថែមទៀត ដើម្បីកាត់បន្ថយផលប៉ះពាល់ ឲ្យនៅក្នុងម្រឹត អប្បបរិមារ ។ ដោយគឿនវ៉េត
