ឧត្តរមានជ័យ៖កាលពីវេលាម៉ោង១៥និង០០នាទីថ្ងៃទី២៦ ខែកក្កដា ឆ្នាំ២០១៥ មានករណីលួចគោយន្តកន្ត្រៃ មួយគ្រឿង កើតឡើងនៅចំណុចភូមិរហាល ឃុំលំទង ស្រុកអន្លង់វែង ខេត្តឧត្តរមានជ័យ។លោកវរសេនីយ៍ត្រីងួន ទ្ធីរិទ្ធ មេបញ្ជាការកងរាជអាវុធហត្ថស្រុកអន្លង់វែង បានឱ្យកម្ពុជាថ្មីដឹងថា ករណីលួចគោយន្តកន្ត្រៃរបស់ប្រជាពលរដ្ឋនេះ បង្ករឡើងដោយជនសង្ស័យឈ្មោះវុធ វើត ភេទប្រុសអាយុ២១ឆ្នាំរស់នៅភូមិក្រូចគោ ឃុំក្រូចគោ ស្រុកក្រឡាញ់ ខេត្តសៀមរាប ក្នុងខណះជនរងគ្រោះ ឈ្មោះជន អាំ ភេទប្រុស អាយុ៣៨ឆ្នាំរស់នៅភូមិរហាល ឃុំលំទង ស្រុកអន្លង់វែង កំពុងព្រោះស្រូវជាមួយប្រពន្ធឈ្មោះកយ ណក ភេទស្រីអាយុ៣៤ឆ្នាំ ស្រាប់តែជនសង្ស័យបានបើកគោយន្តរត់គេចសំដៅមកភូមិគោកសំព័រ ហើយ
ត្រូវបានសមត្ថកិច្ចកងរាជអាវុធហត្ថស្រុកអន្លង់វែងចាប់ឃាត់ខ្លួននៅវេលាម៉ោង១៨នឹង០០នាទីថ្ងៃ ខែ ឆ្នាំដ៏ដែល ហើយគោយន្តកន្ត្រៃមួយគ្រឿងរបស់ប្រជាពលរដ្ឋនោះ ត្រូវបានកម្លាំងកងរាជអាវុធហត្ថស្រុកប្រគល់អោយជនរងគ្រោះវិញ រីឯចំនែកជនសង្ស័យកំពុងកសាងសំណុំរឿងបញ្ជូនទៅសាលាដំបូងខេត្តឧត្តរមានជ័យ ចាត់ការទៅតាមនិតិវិធីច្បាប់៕
