ខេត្តបន្ទាយមានជ័យ៖ លោកវិស្វករ លី សារី ប្រធានមន្ទីររៀបចំដែនដីនគរោបនីយកម្ម សំណង់ និងសុរិយោដីខេត្តត្រូវបានក្រសួងមហាផ្ទៃបានប្រកាសជាអភិបាលរងខេត្តបន្ទាយមានជ័យ កាលពីល្ងាចថ្ងៃទី៣០ កក្កដា ឆ្នាំ ២០១៥ នៅសាលប្រជុំសាលាខេត្ត។ពិធីប្រកាសតែងតាំង និងទទួលភារកិច្ចថ្មីរបស់លោកវិស្វករ លី សារី ឲ្យទៅកាន់អភិបាលរងខេត្តនោះ ក្រោមវត្តមានឯកឧត្ដម សក់ សេដ្ឋា រដ្ឋលេខាធិការក្រសួងមហាផ្ទៃ ឯកឧត្ដម គោស៊ុំ សារឿត អភិបាលខេត្តបន្ទាយមានជ័យ ,និងមន្ត្រីជាន់ខ្ពស់ក្នុងខេត្តជាច្រើនរូបចូលរួម។លោក អ៊ួង ចន្ធី ប្រធាននាយកដ្ឋានបុគ្គលិកនៃអគ្គនាយកដ្ឋានរដ្ឋបាលក្រសួងមហាផ្ទៃបានឡើងអានអនុក្រឹត្យលេខ៤ ៤ ១ ធ ន ក្រ .ត ត ស្ដីពីការផ្ទេរភារកិច្ច និងត្រូវតែងតាំងលោក លី សារី ប្រធានមន្ទីររៀបចំដែនដីនគរោបនីយកម្ម សំណង់ និងសុរិយោដីខេត្តបន្ទាយមានជ័យ ត្រូវទៅទទួលមុខតំណែងថ្មីជាអភិបាលរងខេត្តបន្ទាយមានជ័យ ចាប់ពីថ្ងៃប្រកាសនេះតទៅ។លោក លី សារី បានឡើងធ្វើការប្ដេជ្ញាចិត្តថានឹងអនុវត្តតាមរដ្ឋធម្មនុញ្ញ នៃព្រះរាជាណាចក្រ កម្ពុជាបទបញ្ជា និងលិខិតបទដ្ឋាននានាឲ្យបានជាប់លាប់ ដោយប្រកាន់ភ្ជាប់នូវឧត្ដមប្រយោជន៍ជាតិមាតុភូមិ និងយកប្រជាពលរដ្ឋជាធំ។ឯកឧត្ដម សក់ សេដ្ឋា រដ្ឋលេខាធិការក្រសួងមហាផ្ទៃបានមានប្រសាសន៍ថា: ការតែង តាំងលោកវិស្វករ លី សារី ជាអភិបាលរងខេត្តបន្ទាយមានជ័យនេះ គឺជំនួសលោក អ៊ឹម ភាន់សុផល ដែលត្រូវផ្ទេរភារកិច្ចទៅបម្រើការងារនៅទីស្ដីការក្រសួងមហាផ្ទៃ ដោយសារលោកមានស្នាដៃល្អៗយ៉ាងច្រើនក្នុងការបំពេញភារកិច្ចជាប្រធានមន្ទីរសុរិយោដីខេត្តអស់រយៈពេលជាង២០ឆ្នាំកន្លងមកហើយ ទើបរាជរដ្ឋាភិបាលសម្រេចឲ្យលោកទៅកាន់អភិបាលរងខេត្តជំនួសលោក អ៊ឹម ភាន់សុផល ដែលត្រូវផ្លាស់ទៅបំរើការងាេនៅក្រសួងមហារផ្ទៃ៕