ខេត្តកំពង់ឆ្នាំង៖ បុរស៣នាក់ត្រូវបានសត្វឱម៉ាល់២សំបុក ទិចនៅកន្លែង២ខុសគ្នានៅក្នុងល្ងាច តែមួយ ក្នុងនោះបុរស២នាក់បានរងរបួសធ្ងន់ ត្រូវបានក្រុមគ្រួសារដឹកមកសង្គ្រោះនៅមន្ទីរពេត្យខេត្តកំពង់ឆ្នាំង និងម្នាក់ទៀតបានរង របួសស្រាលព្យាបាលនៅពេទ្យឯកជន។ ហេតុការណ៍នេះបានកើតឡើងនៅល្ងាចថ្ងៃទី១២ ខែសីហា ឆ្នាំ២០១៥ នៅក្នុងក្រុងកំពង់ឆ្នាំង និងនៅក្នុងស្រុករលាប្អៀរ ។តាមសំដីរបស់ក្រុមគ្រួសារជនរងគ្រោះនៅក្នុងមន្ទីពេទ្យខេត្តបាននិយាយអោយដឹងថា៖ ជនរងគ្រោះទី១.ឈ្មោះ ធុច ប៊ុនធុល អាយុ៣៦ឆ្នាំ មានទីលំនៅភូមិទី៧ សង្កាត់ខ្សាម ក្រុងកំពង់ឆ្នាំង។មុនពេលកើតហេតុនៅម៉ោង៣និង៣០នាទីរសៀល ជនរងគ្រោះបានកាន់កាំបិតបំណងទៅកាប់ដើមឬស្សីពីងពុង ដែលទេមកក្នុងដីរបស់គាត់ ប៉ុន្តែពេលទៅដល់បានចាប់អង្រួនដើមឬស្សីពីងពុង មិនទាន់ទាំងបានកាប់ផងត្រូវសត្វឱម៉ាល់ចេញមកដេញទិចជាច្រើនមេ បណ្តាលអោយដួលសន្លប់ ហើយត្រូវបានក្រុមគ្រួសារដឹកបញ្ជូនមកមន្ទីរពេទ្យខេត្តជាបន្ទាន់ដើម្បីជួយសង្គ្រោះ ។ពេលចូលដល់ក្នុងមន្ទីរពេទ្យខេត្ត ជនរងគ្រោះមានអាការៈធ្ងន់ធ្ងរ ព្រោះតែត្រូវសត្វឱម៉ាល់តិចជាង១០មេ និងបានសន្លប់២ដង ហើយត្រូវបានក្រុមគ្រូពេទ្យខេត្ត បញ្ជូលអុកស៊ីហ្សែន និងចាក់ថ្នាំបន្សាបពិសដើម្បីជួយសង្គ្រោះជីវិត។
ដោយឡែកករណីទី២ បានកើតឡើងនៅវេលាម៉ោង៥និង១០នាទីល្ងាច នៅចំណុចភូមិននាមទ ទឹង ឃុំទឹកហូត ស្រុករលាប្អៀរ ដោយបុរសម្នាក់ ឈ្មោះ មឿន រស់ អាយុ២៨ឆ្នាំ មានទីលំនៅ ភូមិគោកស្តៅ ឃុំទឹកហូត បានរងរបួសធ្ងន់ដោយសារសត្វឱម៉ាល់តិចជាង១០មេដូចគ្នា បណ្តាលអោយសន្លប់ ហើយត្រូវបានគេដឹកមកសង្គ្រោះនៅមន្ទីរពេទ្យខេត្ត ។ករណីនេះក្រុមគ្រួសារជនរងគ្រោះបានអោយដឹងថា៖មុនពេលកើតហេតុ ជនរងគ្រោះ និងបុរសម្នាក់ទៀត ឈ្មោះ ជ្រុញ បានទៅយកឱម៉ាល់ខាងលើនេះ នៅពេលរៀបចំដុតភ្លើងគុបមិនទាន់ឆេះបានស្រួលផង ក៏ត្រូវសត្វឱម៉ាល់វាយប្រហារដេញទិចជាមុន បណ្តាលអោយបុរសឈ្មោះ មឿន រស់ ត្រូវសត្វឱម៉ាលតិចជាង១០មេរងរបួសធ្ងន់ ចំណែកឈ្មោះ ជ្រុញ ឱម៉ាល់ទិតិចមេ បានរងរបួសស្រាល។
ជនរងគ្រោះទាំង២នាក់ដែលបានរងរបួសធ្ងន់ នៅល្ងាចថ្ងៃទី១២ ខែសីហា ឆ្នាំ២០១៥ កំពុងស្ថិតក្នុងការជួយសង្គ្រោះបន្ទាន់របស់ក្រុមគ្រូពេទ្យខេត្ត ដែលក្រុមគ្រូពេទ្យខេត្តបាននិយាយអោយដឹងថា៖គេទាំង២នាក់ មិនមានគ្រោះថ្នាក់ធ្ងន់ដល់អាយុជីវិតនោះទេ ព្រោះតែពួកគេបានមកដល់មន្ទីរពេទ្យខេត្តទាន់ពេលវេលា បើហួសពេលក៏ពីបាកជួយសង្គ្រោះដែរ៕