ខេត្តព្រះសីហនុ=បរុសចំណាស់ម្នាក់បានចុះងូតទឹកហើយបានលង់ទឹកស្លាប់កាលពីម៉ោងប្រមាណ៩ព្រឹកថ្ងៃទី១២សីហាស្ថិតនៅចំនុចស្រះទឹកក្នុងភូមិត្រពាំងមូលឃុំជើងគោស្រុកព្រៃនប់ខេត្តព្រះសីហនុ។សពត្រូវបានបងប្អូននិងក្រុមគ្រួសារចុះរាវរកឃើញនៅម៉ោងជាង៤រសៀលថ្ងៃដដែលនេះ។សមត្ថកិច្ចមូលដ្ឋានបាននិយាយថាជនរងគ្រោះមានឈ្មោះ លឹម ទ្រី ភេទប្រុស អាយុ ៥៥ឆ្នាំមុខរបរលក់នំ តាមរទេះម៉ូតូ ។ជនរងគ្រោះបានចុះងូតទឹកក្នុងស្រះម្នាក់ឯងហើយក៏បាត់ខ្លួនអស់រយ:ពេលជិត៧ម៉ោងទើបគេរកសពឃើញ។
សមត្ថកិច្ចបានឲ្យដឹងទៀតថាក្រោយពីពិនិត្យធ្វើកោសល្យវិច្ច័យលើដងខ្លួនសពនិងយោងតាមសាក្សីបំភ្លឺ់ផងនោះសមត្ថកិច្ចបានធ្វើការសន្និដ្ឋានថាជនរងគ្រោះពិតជាស្លាប់ដោយសារលង់ទឹកពិតប្រាកដមែន។ការស្លាប់នេះមិនជាប់ពាក់ព័ន្ធនិងករណីមនុស្សឃាតនោះទេ។សមត្ថកិច្ចបាននិយាយទៀតថាបុរសរងគ្រោះបានផឹកស្រាស្រវឹងហើយចុះទៅងូតទឹកទើបបានជាលង់ស្លាប់បែបនេះ។បច្ចុប្បន្នសពបន្ទាប់ពីសមត្ថកិច្ចធ្វើការត្រួតពិនិត្យរួចបានប្រគល់ជូនក្រុមគ្រួសារដើម្បីយកទៅធ្វើបុណ្យតាមប្រពៃណីខ្មែរ៕