ខេត្តតាកែវ ៖ ដោយអនុវត្តតាមបទបញ្ជារបស់លោកឧត្តមសេនីយ៍ត្រី អ៊ុក សំណាង ស្នងការនគរបាលខេត្តតាកែវ កាលពីព្រឹកថ្ងៃទី២១ ខែសីហា ឆ្នាំ២០១៥ លោកឧត្តមសេនីយ៍ត្រី អ៊ុក ច័ន្ទកុសល ស្នងការរងទទួលបន្ទុកការងារអន្តោប្រវេសន៍ បានដឹកនាំកម្លាំងការិយាល័យអន្តោប្រវេសន៍ចុះត្រួតពិនិត្យវត្តមាន ជនជាតិវៀតណាម ដែលស្នាក់នៅចំណុចភូមិថ្នល់បែក សង្កាត់រកាក្រៅ ក្រុងដូនកែវ ខេត្តតាកែវ។ បន្ទាប់ពីកម្លាំងរបស់លោកធ្វើការសាក់សួរ និង រកលិខិតស្នាមដែលមកស្នាក់នៅក្នុងប្រទេសកម្ពុជាមិនមាន ក៏បានធ្វើការឃាត់ខ្លួនជនជាតិវៀតណាមទាំងនោះបានចំនួន ១១នាក់ (ប្រុស) មកការិយាល័យអន្តោប្រវេសន៍ ដើម្បីធ្វើការសាកសួរបន្តពាក់ព័ន្ធនឹងការស្នាក់នៅ និងបម្រើការងារមិនស្របច្បាប់។
លោកឧត្តមសេនីយ៍ត្រី អ៊ុក ច័ន្ទកុសល ស្នងការរង បានបន្តឲ្យដឹងទៀតថា កម្មករសំណង់ជនជាតិវៀតណាមចំនួន ៤នាក់ក្នុងចំណោមកម្មករ ១១នាក់ បានឆ្លងដែនខុសច្បាប់ចូលមកធ្វើការងារនៅក្នុងខេត្តតាកែវ ហើយ ៧នាក់ផ្សេងទៀតមានលិខិតឆ្លងដែនត្រឹមត្រូវ ចំណែកឯជនជាតិវៀតណាមឆ្លងដែនខុសច្បាប់ទាំង ៤នាក់នោះ ទី១.ឈ្មោះ ង្វៀង តានឡឹង ភេទប្រុស អាយុ ៤៨ឆ្នាំ ,ទី២.ឈ្មោះ ង្វៀង មិនថុង ភេទប្រុស អាយុ ៥០ឆ្នាំ ,ទី៣.ឈ្មោះ ង្វៀង មិនក្វាង ភេទប្រុស អាយុ ២១ឆ្នាំ និងទី៤.ឈ្មោះ ង្វៀង វ៉ាន់មើន ភេទប្រុស អាយុ ២៤ឆ្នាំ អ្នកទាំង៤ ចូលមកប្រទេសកម្ពុជាតាមច្រកទ្វារអន្តរជាតិភ្នំដិន។
ប្រភពបាន បន្តថា ជនជាតិវៀតណាមទាំង ៤នាក់ខាងលើ ដែលចូលមកស្នាក់នៅ និងធ្វើការមិនស្របច្បាប់ ត្រូវបានកម្លាំងការិយាល័យអន្តោប្រវេសន៍ធ្វើការស្នើសុំបញ្ជូនទៅ អគ្គនាយកដ្ឋានអន្តោប្រវេសន៍ ដើម្បីមានវិធានការបន្ត រីឯជនជាតិវៀតណាម ៧នាក់ទៀត កម្លាំងជំនាញបានណែនាំឲ្យធ្វើកិច្ចសន្យាដោយបង្គាប់អោយធ្វើទិដ្ឋាការចេញចូលអោយបានត្រឹមត្រូវដើម្បីរស់នៅនិងធ្វើការនៅប្រទេសកម្ពុជាស្របច្បាប់។
