បន្ទាយមានជ័យៈ បុរសវ័យចំណាស់ម្នាក់ក្នុងអាជីពជាអ្នកលើកដី និងជីករណ្តៅជាង១០ឆ្នាំមកហើយនៅតែបន្តមុខរបនេះទោះបីជានឿយហត់ក៏ពិតមែន តែវាអាចរកចំណូលចិញ្ចឹមជីវភាពក្នុងគ្រួសារ ដោយពុំចាំបាច់ទៅធ្វើការនៅប្រទេសថៃវិញទេ ។
ជួបជាមួយអ្នកយកព័ត៍មានកម្ពុជាថ្មី លោក ណៃ សៃ ក្នុងអាយុ៥៩ឆ្នាំ ដែលមានទីលំនៅក្នុងភូមិព្រហូត សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ បានរៀបរាប់អោយដឹងក្នុងពេលលោកសម្រាក់ពីការងារលើកដីថា លោកមានប្រពន្ធ និងកូនម្នាក់ក្នុងបន្ទុកគ្រួសារ បានចាប់យកអាជីពជាអ្នកលើកដី និងជីករណ្តៅតាំងពីឆ្នាំ២០០០ បន្ទាប់ពីលោកត្រឡប់ពីធ្វើការនៅប្រទេសថៃ ជាអ្នករើសអេតចាយ ។ មូលហេតុដែលធ្វើអោយគាត់រើសយកការងារលើកដី និងជីករណ្តៅនេះ ដោយសារតែលោក មិនអាចស៊ូទ្រាំនឹងការងារជាកម្មករសំណង់ ដែលពុំមានម៉ោងឈប់សម្រាកហូបបាយត្រឹមត្រូវ និងការទៅធ្វើការជាអ្នករើសអេតចាយនៅប្រទេសថៃ មិនបានប៉ុន្មាន ។
សម្រាប់ការងារដែលលោកកំពុងធ្វើនេះ ភាកច្រើនគឺរែកដី ដែលជាដីចាក់ពីរថយន្ត ទៅបំពេញតាមទីកន្លែងក្នុងផ្ទះដែលរថយន្តមិនអាចចាក់បាន ចំណែកការជីកដីវិញភាកច្រើនគឺជិករណ្តៅសម្រាប់ដាក់លូ បង្គន់ ឬក៏រណ្តៅគ្រិះ ។ ដោយឡែកចំពោះប្រាក់ចំណូលពីការងារនេះ សម្រាប់ដីមយយរថយន្តបែនកង់១០ គឺយកថ្លៃលើក១០ម៉ឺនរៀល ដោយចំណាយពេលលើកពី២ទៅ៣ថ្ងៃ ។ ហើយសម្រាប់ការជីករណ្តៅវិញ ក្នុងមួយកង់លូតម្លៃ៤ម៉ឺនរៀល ។
ស្ទឺតែគ្មានថ្ងៃចន្លោះ លោកតែងទទួលបានការងារនេះពីសំណាក់ពលរដ្ឋដែលស្គាល់លោក និងជាងផ្ទះ។
ស្ថិតក្នុងវ័យកាន់តែចាស់ កំលាំងកាន់តែខ្សោយ ការលើកដីត្រូវបានកាត់បន្ថយ ដោយទុកតែការងារជីករណ្តៅ តែប៉ុណ្ណោះ ។ ជាមួយនិងការកាត់បន្ថយការលើកដីធ្វើអោយប្រាក់ចំណូលរបស់គាត់ក៏ថយទៅតាមហ្នឹង ហើយជួបបញ្ហកង្វះខាតក្នុងជីវភាពគ្រួសារ ។
ក្រៅពីការងារដ៏លំបាក និងហត់នឿយខាងលើ លោកនៅមានមុខរបរមួយទៀត គឺការដាំផ្ការបន្តិចបន្តួចលើដីក្បែរផ្ទះដែលមានស្រាប់ គ្រាន់បានទប់ទល់ការចំណាយតិចតួច ៕