កំពង់ធំៈ មានការភ្ញាក់ផ្អើលមួយ បានកើតឡើងដោយសារតែ ករណីក្មេងស្រីអាយុទើបតែ ៣ឆ្នាំ ត្រូវបានបញ្ចប់ជីវិត ដោយសារ រណ្តៅទឹកមុខផ្ទះ ខណៈពេលដែលឪពុកម្តាយ កំពុងតែធ្វើកិច្ចផ្ទះ រៀងខ្លួន ដោយមិនបានចាប់អារម្មណ៍ ថាកូនស្រីជាទីស្រឡាញ់បាន លង់ទឹកស្លាប់តែពីកាលណា ក្រោយពេលសាកសពអណ្តែតហើយបាន ដឹងថាកូនបានស្លាប់ដោយសារលង់ទឹក។សមត្ថកិច្ច ប៉ុស្តិ៍រដ្ឋបាល ឃុំប្រឡាយ បានឲ្យដឹងថា សាកសពក្មេងស្រីរងគ្រោះ ត្រូវបានគេប្រទះឃើញ អណ្តែតនៅក្នុងរណ្តៅទឹកនៅមុខផ្ទះចម្ងាយ ១០ម៉ែត្រពីផ្ទះ នៅម៉ោង ៥.៣០នាទី ស្ថិតភូមិ ក្រែក ឃុំប្រឡាយ ស្រុកស្ទោង ខេត្តកំពង់ធំ ថ្ងៃទី ៤ ខែ កញ្ញា ឆ្នាំ ២០១៥ ក្មេងស្រីរងគ្រោះ ឈ្មោះ វង់ ឡីហុង ភេទ ស្រី អាយុ ៣ឆ្នាំ មានម្តាយឈ្មោះ វ៉ុន វី អាយុ ៣៣ឆ្នាំ ឪពុកឈ្មោះ វឿន វង់ អាយុ ៣៦ឆ្នាំ ជនរងគ្រោះដែលបានស្លាប់ ជាកូនទី២ ក្នុងគ្រួសារ មានមុខរបរ ធ្វើស្រែ ករណីដែលឈានដល់ការស្លាប់បាត់បង់ជីវិតនេះ គឺដោយសារតែឪពុក ម្តាយមានការធ្វេសប្រហែស បណ្តោយឲ្យកូន ដើរលេងតែម្នាក់ឯង ទើបកូនរអិលចូលរណ្តៅលង់ទឹកស្លាប់។
តាមការឲ្យដឹងពី លោកស្រី វ៉ុន វី ជាម្តាយជនរងគ្រោះ បានឲ្យថា នៅវេលាដែលបាត់កូនស្រីរបស់គាត់ នៅ ប្រមាណ ម៉ោង៣រសៀល ជាទូទៅ កូនស្រីរបស់គាត់តែងតែ ដើរលេងទៅផ្ទះអ្នកជិតខាង រៀងរាល់ថ្ងៃ ដោយមិនបានចាប់អារម្មណ៍ នៅពេលកើតហេតុ អ្នកស្រី វ៉ុន វី ជាម្តាយជនរងគ្រោះ កំពុងតែចំអិនអាហារស្លរស្លុក ចំណែកឪពុគកំពុងតែ ស្រះឈើនៅក្រោយផ្ទះ លុះត្រូវបានសាច់ញាតិ ប្រទះឃើញសាកសពអណ្តែតទើបមានការភ្ញាក់ផ្អើល ។
ក្រោយពីសមត្ថកិច្ច ធ្វើការការពិនិត្យកោសល្យវិច្ឆ័យហើយ ក៏បានប្រគល់សាកសពជូនក្រុមគ្រួសារ ទទួលយកទៅធ្វើ បុណ្យតាមប្រពៃណី ។
ដោយ ប៊ុន រដ្ឋា