ខេត្តកណ្តាល ៖ សមត្ថកិច្ចនគរបាលស្រុកពញាឮសហការជាមួយនគរបាលប៉ុស្តិ៍រដ្ឋបាលទំនប់ធំនិងនគរបាលប៉ុស្តិ៍ផ្សារដែក ឆ្មក់បង្ក្រាបទីតាំងសង្វៀនជល់មាន់ខុសច្បាប់ ត្រង់ចំណុចបរិវេនដីឡូត៍មួយកន្លែងស្ថិតក្នុងភូមិបែកថ្លាង ឃុំទំនប់ធំ ស្រុកពញាឮ ធ្វើការដកហូតបានម៉ូតូ៦គ្រឿង និងមាន់ជល់៤ក្បាល កាលពីវេលាម៉ោង១៥ និង១០នាទី ថ្ងៃទី២៧ ខែមេសា ឆ្នាំ២០១៤ ខណៈដែលក្រុមអ្នកញៀនល្បែងជល់មាន់ខុសច្បាប់ជាច្រើននាក់រត់គេចខ្លួនបាត់អស់ ។
មន្ត្រីនគរបាលស្រុកពញាឮបានឲ្យដឹងថា ម៉ូតូ៦គ្រឿងដែលត្រូវបានធ្វើការដកហូតនោះមានម៉ាកហុងដាគុបជ្រុង ធុនសេ៩០ ពណ៌សំបកឪឡឹក ពាក់ស្លាកលេខកំពង់ចាម១B-០២៣៨ ,ម៉ូតូម៉ាកស៊ីរុស ពណ៌ក្រហមលាយខ្មៅ គ្មានស្លាកលេខ ,ម៉ូតូម៉ាកសង់កូរ៉េ ពណ៌ក្រហម ពាក់ស្លាកលេខធ.៨៣៥០.ភ.ព.១ ,ម៉ាកសង់កូរ៉េ ពណ៌ក្រហម គ្មានស្លាកលេខ ,ម៉ូតូម៉ាកសង់កូរ៉េ ពណ៌កំបោរ គ្មានស្លាកលេខ និងម៉ូតូម៉ាកហុងដាគុបជ្រុង ធុនសេ៩០ ពណ៌ទឹកប៊ិច ពាក់ស្លាកលេខឃ.៥០៩៩.ភ.ព.១ ។
ក្រៅពីធ្វើការដកហូតម៉ូតូសមត្ថកិច្ចក៍បានធ្វើការដកហូតវត្ថុតាងមាន់ជល់ចំនួន៤ក្បាល និងសម្ភារៈសម្រាប់ប្រើប្រាស់ជល់មាន់មួយចំនួនផងដែរ ។ ប្រភដដែលបានបន្តថា បន្ទាប់ពីមានទទួលបានព័ត៌មាន និងដឹងច្បាស់ថានៅក្នុងភូមិសាស្ត្រភូមិបែកថ្លាង ឃុំទំនប់ធំ ស្រុកពញាឮ មានលួចលាក់បើកសង្វៀនជល់មានក្នុងទីតាំងដីឡូត៍មួយកន្លែងរួចមក លោកអធិការនគរបាលស្រុកបានដឹកនាំកម្លាំងនគរបាល សហការជាមួយនគរបាលប៉ុស្តិ៍រដ្ឋបាលទំនប់ធំនិងនគរបាលប៉ុស្តិ៍ផ្សារដែក ឆ្មក់ចូលទៅធ្វើការបង្ក្រាប ។
ពេលកម្លាំងសមត្ថកិច្ចនគរបាលចុះទៅដល់ក្រុមអ្នកញៀនល្បែងជល់មាន់ខុសច្បាប់បាននាំគ្នារត់ប្រសេចប្រសាចកាត់តាមវាលស្រែគេចខ្លួនបាត់អស់ ទើបសមត្ថកិច្ចធ្វើការដកហូតបានតែមធ្យោបាយធ្វើដំណើរ និងមាន់ជល់៤ក្បាលរួមជាមួយសម្ភារជល់មាន់មួយចំនួន បញ្ជូនតាមរថយន្តទៅកាន់អធិការដ្ឋាននគរបាលស្រុកពញាឮ ដើម្បីកសាងសំណុំរឿងចាត់ការតាមច្បាប់ ៕
