ខេត្តកំពង់ឆ្នាំង ៖ បុរសអតីតៈកងទ័ពម្នាក់ដោយមានសុខភាពមិនស្រួល បានជិះកង់ពីភូមិចំការឃ្លៃ ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង ដែលមានចំងាយ៩គីឡូម៉ែត្រ មកកាន់មន្ទីរពេទ្យបង្អែកខេត្តកំពង់ងឆ្នាំង ដើម្បីសុំអោយគ្រូពេទ្យខេត្តជួយពិនិត្យសុខភាពអោយ កាលពី
ព្រឹកថ្ងៃទី០៤ ខែមករា ឆ្នាំ២០១៦ ។ ប៉ុន្តែអ្វីដែ លគាត់សង្វេកក្នុងចិត្តនោះ គឺគាត់មានប្រាក់តែ៥ពាន់រៀល និងប័ណ្ណសមធម៌គ្រួសារក្រីក្រ ប្រភេទលេខ១ បង្ហាញគ្រូពេទ្យ តែគ្រូពេទ្យខេត្តប្រាប់វិញថា ទាល់តែបង់ប្រាក់គ្រប់១ម៉ឺនរៀលទើបពិនិត្យសុខភាពបាន។ . បុរសក្រីក្ររូបនេះបានអោយដឹងថា៖ គាត់ឈ្មោះ លឹម វណ្ណដារ៉ា អាយុ៦០ឆ្នាំ រស់នៅភូមិចំការឃ្លៃ ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង ជាអតីតៈកងទ័ពនៅកងពលលេខ៧០ ។ គាត់បានមកមន្ទីរពេទ្យបង្អែកខេត្តនេះជាលើកទី២ហើយ ដែលកាលពីលើកមុនគាត់បានកាន់ប័ណ្ណសមធម៌នេះ មកសុំពិនិត្យសុខភាពនៅមន្ទីរពេទ្យបង្អែកខេត្តកាលនោះក្រុមគ្រូពេទ្យខេត្តបានអោយបង់ថវិកាចំនួន១ម៉ឺនរៀល ទើបបានពិនិត្យសុខភាពនិងបានថ្នាំព្យាបាល។ ប៉ុន្តែនៅព្រឹកថ្ងៃ០៤ ខែមករានេះ គាត់បានមកពេទ្យខេត្តម្តងទៀត ដើម្បីសុំពិនិត្យសុខភាព ព្រោះរូបគាត់ចេះតែអស់កម្លាំង ហេវហត់ និង ឈាមច្រមុះ ចង់បានថ្នាំព្យាបាល ។ . នៅថ្ងៃនេះគាត់ខំជិះកង់មកពីផ្ទះមានចម្ងាយជាង៩គីឡូម៉ែត្រ ដោយសង្ឃឹមថាបានពិនិត្យសុខភាព និង បានព្យាលបាលជម្ងឺ ដូចលើកមុនទៀត។ តែការគិតទុកមិនបានដូចបំណងឡើយ គឺនៅពេលចូលទៅដល់មន្ទីរពេទ្យបង្អែកខេត្តកំពង់ឆ្នាំង កន្លែងជួបពិគ្រោះជម្ងឺដំបូងជាមួយគ្រូពេទ្យ គាត់បានប្រាប់គ្រូពេទ្យថា គាត់ចេះតែអត់កំលាំង ហេវហត់ និង មានអាការៈឈាមច្រមុះ ជាញឹកញាប់មិនបាត់ បន្ទាប់មកគាត់បានបង្ហាញប័ណ្ណសមធម៌ជនក្រីក្រប្រភេទលេខ១ ពេលនោះគ្រូពេទ្យខេត្តបានប្រាប់គាត់ថា ប័ណ្ណនេះតម្រូវអោយអ្នកជម្ងឺ បង់សេវាចំនួន១ម៉ឺរៀល តែគាត់ប្រាប់វិញថាគាត់មានតែ៥ពាន់រៀលទេ សុំជួយពិនិត្យជម្ងឺអោយគាត់ផងគាត់អត់មានលុយទេ ពេលនោះពេទ្យប្រាប់វិញថា អត់ពិនិត្យបានទេទាល់តែគ្រប់ចំនួន១ម៉ឺនរៀល។ដោយអស់ក្តីសង្ឃឹមគាត់ក៏បានអូសកង់ត្រឡប់មកវិញ ចូលមន្ទីរព័ត៌មានខេត្តកំពង់ឆ្នាំង ដើម្បីសុំអោយគេជួយគាត់ជាជនក្រីក្រផង និងបាននិយាយរឿងនេះប្រាប់អោយគេបានដឹងឮផង ។ . លោក លឹម វណ្ណដារ៉ា បានត្អូញត្អែរថា៖ ជិវិតក្រីក្រគឺយ៉ាងនេះឯង ពេលមានជម្ងឺខ្វះលុយតែ៥ពាន់រៀលក៍អាចស្លាប់បានដែរ។ ខ្ញុំធ្លាប់ធ្វើជាកងទ័ពនៅក្នុងសមរភូមិ មិនដែលរាថយឬតក់ស្លុតឡើ យ ទើបតែពេលនេះខ្ញុំពិតជាមានអារម្មណ៍ ភ័យនតក់ស្លុត និងសង្វេកយ៉ាងខ្លាំង នៅពេលឮគ្រូពេទ្យខេត្តរបស់រដ្ឋប្រាប់ថា លុយរបស់ខ្ញុំមិនគ្រប់គ្រាន់សំរាប់បង់សេវាពិនិត្យសុខភាពនោះទេ គឺខ្វះតែ៥ពាន់រៀលទៀតគ្រប់១មួយម៉ឺនរៀល ទើបពិនិត្យសុខភាពបាន។ លោកសំណូមពរដល់សប្បុរសជនមេត្តាជួយសង្គ្រោះគាត់ផង ព្រោះគាត់ក្រីក្រខ្លាំងណាស់ពុំមានប្រាក់សំរាប់ព្យាបាលជម្ងឺទេ ៕
