កំពង់ធំ =រថយន្ដក្រុងដឹកអ្នកដំណើរពេលយប់របស់ក្រុមហ៊ុន អូឡាំពិច អ៊ិចប្រេស លីម៉ុងស៊ីន ក្រឡាប់ផ្ងារជើងកាលពីម៉ោង៤ទាបភ្លឺថ្ងៃទី៩ខែមករា ឆ្នាំ២០១៦ ធ្វើរបួសធ្ងន់ស្រាល ភ្ញៀវទេសចរណ៍៤នាក់និងភ្ញៀវខ្មែរចំនួន ៧នាក់ នៅលើកំណាត់ផ្លូវជាតិលេខ ៦ ចំនុចគល់ស្ពាន
ត្រពាំងវែង ក្នុងភូមិត្រពាំងវែង សង្កាត់ស្រយ៉ូវ ក្រុងស្ទឹងសែន ខេត្តកំពង់ធំ។
តាមការអោយដឹងពីសមត្ថកិច្ច កងរាជអាវុធហត្ថក្រុងបានអោយដឹងថា ភ្ញៀវទេសចរណ៍ទាំងអស់ជាង២០នាក់ក្រោយពីក្រឡាប់ ដោយសារអ្នកបើកបរ ឈ្មោះ ឡុង បានងងុយដេក១ភាំង ក៏ជ្រុលចង្កូតរ៉េបំរុងធ្លាក់ថ្នល់ លុះដឹងខ្លួនក៏បួងចង្កូតមកវិញធ្វើអោយរថយន្ដក្រឡាប់តែម្ដង ក្នុងនោះភ្ញៀវ ទេសចរណ៍បរទេស ម្នាក់រងរបួសធ្ងន់ បាក់ដងកំបិតខាងស្ដាំ ភេទស្រី បានដឹកទៅខេត្តសៀមរាបបន្ទាប់ពីកើតហេតុ និង៣នាក់ទៀត របួសស្រាលរលាតដៃជើង មានឈ្មោះGASPARANI DANIEL , PILATI GIANLUCA , ZIVELONGHI MATTEO ទាំង៣នាក់របួសស្រាល សំរាប់នៅមន្ទីរពេទ្យ ក្រុងស្ទឹងសែនខេត្តកំពង់ធំលុះព្រឹកឡើង បានបន្ដដំណើរត្រឡប់ទៅខេត្តសៀមរាបវិញ ចំណែកភ្ញៀវខ្មែររបួសជើងម្នាក់ មានឈ្មោះ ថេង លុច រស់នៅភូមិកំពង់សោម ឃុំរាម ស្រុកព្រៃណុប ខេត្តព្រះសីហនុ អ្នកផ្សេងទៀតបានបន្ដដំណើររាងៗខ្លួនទៅតាមរថយន្ដផ្សេង។
ក្រោយពីកើតហេតុ សមត្ថកិច្ចបានយករថយន្ដមក ស្តូចរថយន្ដក្រុងដែលខូចខាតយ៉ាងដំណំទៅរក្សាទុក នៅប៉ុស្ដិរដ្នបាលសង្កាត់ស្រយ៉ូវរងចាំម្ចាស់ក្រុមហ៊ុន ចូលខ្លួនមកដោះស្រាយ ទៅតាមច្បាប់ ៕ ប៊ុន រិទ្ធី
