ឧត្តរមានជ័យ៖ ក្រុមចោរប្លន់ប្រដាប់អាវុធម្នាក់ប្លន់អាជីវករលក់មាសនិងប្តូរប្រាក់នៅក្នុងផ្សារថ្មីអន្លង់វែង ខេត្តឧត្តរមានជ័យ កាលពីជាង១ឆ្នាំមុននោះ ត្រូវបានកម្លាំង នគរបាលស្រុកអន្លង់វែងសហការ ជាមួយនគរបាលខេត្តកំពង់ចាម ចុះស្រាវជ្រាវចាប់ឃាត់ខ្លួន បានហើយកាលពីវេលាម៉ោង១០និង១៥នាទីថ្ងៃទី១៨ ខែមករា ឆ្នាំ២០១៦ នៅចំណុចភូមិភ្នំមន្ទីរ ឃុំព្រែកកក់ ស្រុកស្ទឹងត្រង់ ខេត្តកំពង់ចាម ដែលជាទីកន្លែងលាក់ខ្លួន។លោកវរសេនីយ៍ទោ សុីម វណ្ណះ អធិការនគរបាលស្រុកអន្លង់វែង បានឲ្យដឹងថា ដោយមានការចង្អុលបង្ហាញពីលោក ឧត្តមសេនីយ៍ ម៉ែន លី ស្នងការនគរបាលខេត្តឧត្តរមានជ័យ ទើបប្រតិបត្តិការតាមចាប់ខ្លួន មេចោរប្លន់ប្រដាប់អាវុធរូបនេះ បានធ្វើឡើងតាមដីការ បង្គាប់ឲ្យចាប់ខ្លួនលេខ០៣៩ ចុះថ្ងៃទី៣០ ខែធ្នូ ឆ្នាំ២០១៥ របស់លោកអ៊ន ប៊ុនលី ចៅក្រមសើុបសួរ នៃសាលាដំបូងខេត្តឧត្តរមានជ័យ។លោកវរសេនីយ៍ទោសុីម វណ្ណះ អធិការនគរបាលស្រុក បានបន្តទៀតថា នៅថ្ងៃទី១៤ ខែមករា ឆ្នាំ២០១៥ជាង១ឆ្នាំមុន មានករណីចូលប្លន់ អាជីវករលក់មាសនិងប្តូរប្រាក់ នៅនឹងផ្សារថ្មីអន្លង់វែង ស្ថិតនៅក្នុងភូមិអូរជញ្ជៀន ឃុំអន្លង់វែង ស្រុកអន្លង់វែង ខេត្តឧត្តរមានជ័យ ហើយមេចោរប្លន់រូបនេះ បានរត់គេចខ្លួនតាំងពីពេលនោះមក ដល់ថ្ងៃនេះសមត្ថកិច្ចយើង បានស្រាវជ្រាវដឹងថា មុខសញ្ញាមកលាក់ខ្លួននៅទីនេះ ក៏សមត្ថកិច្ចប៉ូលិស បានសហការចាប់ឃាត់ខ្លួនតែម្តងទៅ។លោកវរសេនីយ៍ទោ សុីម វណ្ណះ អធិការនគរបាលស្រុក បានបន្តទៀតថា មេចោរប្លន់រូបនេះ មានឈ្មោះ ណត វុទ្ធី ហៅ ធីខ្វេ ភេទប្រុសអាយុ៣៥ឆ្នាំ រស់នៅភូមិកណ្តាលលើ ឃុំអន្លង់វែង ស្រុកអន្លង់វែង ខេត្តឧត្តរមានជ័យ ហើយនៅពេលបច្ចុប្បន្ន ជនសង្ស័យជាមេចោរ ប្លន់ប្រដាប់អាវុធ រូបនេះកម្លាំងជំនាញអធិការដ្ឋាននគរបាលស្រុកអន្លង់វែង សួរនាំបន្ថែមទៀត នឹងកសាងសំណុំរឿង បញ្ជូនទៅសាលាដំបូងខេត្ត ដើម្បីចាត់ការទៅតាមនិតិវិធីច្បាប់៕