ភ្នំពេញ ៖ ជនសង្ស័យម្នាក់ក្នុងចំណោមបក្សពួក៣នាក់ត្រូវបានប្រជាពលរដ្ឋដេញចាប់បាន បន្ទាប់ពីធ្វើសកម្មភាពលួចទូរស័ព្ទ ហើយត្រូវបានម្ចាស់ទាន់ស្រែកឆោឡោឡើងបង្កការភ្ញាក់ផ្អើល និងវាយស្ទើរស្លាប់ស្ទើររស់ កាលពីវេលាម៉ោង១នឹង៥០នាទីរំលងអាធ្រាតឈានចូលថ្ងៃទី២១ ខែមករា ឆ្នាំ២០១៦ តាមបណ្តោយផ្លូវ១៨២ កែងនឹងផ្លូវលេខ៦៣ ស្ថិតក្នុងសង្កាត់បឹងរ៉ាំង ខណ្ឌដូនពេញ ។
បើតាមការរៀបរាប់ពីបុរសជាសន្តិសុខបានឱ្យដឹងថា នៅមុនពេលកើតហេតុគឺគាត់បានដេកយាមនៅខាងមុខផ្ទះតាមបណ្តោយផ្លូវលេខ២០០ ស្រាប់តែមានជនសង្ស័យមួយក្រុមមានគ្នា៣នាក់ បានធ្វើសកម្មភាពចូលក្នុងរើកកាយមុងរបស់ខ្លួន បំណងលួយទូរស័ព្ទដែលនៅក្បែរនោះ ។ ពេលនោះគាត់ក៏បានស្រែកឆោឡោឡើងជនសង្ស័យក៏បាននាំគ្នារត់ ហើយសន្តិសុខក៏ដេញតាមពីក្រោយ និងត្រូវជនសង្ស័យរើសដុំថ្មគប់តដៃ តែត្រូវបានប្រជាពលរដ្ឋនៅជិតនោះព័ទ្ឋចាប់បានម្នាក់ នៅតាមបណ្តោយផ្លូវលេខ៦៣ កែងនឹងផ្លូវលេខ១៨២ និងវាយម្នាក់មួយដៃមួយជើងស្ទើរស្លាប់ស្ទើររស់ សន្លប់ស្តូកស្តឹងនៅនឹងកន្លែង ទើបទំនាក់ទំនងទៅសមត្ថកិច្ចឱ្យមកយក ។ក្រោយមកសមត្ថកិច្ចមូលដ្ឋានបានមកដល់កន្លែងកើតហេតុ និងបាននាំជនសង្ស័យទៅឃុំខ្លួននៅបុស្តិ៍នគរបាលរដ្ឋបានបឹងរ៉ាំង ដើម្បីចាត់ការតាមនីតិវិធី ៕
