ខេត្តសៀមរាប៖ នៅព្រឹកថ្ងៃទី២៥ ខែមករា ឆ្នាំ២០១៦ នៅសាលប្រជុំលេខ១ របស់សាលាខេត្តសៀមរាប បានបើកសិក្ខាសាលាមួយស្ដីពីការអភិវឌ្ឍន៍ក្រុងទេសចរណ៍ឲ្យមានកម្រិតកាបូនទាប ដែលប្រព្រឹត្តទៅក្រោមអធិបតីភាព ពៅ ពិសិដ្ឋអភិបាលរងនៃគណៈអភិបាលខេត្ត
សៀមរាប ដោយមានការចូលរួមពីថ្នាក់ដឹកនាំគ្រប់បណ្ដាអង្គភាពមន្ទីរពាក់ព័ន្ធជុំវិញខេត្ត និង ប្រតិភូជប៉ុនដឹកនាំដោយ លោកស្រី ហារ៉ូមិម៉ាត់ស៊ូរ៉ាតំណាងខេត្តខាណាហ្គាវ៉ារួមទាំងតំណាងវិទ្យាស្ថានអភិវឌ្ឍន៍ជប៉ុននិងសហការីសរុបចំនួន១៥នាក់។
សិក្ខាសាលានេះ ធ្វើឡើងដើម្បី ជំរុញឲ្យទីក្រុងសៀមរាប ក្លាយជាទីក្រុងមានសោភ័ណភាព និងបរិស្ថានស្រស់ស្អាត សក្ដិសមជាទីក្រុងទេសចរណ៍បៃតងដ៏ល្អឯក ផ្អែកលើវប្បធម៌ធម្មជាតិប្រវត្តិសាស្ត្រដ៏យូលង់របស់ខ្លួន ជាពិសេស ជុំរុញឲ្យតួអង្គពាក់ព័ន្ធ រួមនឹងប្រជាពលរដ្ឋ បានយល់ដឹងបន្ថែម និងរួមសហការគ្នាដើម្បីកាត់បន្ថយនូវការប្រើប្រាស់សារធាតុ ដែលផ្ទុកទៅដោយឧស្ម័នផ្ទះកញ្ចក់ដូចជា ឧស្ម័នកាបូនិច និងមេតាន់ ដែលស្រូបយកកម្ដៅ និងផលប៉ះពាល់យ៉ាងខ្លាំងដល់ពិភពលោក។
ឆ្លៀតក្នុងឱកាសនោះ ពៅពិសិដ្ឋ បានមានប្រសាសថ្លែងអំណរគុណយ៉ាងជ្រាលជ្រៅ ចំពោះរដ្ឋបាលខេត្តខាណាហ្គាវ៉ា វិទ្យាស្ថានអភិវឌ្ឍន៍ជប៉ុន តំណាងក្រុមហ៊ុនធុរកិច្ច របស់ប្រទេសជប៉ុន ដែលចាប់អារម្មណ៍ និងសហការជាមួយសាលាខេត្តសៀមរាប រៀបចំសិក្ខាសាលាដ៍មានអត្ថប្រយោជន៍នេះនៅលើទឹកដីខេត្តសៀមរាបនាពេលនេះក្នុងបំណងបញ្ជ្រាបការយល់ដឹងពីរបកគំហើញ និងបច្ចេកវិជ្ជាថ្មីៗមួយចំនួនដែលរកឃើញដោយប្រទេសជប៉ុន និងកំពុងមានការចាប់អារម្មណ៍ពីប្រជាពលរដ្ឋកម្ពុជាផងដែរ។ទន្ទឹមនឹងនោះ ស្របជាមួយកំណើនភ្ញៀវទេសចរនេះ ខេត្តសៀមរាបបាននឹងកំពុងពង្រឹង និងពង្រីកវិសាលភាព នៃការបម្រើទេសចរណ៍នានាក្នុងខេត្តឲ្យស្របតាមគោលនយោបាយទេសចរណ៍ ឲ្យសក្តិសមជាទីក្រុងទេសចរណ៍វប្បធម៌ប្រវត្តិសាស្ត្រធម្មជាតិដ៏ល្បីល្បាញ នៃព្រះរាជាណាចក្រកម្ពុជា និងនៅក្នុងពិភពលោក។ ឯកឧត្តមបន្តទៀតថា ទាំងនេះ គឹជាការគិតគូរខ្ពស់របស់រាជរដ្ឋាភិបាល ក្រសួងស្ថាប័នពាក់ព័ន្ធ អាជ្ញាធរខេត្ត ដល់់កិច្ចអភិវឌ្ឍទេសចរណ៍បៃតង សម្ដៅធ្វើឲ្យកម្ពុជារួមទាំងខេត្តសៀមរាបផង ត្រូវខិតខំប្រឹងប្រែងក្នុងការថែរក្សាភាពស្អាត និងភាពបៃតង ដោយប្រកាន់ជំហរលើគោលការណ៍ចីរភាពនៃការអភិវឌ្ឍន៍ ពោលគឹធ្វើឲ្យសម្រេចបាននូវទស្សនទានការអភិវឌ្ឍន៍បច្ចុប្បន្ន គឹសម្រាប់យើងបច្ចុប្បន្នផង និងជំនាន់ក្រោយៗផង៕
