ខេត្តសៀមរាប នៅរដ្ឋបាលសាលាខេត្តសៀមរាប នាព្រឹកថ្ងៃទី ២៧ខែ មករា ឆ្នាំ ២០១៦ មានបើកកិច្ចប្រជុំអនុគណៈកម្មការថ្នាក់ខេត្តនៃគណៈកម្មការអន្តរក្រសួងដើម្បីត្រួតពិនិត្យវាស់វែងនិងវាយតម្លៃសម្បទានដីសេដ្ឋកិច្ចក្រោមអធិបតីភាពដ៏ខ្ពង់ខ្ពស់លោកឧបនាយករដ្ឋមន្ដ្រីប៊ិនឈិនប្រធានអាជ្ញាធរជាតិដោះស្រាយទំនាស់ដីធ្លីនិងជាប្រធានគណៈកម្មការអន្តរក្រសួងដើម្បីត្រួតពិនិត្យវាស់វែងនិងវាយតម្លៃសម្បទានដីសេដ្ឋកិច្ច។កិច្ចប្រជុំនេះធ្វើឡើងដើម្បីត្រួតពិនិត្យលទ្ធផលការងារនៃការអនុវត្តរបស់អនុកម្មការថ្នាក់ខេត្ត នៃគណៈកម្មការអន្តរក្រសួងដើម្បីត្រួតពិនិត្យវាស់វែងនិងវាយតម្លៃនៅខេត្តសៀមរាបដោយមានការចូលរួមពីលោកបណ្ឌិតឃឹមប៊ុនសុងអភិបាលនៃគណៈអភិបាលខេត្តសៀមរាប និងជាប្រធានអនុគណៈកម្មការថ្នាក់ខេត្តដើម្បីត្រួតពិនិត្យវាស់វែងនិងវាយតម្លៃសម្បទានដីសេដ្ឋកិច្ចគណៈអភិបាលខេត្តអស់លោកជាសមាជិកអនុគណៈកម្មការអន្តរក្រសួងដើម្បីត្រួតពិនិត្យវាស់វែងនិងវាយតម្លៃសម្បទានដីសេដ្ឋកិច្ចខេត្តសៀមរាប អភិបាលក្រុង ស្រុកផងដែរ។
តាមសេចក្តីរបាយការណ៍របស់លោកបណ្ឌិតឃឹមប៊ុនសុងអំពីការធ្វើបច្ចុប្បន្នភាពសម្បទានដីសេដ្ឋកិច្ចក្នុងភូមិសាស្ដ្រខេត្តសៀមរាប មានផ្ទៃដីសរុបទំហំ ១លាន៥៤ពាន់៤៤២ហ.ត មានក្រុមហ៊ុនវិនិយោគសម្បទានដីសេដ្ឋកិច្ចចំនួន១៤ក្រុមហ៊ុន ដែលមានផ្ទៃដីទំហំ ៦៧ពាន់៨៣០ហ.ត ដែលគ្រប់គ្រងដោយក្រសួងបរិស្ថាន និងក្រសួងកសិកម្ម រុក្ខាប្រមាញ់ និងនេសាទ ។ ក្រោយពីអនុគណៈកម្មការថ្នាក់ខេត្ត នៃគណៈកម្មការអន្តរក្រសួង ដើម្បីត្រួតពិនិត្យ វាស់វែង និងវាយតម្លែ សម្បទានដីសេដ្ឋកិច្ច បានធ្វើការចុះត្រួតពិនិត្យ វាស់វែង និងប្រជុំវាយតម្លៃលើក្រុមហ៊ុនសម្បទានដីសេដ្ឋកិច្ចក្នុងភូមិសាស្ដ្រខេត្តសៀមរាបរួចមក យើងទទួលបានលទ្ធផលជាវិជ្ជមានក្នុងនោះមាន០៤ក្រុមហ៊ុន ត្រូវបានរាជរដ្ឋាភិបាលសម្រេចនិរាករណ៍គម្រោងវិនិយោគសម្បទានដីសេដ្ឋកិច្ចរួមមានក្រុមហ៊ុនប៊ីវីប៊ី ,ក្រុមហ៊ុនលីយ៉េរ៉ាប់ប៊ើរ , ក្រុមហ៊ុនបានយ៉ាគ្រុប និងក្រុមហ៊ុនរតនាខូបភើរេសិន ។ ជាមួយនឹងការងារត្រួតពិនិត្យ និងវាយតម្លៃក្រុមហ៊ុនសម្បទានដីសេដ្ឋកិច្ចអនុគណៈកម្មការថ្នាក់ខេត្តបានបន្តផែនការចុះពិនិត្យ និងរៀបចំនីតិវិធីនៃការស្នើសុំចុះបញ្ជីដីរដ្ឋជូនក្រុមហ៊ុនសម្បទានដីសេដ្ឋកិច្ចក្នុងខេត្តសៀមរាប ជាលទ្ធផលក្រុមការងារអនុវត្តបានចំនួន ០៧ក្រុមហ៊ុន ។
លោកឧបនាយករដ្ឋមន្ដ្រី ប៊ិន ឈិន បានមានប្រសាសន៍ណែនាំដល់សមាជិកអនុគណៈកម្មការថ្នាក់ខេត្ត ឲ្យខិតខំប្រឹងប្រែងធ្វើកិច្ចការរបស់ខ្លួនដោយសហការគ្នាឲ្យបានល្អ។ត្រូវក្តាប់សភាពការណ៏ឲ្យបានគ្រប់ជ្រុងជ្រោយអំពីស្ថានភាពដីសម្បទានសេដ្ឋកិច្ច បញ្ហាផលប៉ះពាល់ជាមួយប្រជាពលរដ្ឋដែលបានអាស្រ័យផលមុនថ្ងៃទី ៧ ខែ ឧសភាឆ្នាំ២០១២ដើម្បីពិនិត្យលទ្ធភាពកាត់ជូនប្រជាពលរដ្ឋស្របតាមការសម្រេចរបស់រាជរដ្ឋាភិបាល។ មន្ទីរជំនាញពាក់ព័ន្ធ ដែលជាសេនាធិការរបស់ខេត្ត សំខាន់មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ត្រូវសហការជាមួយអាជ្ញាធរស្រុករដ្ឋបាលព្រៃឈើមន្ទីរកសិកម្មនិងមន្ទីរបរិស្ថានខេត្ត ត្រូវចុះទៅដល់ផ្ទាល់ទីតាំងសម្បទានដីសេដ្ឋកិច្ច។ ជាពិសេសក្រុមហ៊នណាដែលរដ្ឋបានលុបចេញពីសម្បាទានដីសេដ្ឋកិច្ចមន្ទីរជំនាញនិងអាជ្ញាធរពាក់ពន្ធ័ ត្រូវចុះទៅតាមដានត្រួតពិនិត្យឲ្យបានត្រឹមត្រូវ ដូចជាក្រុមហ៊ុន ចំនួន៤ ដែលរាជរដ្ឋាភិបាលបានសម្រេចលុបចេញពីគម្រោងវិនិយោគសម្បទានដីសេដ្ឋកិច្ចនិងត្រូវចុះតាមដានត្រួតពិនិត្យ ពីវឌ្ឍនភាព ផ្ទៃដីនេះកុំឲ្យមានបញ្ហាទៀត ។ឯកឧត្តមឧបនាយករដ្ឋមន្ដ្រី មានប្រសាសន៍ផ្ដាំផ្ញើដល់អាជ្ញាធរខេត្ត ក្រុងស្រុក មន្ទីរ អង្គភាពពាក់ព័ន្ធទាំងអស់ ត្រូវសហការធ្វើកិច្ចការជាមួយគ្នា ដោយផ្ទៀងផ្ទាត់តួលេខឲ្យបានត្រឹមត្រូវនឹងគ្នា ដោយឈរលើមូលដ្ឋានជាក់ស្ដែងនៅលើទីវាលប្រកបដោយស្មារតីសាមគ្គីភាពទូលាយនិងការទទួលខុសត្រូវខ្ពស់។លោកប៊ិនឈិន បានលើកយកបទបញ្ជារបស់រាជរដ្ឋាភិបាលលេខ ០១ បប ចុះថ្ងៃទី ០៧ ខែឧសភា ឆ្នាំ ២០១២ ស្ដីពីវិធានការពង្រឹង និងបង្កើនប្រសិទ្ធិភាពនៃការគ្រប់គ្រងសម្បទានដីសេដ្ឋកិច្ចមកជម្រាបជូនសមាជិកអនុគណៈកម្មាធិការខេត្តសៀមរាបឲ្យបានយល់កាន់តែច្បាប់ដើម្បីជាប្រទីបក្នុងការដោះស្រាយបាតុភាពអសកម្មផ្សេងៗសំដៅធ្វើឲ្យការងារប្រព្រឹត្តទៅបានលទ្ធផលល្អ ។
លោកឧបនាយករដ្ឋមន្ត្រី បានផ្តល់អនុសាសន៍មួយចំនួនដល់សមាជិកអនុគណៈកម្មាធិការត្រូវសហការគ្នាដើម្បីដោះស្រាយនូវរាល់បញ្ហាទំនាស់ដែលកើតមានឡើងនៅក្នុងភូមិសាស្ត្រខេត្តសៀមរាបនិងស្នើសុំឲ្យមន្ដ្រីជំនាញសមត្ថកិច្ចគ្រប់ជាន់ថ្នាក់សហការគ្នាដើម្បីកាត់បន្ថយបញ្ហាទំនាស់ដីធ្លីក្នុងខេត្តរបស់ខ្លួនជាសំខាន់ការគ្រប់គ្រងដីសម្បទានសេដ្ឋកិច្ច។ អង្គប្រជុំបានពិភាក្សាទៅលើបញ្ហាប្រឈមមួយចំនួននិងក្រុមហ៊ុនមួយចំនួនដែលមិនបានអនុញ្ញាតឲ្យក្រុមការងារអនុគណៈកម្មការចូលទៅពិនិត្យនិងវាស់វែងចុះបញ្ជីដីសម្បទានសេដ្ឋកិច្ច ។ ក្នុងនោះដែរកិច្ចប្រជុំក៏បានឯកភាពពង្រឹងការអនុវត្តដើម្បីកាត់បន្ថយទំនាស់ដីធ្លី និងបានឯកភាពកែលំអរចំណុចខ្វះខាតក្នុងការអនុវត្តកន្លងមក ហើយបន្តសហការដោះស្រាយឲ្យបានល្អ ដើម្បីបង្កើនជំនឿរបស់ប្រជាពលរដ្ឋមកលើការដឹកនាំរបស់រាជរដ្ឋាភិបាលកម្ពុជា ៕
ដោយគឿនវេត
