កំពង់ធំៈ មានហេតុការណ៍មួយបង្ករឲ្យមានការភ្ញាក់ផ្អើលទាំងកណ្តាលអាធ្រាត ពីសំណាក់បងប្អូនប្រជាពលរដ្ឋ ដោយសារតែមានហាងបាយមួយ ស្ថិតនៅមុនសាលាលិសសេរ ផ្លូវចូលមជ្ឈមណ្ឌលបណ្តុះបណ្តាល វិជ្ជាជីវៈកំពង់ធំ ត្រូវបានជនមិនស្គាល់មុន លួចដុតទាំងកណ្តាលអាធ្រាត វេលាម៉ោង ១១.៣០នាទី ថ្ងៃទី ២៦ ខែមករា ឆ្នាំ ២០១៦ ។
ហាងបាយនេះត្រូវបានសាងសង់ជាប់និងសាលារៀនលិសសេរ ស្ថិតនៅភូមិព្រៃពន្លិច សង្កាត់អាចារ្យលាក់ ក្រុងស្ទឹងសែន ខេត្តកំពង់ធំ ក្រោយពីអ្នកធ្វើដំណើរតាមបណ្តោយផ្លូវជាតិលេខ៦ ប្រទះឃើញមានអណ្តាតភ្លើងឆេះសន្ធរសន្ធៅ ក៏បានរាយការណ៍ជូនសមត្ថកិច្ច ដើម្បីជួយធ្វើអន្តរាគមន៍ ក្នុងករណីភ្លើងឆេះហាងលក់បាយដែលបានឆេះឡើងដោយពុំដឹងមូលហេតុ។
ខណៈពេលព្រះអគ្គីបានកំពុងតែលេបត្របាក់ហាងបាយ ដែលសាងសង់អំពីឈើ ប្រកស័ង្ខសី ដែលមានទំហំ ៤គុណ៦មការ៉េនេះ គេសង្កេតឃើញរថយន្តពន្លត់អគ្គីភ័យ របស់ស្នងការដ្ឋាននគរបាល ខេត្តកំពង់ធំ ចំនួនមួយគ្រឿង រួមទាំងមន្ត្រីសមត្ថកិច្ចពន្លត់អគ្គីភ័យ និងកងកម្លាំងកងរាជអាវុធហត្ថ ក្រុងស្ទឹងសែន និងកម្លាំងតំបន់ប្រតិបត្តិការសឹករងកំពង់ធំចូលរួមជួយពន្លត់ យ៉ាងសកម្ម តែដោយសារតែជាហាងបាយនេះធ្វើអំពីឈើ ដោយមានសម្ភារៈដែលងាយឆាបឆេះនោះ ក៏បណ្តាលឲ្យហាងបាយទាំងមូលឆេះអស់គ្មានសល់។
យោងតាមប្រភពព័ត៌មាន ពីកន្លែងកើតហេតុ បានឲ្យដឹងថា ករណីដែលបង្ករឲ្យមានការឆេះហាងបាយនេះ ដោយសារតែឆ្លងចរន្តអគ្គីសនីយ៍ តែបើតាមការរៀបរាប់របស់លោក ជីវ វណ្ណារិទ្ធ ជាម្ចាស់ហាង បានឲ្យដឹងថា វាមិនមែនជាករណីឆ្លងចរន្តអគ្គីសនីយ៍ទេ ដោយសារតែហាងបាយនេះ ពុំមានមនុស្សដេកនៅទីនេះ ហើយពេលយប់និងបិទបារ៉ែតភ្លើងអស់ហើយ ចំណែកខ្សែភ្លើងដែលតចូលគឺមានតែមួយខ្សែប៉ុណ្ណោះ ហើយខ្សែភ្លើង ត្រូវបានតភ្ជាប់នឹងជញ្ជាំងស៊ីប៉ូរូ ដែលមានលក្ខណៈរឹងដូចថ្ម ហើយពុំអាចឆេះបានទេ លោកបានបន្តថា ចំណែកសម្ភារៈនៅក្នុងនេះ គឺមានតែសម្ភារៈផ្ទះបាយសម្រាប់ធ្វើម្ហូប ពុំមានរបស់មានតម្លៃនោះទេ ។
ដោយ ប៊ុន រដ្ឋា