ខេត្តសៀមរាប ក្បាលដីចំនួន២០៤០ក្បាលជាក្បាលដីដែលស្ថិតនៅក្នុងអនុក្រឹត្យលេខ៥១អនក្រ.មក និងអនុក្រឹត្យលេខ៥២ អនក្រ.បក ចុះថ្ងៃទី១៧ ខែមេសា ឆ្នាំ២០១៥ ស្ថិតនៅក្នុងភូមិចំនួន៤ នៃសង្កាត់ស្លក្រាម និងសង្កាត់អំពិល ក្រុងសៀមរាបរួមមានៈភូមិចុងកៅស៊ូ ភូមិបឹងដូនប៉ា សង្កាត់ស្លក្រាម និងភូមិព្រៃគុយ ភូមិគោកចាន់ សង្កាត់ ត្រូវបានប្រារព្វបិទផ្សាយជាសាធារណៈនូវឯកសារ នៃការវិនិច្ឆ័យ ជូនប្រជាពលរដ្ឋដែលជាម្ចាស់ដី ឬអ្នកកាន់កាប់ដី បានចូលរួមពិនិត្យ ផ្ទៀងផ្ទាត់និងបញ្ជាក់ពីភាពត្រឹមត្រូវ ឬខុសឆ្គង ដែលត្រូវកែតម្រូវ ឬជំទាស់លើទិន្នន័យទាំងនោះក្នុងរយៈពេល៣០ថ្ងៃ គិតចាប់ពីថ្ងៃទី១០ ខែកុម្ភៈ ឆ្នាំ២០១៦ ដល់ថ្ងៃទី១០ ខែមីនា ឆ្នាំ២០១៦ ។ ពិធីបិទផ្សាយនេះ ប្រារព្វធ្វើឡើងនៅក្នុងបរិវេណវត្តប្រាសាទត្រាំនាគនាព្រឹកថ្ងៃទី១០ ខែកុម្ភៈ ឆ្នាំ២០១៦ ក្រោមអធិបតីភាពឯ.ឧ ស៊ិន រុន អភិបាលរងនៃគណៈអភិបាលខេត្តសៀមរាបនិងជាប្រធានគណៈកម្មការរដ្ឋបាល ដោយមានការចូលរួមពីសំណាក់អស់ លោកលោកស្រីថ្នាក់ដឹកនាំមន្ទីរអង្គភាព ដែលមានការពាក់ព័ន្ធ ព្រមទាំងបងប្អូនប្រជាពលរដ្ឋជាម្ចាស់ក្បាលដីយ៉ាងច្រើនកុះករផងដែរ។ លោកអឿនពៅអភិបាលរងក្រុងសៀមរាបបានមានប្រសាសន៍ថា ការបិទផ្សាយជាសាធារណៈនូវឯកសារនៃការវិនិច្ឆ័យដែលរួមមានប្លង់សុរិយោដី និងបញ្ជីឈ្មោះម្ចាស់ដីនាពេលនេះគឺជាលទ្ធ និងជាសក្ខីភាពដែលបានបញ្ជាក់ប្រាប់បងប្អូនប្រជាពលរដ្ឋទាំងអស់គ្នាថា ការចុះបញ្ជីដីមានលក្ខណៈជាប្រព័ន្ធគឺដើម្បីកាត់បន្ថយទំនាស់និងភាពក្រីក្ររបស់ប្រជាពលរដ្ឋ។ លោកបានបញ្ជាក់ថាការចុះបញ្ជីដីធ្លីមានលក្ខណៈជាប្រប័ន្ធនេះ គឺឈានទៅដល់ការផ្ដល់ប័ណ្ណកម្មសិទ្ធិដែលត្រូវបានការពារដោយច្បាប់និងធានាដោយរដ្ឋ ដោយគ្មានជនណាម្នាក់ត្រូវបានគេដកហូតកម្មសិទ្ធិនេះបានឡើយ ។ ក្នុងនោះដែរលោកប៉ូយ ស៊ីឡាំង អនុប្រធានមន្ទីររៀបចំដែនដីនគរូបនីយកម្ម សំណង់ និងសុរិយោដី បានបញ្ជាក់បន្ថែមថាការចុះបញ្ជីដីធ្លីមានលក្ខណៈជាប្រព័ន្ធគឺយោងតាមអនុក្រឹត្យលេខ៤៦អនក្រ.បក ចុះថ្ងៃទី៣១ ខែឧសភា ឆ្នាំ២០០២ស្ដីពីនីតិវិធី នៃការសាងសង់ប្លង់សុរិយោដីនិងសៀវភៅគោលបញ្ជី និងសារាចរណែនាំលេខ០១ ដនស/សដ ចុះថ្ងៃទី១៩ ខែសីហា ឆ្នាំ២០០២ អនុវត្តនីតិវិធី នៃការកសាងប្លង់សុរិយោដីនិងសៀវភៅគោលបញ្ជីដីធ្លី ដើម្បីបាននូវសុវត្ថិភាពក្នុងការកាន់កាប់ដីធ្លីរបស់ប្រជាពលរដ្ឋតាមរយៈចេញវិញ្ញាបនប័ត្រសំគាល់អចនាវត្ថុ(ប័ណ្ណកម្មសិទ្ធិ)ជូនប្រជាពលរដ្ឋខ្មែរ។ លោកបានបន្តថាក្បាលដីដែលស្ថិតនៅក្នុងអនុក្រឹត្យលេខ៥១អនក្រ.បកនិងអនុក្រឹត្យលេខ៥២ អនក្រ.បកដែលនឹងត្រូវបិទផ្សាយជាសាធារណៈនូវឯកសារនៃការវិនិច្ឆ័យ ដើម្បីឲ្យបងប្អូនប្រជាពលរដ្ឋពិនិត្យ ផ្ទៀងផ្ទាត់ និងបញ្ជាក់ពីភាពត្រឹមត្រូវ ឬខុសឆ្គង ដែលត្រូវកែតម្រូវ ឬជំទាស់នេះមានចំនួន២០៤០ក្បាលក្នុងនោះរួមមានៈភូមិចុងកៅស៊ូចំនួន៦៦៥ក្បាលដី ភូមិបឹងដូនប៉ាចំនួន៧៧២ក្បាលដី ភូមិព្រៃគុយចំនួន៥១២ក្បាល និងភូមិគោកចាន់ចំនួន៩១ក្បាលដី។ មានប្រសាសន៍សំណេះសំណាលក្នុងឱកាស បិទផ្សាយជាសាធារណៈនូវឯកសារ នៃការវិនិច្ឆ័យ ជូនប្រជាពលរដ្ឋនោះដែរ លោកស៊ិន រុន បានមានប្រសាសន៍ការចុះបញ្ជីដីធ្លីមានលក្ខណៈជាប្រព័ន្ធ គឺធ្វើឡើងដើម្បីផ្ដល់ប័ណ្ណកម្មសិទ្ធិជូនទៅឲ្យបងប្អូនប្រជាពលរដ្ឋដែលជាម្ចាស់ដីឬអ្នកកាន់កាប់ដីទាំងអស់ដើម្បីយកទៅប្រើប្រាស់តាមតម្រូវការដូចជាៈយកទៅដាក់បញ្ចាំ ដើម្បីយកប្រាក់មកប្រកបមុខរបរផ្សេងៗក្នុងការលើកស្ទួយជីវភាពរស់នៅប្រចាំថ្ងៃក្នុងគ្រួសារ ឬជាឯកសារសំអាងនៅពេលដែលមានជម្លោះដីធ្លីកើតមានឡើង។ ក្នុងនោះដែរ លោកអភិបាលរងខេត្ត បានសម្ដែងការអបអរសាទរ និងកោតសរសើរដល់មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តដែលបានខិតខំប្រឹងប្រែងក្នុងការចុះបញ្ជីដីធ្លីមានលក្ខណៈជាប្រព័ន្ធ និងចែកប័ណ្ណកម្មសិទ្ធិជូនដល់ប្រជាពលរដ្ឋតាមបណ្ដាសង្កាត់នានា ក្នុងក្រុងសៀមរាប ដូចជាៈ-សង្កាត់សៀមរាប -សង្កាត់សាលាកំរើក -សង្កាត់ស្វាយដង្គុំ -សង្កាតជ្រាវ-សង្កាត់ស្លក្រាម -សង្កាត់គោកចក និងសង្កាត់សំបួរ ។ លោក បានបញ្ជាក់ថា ការចុះបញ្ជីដីធ្លីមានលក្ខណៈជាប្រព័ន្ធ ពិតជាអនុវត្តទៅតាមនីនិវិធី និងបច្ចេកទេសទំនើបមានតម្លាភាពនិងការទទួលខុសត្រូវ ដែលប្រទេសជឿនលឿនលើពិភពលោកបានកំពុងអនុវត្តនិងមានប្រសិទ្ធិភាពលើការគ្រប់គ្រងដីធ្លីផងដែរ ។ សូមបញ្ជាក់ផងដែរ ការបិទផ្សាយជាសាធារណៈនូវឯកសារ នៃការវិនិច្ឆ័យ ជូនប្រជាពលរដ្ឋ ដែលជាម្ចាស់ដី ឬអ្នកកាន់ និងអ្នកពាក់ព័ន្ធចូលរួមពីនិត្យ ផ្ទៀងផ្ទាត់មើលឲ្យបានគ្រប់គ្នា ក្នុងរយៈពេល៣០ថ្ងៃ គិតចាប់ពីថ្ងៃទី១០ ខែកុម្ភៈ ឆ្នាំ២០១៦ ដល់ថ្ងៃទី១០ ខែមីនា ឆ្នាំ២០១៦ ក្នុងទីតាំងចំនួន២ ទី១/ នៅសង្កាត់ស្លក្រាម សម្រាប់ភូមិចុងកៅស៊ូ និងភូមិបឹងដូនប៉ា និងទី២/នៅសាលឆទានភូមិព្រៃគុយ សម្រាប់ភូមិព្រៃគុយ និងភូមិគោកចាន់ផងដែរ ។