ខេត្តសៀមរាប របាយការណ៍នៅក្នុងអង្គសន្និបាតបូកសារុបលទ្ធផលការងារទេសចរណ៍ឆ្នាំ២០១៥ របស់មន្ទីរទេសចរណ៍ខេត្តសៀមរាប ដែលបានបង្ហាញនាព្រឹកថ្ងៃទី១០ ខែកុម្ភៈ ឆ្នាំ២០១៦នេះ បានសង្កត់ធ្ងន់ថា ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ គឺជាជម្រើសនៃយុទ្ធសាស្ត្រដ៏សមស្របបំផុត ក្នុងការចូលរួមអភិវឌ្ឍន៍ទេសចរណ៍បៃតង សំដៅធ្វើឲ្យកម្ពុជា ក៏ដូចជាគ្រប់បណ្តាខេត្តក្រុង ទីប្រជុំជន រមណីយដ្ឋានទេសចរណ៍ទាំងអស់ បន្តខិតខំប្រឹងប្រែង លើកកម្ពស់ភាពស្អាត និងភាពបៃតង ដោយប្រកាន់ជំហរ ( ចិរកាលនៃការអភិវឌ្ឍន៍ ) ( ការអភិវឌ្ឍន៍បច្ចុប្បន្ន គឺសម្រាប់យើងនាពេលបច្ចុប្បន្នផង និងសម្រាប់កូនចៅជំនាន់ក្រោយផង ) ។
អង្គសន្និបាតនេះ បានប្រព្រឹត្តទៅរយៈពេល១ព្រឹក ក្រោមវត្តមានរបស់ លោក ថោង ខុន រដ្ឋមន្ត្រីក្រសួងទេសចរណ៍ និងមានការចូលរួមពីសំណាក់វិស័យឯកជនផងដែរ ដែលជាសេវាករទេសចរណ៍ជាតិ អន្តរជាតិ ប្រមាណជា ជាង ៤០០នាក់ ។
បើតាមការចាប់អារម្មណ៍ អង្គសន្និបាតនេះ បានបង្ហាញអំពីការត្រៀមខ្លួនរបស់ព្រះរាជាណាចក្រកម្ពុជា ក្នុងការចូលរួមចលនាប្រឡងប្រណាំងទីក្រុងទេសចរណ៍ស្អាតអាស៊ាន ។ ក្រុងសៀមរាប ដែលទទួលបានជ័យលាភី ទីក្រុងស្អាតលើកទី១ ថ្នាក់ជាតិ ផ្ការំដួល៣ទង កាលពីថ្ងៃទី២៤ ខែកុម្ភៈ ឆ្នាំ២០១៥កន្លងទៅ ជាមុខសញ្ញាសម្រាប់ការចូលរួមប្រកួតប្រជែងទីក្រុងទេសចរណ៍ស្អាត ថ្នាក់អាស៊ានផងដែរ ជាមួយនិងបណ្តាទីក្រុងរំដួល៣ទង មួយចំនួនទៀត។ នេះបើតាមការលើកឡើងរបស់ ឯកឧត្តម រដ្ឋមន្ត្រីក្រសួងទេសចរណ៍ ( ថោង ខុន ) ។
លោកបានបង្ហាញឲ្យដឹងថា កម្ពុជាមានមោទនភាពខ្លាំងណាស់ ក្នុងការដឹកនាំ រៀបចំស្តង់ដារទីក្រុងទេសចរណ៍ស្អាតអាស៊ាន សម្រាប់ប្រើប្រាស់ក្នុងកម្រឹតតំបន់ ហើយការងារនេះគឺជាការងារថ្មីមួយ ដែលផ្តើមចេញពីការអនុវត្តប្រកបដោយជោគជ័យ ក្នុងការប្រឡងប្រណាំងទីក្រុងស្អាតនៅថ្នាក់ជាតិរបស់កម្ពុជា ។
អាស៊ានក៏ដូចជាកម្ពុជា ធ្វើយ៉ាងណាឲ្យមានភាពប្រកួតប្រជែង កាន់តែខ្លាំងជាងមុន ផ្តល់នូវភាពកក់ក្តៅដល់ភ្ញៀវទេសចរ និងទាក់ទាញភ្ញៀវទេសចរពិភពលោកឲ្យចូលមកទស្សនាអាស៊ានទាំងប្រទេសឲ្យកាន់តែច្រើន ។ ដូច្នេះដើម្បីសម្រេចបានគោលដៅនិងគោលបំណងទាំងនេះ អាស៊ានបានរៀបចំស្តង់ដារគុណភាពទេសចរណ៍ចំនួន៦ក្នុងនោះគឺមានស្តង់ដារទីក្រុងទេសចរណ៍ស្អាតអាស៊ានផងដែរ ដែលត្រូវបានអនុម័តជាផ្លូវការដោយរដ្ឋមន្ត្រីទេសចរណ៍អាស៊ាន និងកំពុងចាប់ផ្តើមដាក់ឲ្យអនុវត្តជាផ្លូវការ ហើយស្តង់ដារទីក្រុងទេសចរណ៍ស្អាតអាស៊ាន នឹងក្លាយជាឧបករណ៍មួយដ៏សំខាន់ បំរើឲ្យការពង្រឹងគុណភាពវិស័យទេសចរណ៍អាស៊ាន ឆ្លើយតបទៅនឹងបញ្ហាបំរ៉ែបំរួលអាកាសធាតុ ក៏ដូចជាកិច្ចគាំពារបរិស្ថានដ៏ហ្មត់ចត់ ព្រោះថាការអភិវឌ្ឍន៍វិស័យទេសចរណ៍ គឺឈានឆ្ពោះទៅរកការអភិវឌ្ឍន៍ទេសចរណ៍បៃតង ស្របតាមនិន្នាការបច្ចប្បន្ន ដើម្បីបន្ថែមនូវភាពទាក់ទាញ និងធានានិរន្តភាពនៃការអភិវឌ្ឍន៍ ។
របត់ថ្មីឈានចូលក្រោយឆ្នាំ២០១៥នេះ គឺចាប់ពីឆ្នាំ២០១៦ ដល់ ឆ្នាំ២០២៥ គឺជាតំណាក់កាលនៃការអនុវត្តស្តង់ដារទេសចរណ៍អាស៊ាន ។ សូចនាករ និងលក្ខណៈវិនិច្ឆ័យសម្រាប់វាយតម្លៃស្តង់ដារទីក្រុងទេសចរណ៍ស្អាតអាស៊ាន រួមមានចំនួន៧សូចនាករគោល ចែកចេញជា២៨សូចនាករលំអិត និងមាន១០៨សម្រាប់ជាលក្ខណៈវិនិច្ឆ័យ ៕
