កំពង់ធំៈ ក្រុមគ្រួសារទ័ពចំនួន ១៥គ្រួសារ ត្រូវបានយកចិត្តទុកដាក់ពីសំណាក់មេបញ្ជាការតំបន់ប្រតិបត្តិការសឹករង កំពង់ធំ និងត្រូវបានផ្តល់ជាអំណោយ សម្រាប់ការលើកទឹកចិត្ត ដល់គ្រួសារទ័ព ក្នុងឳកាសចុះសួរសុខទុក្ខ នៅរសៀលថ្ងៃទី ១១ ខែកុម្ភះ ឆ្នាំ២០១៦ នៅទីបញ្ជាការវរៈសេនាតូចរៀបរយលេខ១ ភូមិតាឡែកថ្មី ឃុំសាលាវិស័យ ស្រុកប្រាសាទបាល័ង្គ ខេត្តកំពង់ធំ។
ក្រុមគ្រួសារទ័ព ដែលបានមករស់នៅជាមួយស្វាមី ស្ថិតនៅក្នុងបន្ទាយវរៈសេនាតូចរៀបរយលេខ១ ចំនួន១៥ គ្រួសារ ត្រូវបានថ្នាក់ដឹកនាំ តំបន់ប្រតិបត្តិការសឹក ប្រឹងប្រែងយកចិត្តទុកដាក់ ចំពោះជីវភាពរបស់គ្រួសារ ទ័ព ឲ្យមានជីវភាពល្អ និងបានជម្រុញឲ្យមានមុខរបរ សម្រាប់ការដោះស្រាយជីវភាព និងត្រូវបានទទួល អំណោយពីមេបញ្ជាការ ក្នុងមួយគ្រួសារទទួលបាន អង្ករ២៣គ.ក មីយើង១កេស ទឹកស៊ីអ៊ីវមួយយួរ ទឹកត្រី ១យួរ និងថវិកា៤ម៉ឺរៀល អំណោយទាំងនេះ គឺជាទឹកចិត្តរបស់ឯកឧត្តមផ្ទាល់ សម្រាប់ជាការលើកទឹកចិត្តដល់ គ្រួសារកងទ័ព។
ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ បានផ្តាំផ្ញើរនិងណែនាំ ដល់ក្រុមគ្រួសារទ័ពទាំងអស់ ដែលរស់នៅជាមួយស្វាមី ក្នុងបន្ទាយ ឲ្យចេះស្រឡាញ់គ្នា សាមគ្គីគ្នាដូចបងប្អូនរវាងគ្រួសារ និងគ្រួសារ និងកងកម្លាំងនិងកម្លាំង ជម្រុញឲ្យកូនចៅបានចូលរៀនគ្រប់គ្នា ឲ្យចេះផ្តល់យោបល់ល្អដល់គ្នាទៅវិញទៅមក និងជាកម្លាំងសំខាន់បំផុត សម្រាប់ការជួយលើកទឹកចិត្តប្តី ដោយមិនត្រូវជេរ ឬស្តីបន្តោសគ្នា ឬការជឿលើការញ៉ុះញ៉ុង ពីសំណាក់មជ្ឈដ្ឋានខាងក្រៅអង្គភាព បង្ករឲ្យមានការបែកបាក់ខ្វែង គំនិតគ្នានៅក្នុងបន្ទាយ ដោយឡែកក្នុងនាមជាមេបញ្ជាការ ក៏ដូចជាថ្នាក់ដឹកនាំទាំងអស់ ចំណុះឲ្យតំបន់សឹក បានគិតគូរណាស់ចំពោះអនាគត់គ្រួសារកងទ័ព មិនបណ្តោយឲ្យគ្រួសារទ័ពមួយណា ដែលជួបការលំបាក ដោយគ្មានការអើពើនោះទេ ។
ដោយ ប៊ុន រដ្ឋា
