ភ្នំពេញ៖យុវជន២នាក់និងគ្រឿងញៀន៣៨កញ្ចប់រួមនិងទូរហ្គេមបាញ់ត្រីចំនួន១ត្រូវបានកម្លាំងនគរបាលព្រហ្មទណ្ឌខណ្ឌឫស្សីកែវសហការណ៍និងកម្លាំងនគរបាលប៉ុស្ដិ៍ស្វាយប៉ាកបង្ក្រាបនៅវេលាម៉ោង០៤និង០០នាទីរសៀលថ្ងៃទី ១១ ខែ កុម្ភះ ឆ្នាំ ២០១៦ នៅចំណុចផ្ទះគ្មានលេខ ផ្លូវលំ ក្រុម៧ ភូមិលូ សង្កាត់ស្វាយប៉ាក ខណ្ឌឫស្សីកែវ ។
យុវជនជាប់សង្ស័យ១ឈ្មោះទីវ ថាន់យឿង ភេទប្រុស អាយុ ១៨ឆ្នាំ មានមុខរបរជាងភ្លើង ស្នាក់នៅចំណុចកើតហេតុខាងលើ ២ឈ្មោះគុជ សុជាតិ ភេទប្រុស អាយុ២៥ឆ្នាំ មានមុខរបរជាងកាត់សក់ ស្នាក់នៅ ភូមិកន្ត្រុង សង្កាត់ពន្ធសាំង ខណ្ឌព្រែកព្នៅ រាជធានីភ្នំពេញ។
នាយរងផ្នែកនគរបាលព្រហ្មទណ្ឌខណ្ឌឫស្សីកែវ លោក ម៉ៅ ចាន់ថុនបានឲ្យដឹងថាបន្ទាប់ពីទទួលបានឲ្យដាក់បទបញ្ជាស្រាវជ្រាវពីសំណាក់លោក ទៀង ច័ន្ទសារ អធិការនគរបាលខណ្ឌឫស្សីកែវ កម្លាំងព្រហ្មទណ្ឌខណ្ឌបានស៊ើបអង្កេតរហូតឈានដល់ការបង្ក្រាបជាក់ស្ដែងនារសៀលនេះដោយឃាត់ខ្លួនមនុស្សចំនួន២នាក់នៅក្នុងផ្ទះបើកល្បែងហ្គេមបាញ់ត្រីនិងដកហូតគ្រឿងញៀនជាប្រភេទម៉ាទឹកកកចំនួន៣៨កញ្ចប់ ដែលជនត្រូវជាប់សង្ស័យកំពុងធ្វើសកម្មភាពជួញដូរនៅក្នុងផ្ទះ ហ្គេមបាញ់ត្រី។បច្ចុប្បន្នជនត្រូវជាប់សង្ស័យទាំង២នាក់ត្រូវបានបញ្ជូនទៅឃុំខ្លួននិងសាកសួរបន្ថែមនៅអធិការនគរបាលខណ្ឌឫស្សីកែវដើម្បីចាត់ការតាមនិតិវិធីច្បាប់៕
