ភ្នំពេញៈ សន្និបាតបូកសរុបលទ្ធផលការងារពីឆ្នាំ ២០១៣ ដល់ឆ្នាំ២០១៥ និងទិសដៅឆ្នាំ២០១៦ របស់អាជ្ញាធរជាតិដោះស្រាយទំនាស់ដីធ្លី បានប្រារព្ធឡើង នៅព្រឹកថ្ងៃទី១៧ ខែកុម្ភៈ ឆ្នាំ២០១៦ នាទីស្តីការគណៈរដ្ឋមន្ត្រី ។ អង្គសន្និបាត ប្រព្រឹត្តទៅក្រោមអធិបតីភាពដ៏ខ្ពង់ខ្ពស់ ឯកឧត្តម ប៊ិន ឈិន ឧបនាយករដ្ឋមន្ត្រី និងជាប្រធានអាជ្ញាធរជាតិដោះស្រាយទំនាស់ដីធ្លី និងដោយមាន វត្តមានចូលរួមពី ឯកឧត្តម លោក លោកស្រី សមាជិកសមាជិកាអាជ្ញាធរជាតិដោះស្រាយទំនាស់ដីធ្លី អភិបាល អភិបាលរង នៃគណៈអភិបាលរាជធានីខេត្ត មេធាវី និងតំណាងក្រសួងស្ថាប័នពាក់ពន្ធ័ ។
ដំណើរការនៃអង្គសន្និបាត បានប្រព្រឹត្តទៅ ដោយបានស្តាប់របាយការណ៍ការងាររបស់ អាជ្ញាធរជាតិដោះស្រាយទំនាស់ដីធ្លី រយះពេល០៣ឆ្នាំ ២០១៣ ដល់២០១៥ ដែលបញ្ជាក់ដោយ ឯកឧត្តម នាយឧត្តមសេនីយ៍ ចាយ សាំងយុន រដ្ឋលេខាធិការក្រសួងការពារជាតិ និងជាអគ្គលេខា ធិការនៃ អាជ្ញាធរដោះស្រាយទំនាស់ដីធ្លី និងការលើកឡើងរបស់ ឯកឧត្តម អភិបាល អភិបាលរង ខេត្តក្រុងមួយចំនួន ពាក់ពន្ធ័ទៅនឹងការដោះស្រាយវិវាទដីធ្លី ដែលក្នុងរយះពេលកន្លងមក ថ្នាក់ ដឹកនាំ និងមន្ត្រីអាជ្ញាធរជាតិដោះស្រាយទំនាស់ដីធ្លី ដោយមានការចូលរួមសហការពី គ្រប់ ក្រសួងស្ថាប័ន និងអាជ្ញាធរថ្នាក់ក្រោមជាតិពាក់ព័ន្ធគ្រប់លំដាប់ថ្នាក់ បានខិតខំបំពេញការងារ យ៉ាងសកម្ម ហើយតាមរយះលទ្ធផលដែលអាជ្ញាធរជាតិដោះស្រាយទំនាស់ដីធ្លីអនុវត្តបាន ឃើញថា ទំនាស់ដីធ្លី មិនការកើនឡើងច្រើន ដូចដែលអង្គការសង្គមស៊ីវិលមួយចំនួន បានលើកឡើង នោះឡើយ ។
ឯកឧត្តម ឧបនាយករដ្ឋមន្ត្រី ប៊ិន ឈិន មានប្រសាសន៍ ថា ៖ ចាប់តាំងពីរាជរដ្ឋាភិបាល បានបង្កើតអាជ្ញាធរជាតិដោះស្រាយទំនាស់ដីធ្លី គិតមកដល់ថ្ងៃនេះ គឺមាន រយះពេល១០ឆ្នាំហើយ ក្នុងនោះអាជ្ញាធរ បានធ្វើការដោះស្រាយ សមស្របជូនដល់ប្រជាពលរដ្ឋមួយចំនួន ដែលបាន កាន់កាប់ដីធ្លីដោយស្របច្បាប់ ហើយទំនាស់ដែលនៅសល់ និងទំនាស់ដីធ្លី ថ្មីៗទៀត អាជ្ញាធរជាតិ ដោះស្រាយទំនាស់ដីធ្លី បាននឹងកំពុងបន្តធ្វើការដោះស្រាយ ។ ទោះបីជាមាន ភារកិច្ចដ៏ទៃមួយ ចំនួនទៀត ដែលរាជរដ្ឋាភិបាលបានប្រគល់ជូនក្តី ក៍អាជ្ញាធរជាតិដោះស្រាយ ទំនាស់ដីធ្លី បានខិតខំ ប្រឹងប្រែងអស់ទាំងកម្លាំងកាយចិត្ត ដោះស្រាយទំនាស់ដីធ្លីក្នុងដែនសមត្ថកិច្ច របស់ខ្លួនដោយស្មារតី ទទួលខុសត្រូវខ្ពស់បំផុត ជាក់ស្តែងក្នុងរយះពេល០៣ឆ្នាំចុងក្រោយនេះ អាជ្ញា ធរជាតិដោះស្រាយ ទំនាស់ដីធ្លី បានដោះស្រាយដីធ្លី រួចរាល់ជាស្ថាពរបានចំនួន៨៧ករណី ។ ឯកឧត្តម ប៊ិន ឈិន បញ្ជាក់ថា ឆ្នាំ២០១៦ ជាឆ្នាំទី៣ ដែលរាជរដ្ឋាភិបាលនីតិកាលទី៥ នៃរដ្ឋសភា នឹងបន្តការប្តេជ្ញាចិត្ត អនុវត្តនយោបាយកំណែទម្រង់ស៊ីជម្រៅ និងគ្រប់ជ្រុងជ្រោយរបស់ខ្លួន ដែលចំពោះមុខគឺ កំណែទម្រង់ការគ្រប់គ្រងដីធ្លី និង កំណែទម្រង់ព្រៃឈើ និងឡូត៍នេសាត ។ ឯកឧត្តម បានលើកឡើងថា គិតមកត្រឹមថ្ងៃទី ១៧ ខែកុម្ភៈ ឆ្នាំ២០១៦ គណៈកម្មការអន្តរក្រសួងដើម្បីត្រួតពិនិត្យ វាស់វែង និងវាយតម្លៃសម្បទានដីសេដ្ឋកិច្ច បានពិនិត្យ និងវាយតម្លៃក្រុមហ៊ុនដីសម្បទានដីសេដ្ឋកិច្ច ដោយបានធ្វើរបាយការណ៍ជូនប្រមុខរាជរដ្ឋាភិបាលសម្រេចបានចំនួន ២៨១ ក្រុមហ៊ុន រួចមកហើយ ក្នុងនោះក្រុមហ៊ុន ដែលស្ថិតក្រោមការគ្រប់គ្រងរបស់ក្រសួងបរិស្ថាន មានចំនួន ១០៦ ក្រុមហ៊ុន និងក្រុមហ៊ុនដែលស្ថិតក្រោមការគ្រប់គ្រងរបស់ក្រសួងកសិកម្ម រុក្ខាប្រមាញ និងនេសាទ មានចំនួន ១៧៥ ក្រុមហ៊ុន ។ នេះគឺជាភារកិច្ចដ៏សំខាន់មួយទៀត ដែលរាជរដ្ឋាភិបាល សម្រេចបាន ក្នុងការធ្វើអោយដំណើរការ នៃការគ្រប់គ្រងដីធ្លី និងធនធានធម្មជាតិប្រកបដោយប្រសិទ្ធភាព និងមាននិរន្តភាព ដើម្បីរួមចំណែកក្នុងការកាត់បន្ថយទំនាស់ដីធ្លី និងកាត់បន្ថយភាពក្រីក្ររបស់ ប្រជាពលរដ្ឋ ។ ឯកឧត្តម ឧបនាយករដ្ឋមន្ត្រី ប៊ិន ឈិន មានប្រសាសន៍បន្តថា ផ្អែកលើបទពិសោធន៍ ការងារកន្លងមក របស់អាជ្ញាធរជាតិដោះស្រាយទំនាស់ដីធ្លី គួបផ្សំនឹងការរកឃើញនូវដំណោះ ស្រាយ និងវិធានការថ្មីៗក្នុងសន្និបាតនេះ ជឿជាក់ថា អាជ្ញាធរជាតិដោះស្រាយទំនាស់ដីធ្លី នឹងបន្តកិច្ចសហការយ៉ាងល្អថែមទៀតជាមួយស្ថាបន័ពាក់ព័ន្ធ និងអាជ្ញាធរដែនដី ក្នុងការអនុវត្តកិច្ច ការអោយមានប្រសិទ្ធភាព ឆ្លើយតបនឹងការបេ្តជ្ញាចិត្ត និងគោលនយោបាយរបស់រាជរដ្ឋាភិបាល ៕