បន្ទាយមានជ័យ៖ ស្ត្រីម្នាក់ត្រូវបានគេរាយការណ៍ថាបានស្លាប់បន្ទាប់ពីបញ្ជូនទៅដល់មន្ទីរពេទ្យបង្អែកមិត្តភាពកម្ពុជា-ជប៉ុនខណះត្រូវប្តីកំហូចបត់រថយន្តបុកផ្ទុបទៅនឹងតូបលក់ដូរមួយក្នុងផ្សាររាត្រីពេលដែលតាមទាន់ប្តីកំពុងតែដឹកស្រីស្នេហ៍ដើរលេង។ហេតុការណ៍ដ៏រន្ធត់នេះបានកើតឡើងកាលពីវេលាម៉ោង១៩និង២០នាទីយប់ថ្ងៃទី១៨ខែកុម្ភះឆ្នាំ២០១៦នៅចំនុចបរិវេណខាងកើតផ្សាររាត្រីស្ថិតក្នុងភូមិព្រះពន្លាសង្កាត់ព្រះពន្លាក្រុងសិរីសោភ័ណខេត្តបន្ទាយមានជ័យ។
អ្នកឃេីញហេតុការណ៍បាននិយាយប្រាប់ថា នៅមុនពេលកើតហេតុគេបានឃើញរថយន្តមួយគ្រឿងម៉ាកនីសាន់ណាវ៉ារ៉ាពណ៌ស្កពាក់ស្លាក់លេខភ្នំពេញ2V-6906ដឹកនារីវ័យក្មេងម្នាក់ជិះចូលទៅក្នុងផ្សាររាត្រី ភ្លាមនោះដែរក៏មានស្ត្រីម្នាក់ជិះម៉ូតូសង់មួុយគ្រឿងតាមពីក្រោយ។ក្រោយមកស្ត្រីនោះក៏ដាក់ម៉ូតូចោលហើយរត់តម្រង់ទៅរករថយន្តនោះក្នុងស្ថានភាពខឹងសម្បាយ៉ាងខ្លាំង ។បុរសម្នាក់ដែលកំពុងបើកបររថយន្តពេលឃើញស្ត្រីនោះចុះពីម៉ូតូរត់សំដៅមកក៏បត់រថយន្តទំនងជាចង់បត់គេចស្រាប់តែទៅបុកស្ត្រីនោះផ្ទុបជាមួយតូបលក់បណ្តាលអោយរងរបួសជាទម្ងន់ ហើយក៏ដឹកបញ្ជូនតាមរថយន្តនគរបាលចរាចរណ៍ទៅកាន់មន្ទីរពេទ្យតែអកុសលក៏ស្លាប់តាមផ្លូវទៅហើយ។
យោងតាមសម្តីរបស់មន្ត្រីនគរបាលចរាចរណ៍នៅកន្លែងកើតហេតុបានអោយដឹងថាស្ត្រីដែលត្រូវរថយន្តបុកផ្ទុបនោះមានឈ្មោះ មាស សារី អាយុ៣០ឆ្នាំត្រូវជាប្រពន្ធរបស់ឈ្មោះ សាន ស៊ីម ហៅចក់ អាយុ ៣៨ឆ្នាំ រស់នៅភូមិនិងសង្កាត់ទឹកថ្លាក្រុងសិរីសោភណ័ខេត្តបន្ទាយមានជ័យជាអ្នកបង្ក។
មន្ត្រីនគរបាលបានបញ្ជាក់ថាករណីនេះគឺមកពីប្រពន្ធតាមទាន់ប្តីកំពុងដឹកស្រីស្នេហ៍ដើរលេងហើយប្តីភ័យក៏បត់រថយន្ត ប្រពន្ធឃើញដូច្នេះក៏រត់ពីមុខរថយន្តបំណងទៅទាញទ្វារខាងស្រីស្នេហ៍តែចៃដន្យក៏ត្រូវបុកគៀបជាប់នឹងតូបតែម្តង។ក្រោយកើតហេតុបុរសជាប្តីក៏ស្ទុះចុះមកបីត្រកងប្រពន្ធយំស្រែករាយរាប់ពីកំហុសរបស់ខ្លួនដែលបង្កអោយប្រពន្ធទៅជាបែបនេះ រីឯនារីជាស្រីស្នេហ៍ចុះពីរថយន្តគេចខ្លួនបាត់ស្រមោល៕ដោយ:ឃិន គន្ធា