ខេត្តកំពង់ឆ្នាំង៖ គ្រោះថ្នាក់ចរាចរណ៍គួរអោយរន្ធត់បណ្តាលអោយនារីជិៈកង់ម្នាក់បានបាក់កស្លាប់ភ្លាមៗនៅនឹងកន្លែងកើតហេតុ និងបុរសអ្នកបើកម៉ូតូម្នាក់ទៀតបានស្លាប់ពេលដឹកទៅមន្ទីរពេទ្យខេត្ត និងស្ត្រីជាប្រពន្ធជិៈពីក្រោយម៉ូតូបានរងរបួសធ្ងន់ ដោយសាររថយន្តកាមរីឆ្លាមមួយគ្រឿងបើកបរដោយមន្ត្រីកងរាជអាវុធហត្ថម្នាក់ បើកបុករះកង់និងម៉ូតូពីក្រោយពេញទំហឹងក្នុងទិសដៅស្របគ្នា។ ហេតុការណ៍នេះបានកើតឡើងនៅម៉ោង២និង៣០នាទីរសៀល ថ្ងៃទី២០ ខែ កុម្ភៈ ឆ្នាំ២០១៦ នៅលើផ្លូវជាតិលេខ៥ចន្លោះគីឡូ
ម៉ែត្រលេខ៨៥និង៨៦ នៅមុខស្ថានីយ៍ប្រេងតេលា ក្នុងភូមិព្រៃពួច ឃុំជ្រៃបាក់ ស្រុករលាប្អៀរ ។
លោក សឿង រុន នាយនគរបាលចរាចរណ៍ស្រុករលាប្អៀរបានអោយដឹងថា៖ មុនពេលកើតហេតុ
គេបានឃើញរថយន្តបង្កម៉ាកកាមរីឆ្លាមពណ៌ស្លាបក្អែក ពាក់ស្លាកលេខ កំពង់ស្ពឺ 2A-០០០8 បានបើកបរយ៉ាងលឿន ក្នុងទិសដៅពីត្បូងទៅជើង លុះមកដល់ចំណុចកើតហេតុ រថយន្តបង្កបានបុករះ កង់មួយគ្រឿង និងម៉ូតូមួយគ្រឿង ដែលកំពុងធ្វើដំណើរស្របទិសគ្នាពីខាងក្រោយយ៉ាងពេញទំហឹង បណ្តាលអោយនារីរងគ្រោះកំពុងជិះកង់ឈ្មោះ ហេង សាក់រាជ្យសី អាយុ១៤ឆ្នាំ រស់នៅភូមិព្រៃពួច ឃុំជ្រៃបាក់ ស្រុករលាប្អៀរបាក់កស្លាប់ភ្លាមៗនៅកន្លែងកើតហេតុ។ចំណែកបុរសអ្នកបើកម៉ូតូសង់កូរ៉េ ឈ្មោះ ឆេង ហ៊ួរ អាយុ៦៣ ឆ្នាំ រស់នៅភូមិជ្រោយខ្សាច់ ឃុំចាក់ដាវ ស្រុកខ្សាច់កណ្តាល ខេត្តណ្តាល បានស្លាប់ពេលដឹកដល់មន្ទីរពេទ្យខេត្ត និងស្ត្រីជាប្រពន្ធ ឈ្មោះ អ៊ុយ សុន អាយុ៦៥ឆ្នាំ ជិះពីក្រោយរងរបួសធ្ងន់ ពួកគាត់មានមុខរបរជាអ្នកយកភាស៊ីនៅផ្សារព្រៃខ្មែរ ។
ក្រោយពេលកើតហេតុអ្នកបើកបររថយន្តបង្កបានចុះរត់គេចខ្លួនបាត់ ទុករថយន្តចោលនៅកន្លែងកើតហេតុ ដោយនៅលើរថយន្តសមត្ថកិច្ចពិនិត្យឃើញ មានអាវចំណាំងផ្លាតមួយ និងអាវកងរាជអាវុធហត្ថមួយ ដែលមានប៉ាក់ឈ្មោះ ហ៊ុយ សំផន អត្តលេខ២២៥៧៥៥ ដោយសមត្ថកិច្ចបានសន្និដ្ឋានថាអ្នកបើកបររថយន្តបង្កជាមន្ត្រីអាវុធហត្ថ តែងតែបើកបរល្បាតនៅលើផ្លូវជាតិលេខ៥ជាប្រចាំ ប៉ុន្តែគេមិនទាន់ដឹងថាគេធ្វើការនៅក្នុងអង្គភាពកងរាជអាវុធហត្ថខេត្តណានៅឡើយ។ ចំណែកករណីគ្រោះថ្នាក់ចរាចរណ៍នេះ អាចបង្កឡើងដោយការបើកបរក្នុងភាពងោគងុយ ឬស្រវឹង ពីព្រោះរថយន្តនេះបានបុករះកង់ និងម៉ូតូរបស់ជនរងគ្រោះនៅលើចិញ្ចើមផ្លូវកៀនខាងស្តាំដៃទាំងកំរោលតែម្តង។
សពជនរងគ្រោះទាំង២នាក់ត្រូវបានក្រុមគ្រួសារយកទៅធ្វើបុណ្យតាមប្រពៃណី នៅលំនៅដ្ឋាន ចំណែកស្ត្រីរងរបួសធ្ងន់ធ្ងរបានសំរាកព្យាបាលនៅមន្ទីរពេទ្យខេត្ត។ ដោយឡែកមធ្យោបាយទាំង៣គ្រឿង
មាន កង់ ម៉ូតូ និងរថយន្តបង្ក បានខូតខាតធ្ងន់ធ្ងរដូចគ្នា ត្រូវបានសមត្ថកិច្ចយកទៅរក្សាទុកនៅការិ យាល័យចរាចរណ៏ផ្លូវគោក នៃស្នងការដ្ឋាននគរបាលខេត្ត កសាងសំណុំរឿងតាមនិតិវិធី៕ 
