ភ្នំពេញ ៖ ម៉ូតូ២គ្រឿងបានបុកគ្នាយ៉ាងពេញទំហឹងតែសំណាងល្អដោយជិះម៉ូតូទាំង២គ្រឿង រងរបួសស្រាល កាលពីវេលាម៉ោង១១និង៤០នាទីយប់ថ្ងៃទី១៣ កុម្ភៈ២០១៤ នៅចំណុចមុខព្រះអង្គដងកើ ស្ថិតក្នុងសង្កាត់ជ័យជំនៈខណ្ឌដូនពេញ។ យោងតាមប្រភពព័ត៌មាននៅកន្លែងកើតហេតុបានអោយដឹងថា គេបានឃើញបុរស៣នាក់បានជិះម៉ូតូ ម៉ាកឌ្រីមសង់C125 មួយគ្រឿងពណ៌ខ្មៅ ពាក់ស្លាកលេខ កណ្ដាល 1Q-6280 បានធ្វើដំណើរ តាមបណ្ដាយផ្លូវព្រះស៊ីសុវត្តិ ក្នុងល្បឿនលឿនមកដល់ចំណុចកន្លែងកំពុងមានគ្រោះថ្នាក់
ចរាចរ ហើយមានការកកស្ទះគេមិនព្រមបន្ថយល្បឿនក៏ជ្រុលទៅនិងម៉ូតូស្កូបពីមួយគ្រឿង ពណ៌ប្រផេះ ពាក់ស្លាកលេខ ភ្នំពេញ 1BL-8664 ដែលជិះដោយបុរសម្នាក់កំពុងធ្វើដំណើរបញ្ច្រាស់គ្នាជាមួយ និងម៉ូតូឌ្រីមសង់C125 នោះក៏បណ្ដាលអោយម៉ូតូទាំង២បុកគ្នាយ៉ាងពេញទំហឹង តែសំណាងល្អ ម្ចាស់ម៉ូតូទាំង២គ្រាន់តែរងរបួសស្រាលក៏បានលើកម៉ូតូរបស់ខ្លួនជិះម៉ូតូទៅមុខទៀតព្រោះមិនចង់មានរឿងវែងឆ្ងាយតទៅទៀត។
ហេតុការណ៍នេះបណ្ដាលមកពីបុរស៣នាក់ដែលជិះម៉ូតូឌ្រីមសង់ខាងលើចង់បង្ហាញថាខ្លួនជិះម៉ូតូល្អ ទាល់តែបើកលឿនបែបនេះទើបគេថាឡូយ ក៏ជួបគ្រោះថ្នាក់បែបនេះ សំណាងដែលមិនបណ្ដាលអោយ មានមនុស្សរងរបួសដល់អាយុជីវិតអ្នកដ៏ទៃថែមទៀត៕ 
