ប៉េកាំង៖ វិបត្តិនៅអ៊ុយក្រែនកំពុងកើនឡើងយ៉ាងក្តៅគគុក បន្ទាប់ពីមានការប្រយុទ្ធគ្នាបណ្តាលឲ្យមានមនុស្សស្លាប់ ។វិបត្តិនេះបណ្តាលឲ្យលោកខាងលិច អាមេរិក និងអឺរ៉ុប និងលោកខាងកើត ចិន រុស្ស៊ីត្រូវប្រឈមគ្នា គំរាមគ្នា និងព្រមានគ្នាចុះឡើងៗជាថ្មីបន្ទាប់ពីសង្គ្រាមត្រជាក់។ នេះបើតាមវេបសាយនានាឲ្យដឹងកាលពីថ្ងៃសុក្រនេះ។ ជាញឹកញយអាមេរិកបានព្រមានចិនពីជម្លោះសមុទ្រចិនខាងត្បូងហើយបន្តទៅទស្សនកិច្ចនៅ បណ្តាប្រទេសដែលមានជម្លោះជាមួយចិនដូចជាជប៉ុន វៀតណាម ម៉ាឡេស៊ី និងហ្វីលីពីន។ ដោយឡែកជាមួយរុស្ស៊ី អាមេរិកបានពឹងពាក់សម្ព័ន្ធមិត្តអឺរ៉ុបដើម្បីដាក់ទណ្ឌកម្មលើរុស្ស៊ី អំពីបញ្ហាអ៊ុយក្រែន តែរុស្ស៊ីមិនញញើតហើយបន្តធ្វើតាមផែនការដូចជាគ្រីមា ឬដូណេតស្ក៍ ទោះបីជាអាមេរិក អឺរ៉ុបព្រួតគ្នាដាក់ទណ្ឌកម្មក៏ដោយ។
ទោះបីយ៉ាងណា ពេលនេះ មហាអំណាចសព្វាវុធរុស្ស៊ី និងមហាអំណាចសេដ្ឋកិច្ចទី២លើលោកចិន មិនខ្វល់ខ្វាយឡើយ ហើយបន្តចាប់ដៃគ្នាប្រឆាំងអាមេរិកចំហ ទាក់ទិននឹងវិបត្តិនៅអ៊ុយក្រែននេះ។ តាមគេហទំព័រនានាឲ្យដឹងថា ចិនមិនដែលជឿថាការដាក់ទណ្ឌកម្មសេដ្ឋកិច្ចគឺជាមធ្យោបាយមួយដើម្បីដោះស្រាយបញ្ហានោះទេ ដូច្នេះចិនមានការប្រុងប្រយ័ត្នយ៉ាងខ្លាំងក្នុងការចូលរួមនៅក្នុងប្រភេទដាក់ទណ្ឌកម្មណាមួយប្រឆាំងនឹងប្រទេសរុស្ស៊ីស្ដីអំពីវិបត្តិអ៊ុយក្រែននោះទេ។ តាមអ្នកវិភាគនយោបាយមួយចំនួនឲ្យដឹងថា ចិនជំទាស់ការដាក់ទណ្ឌកម្មប្រឆាំងប្រទេសរុស្ស៊ីស្ដីអំពីវិបត្តិនៅអ៊ុយក្រែន។ នេះគឺជានយោបាយដែលចិនបានប្រកាន់យកមិនផ្លាស់ប្ដូរជាយូរ មកហើយ។
ពួកគេមិនជឿថា ការដាក់ទណ្ឌកម្មគឺជាមធ្យោបាយមួយសម្រាប់ការងារទូតអន្ដរជាតិនោះទេ ។ ពួកគេយល់ថា ការពិភាក្សានិងការចរចាគ្នាគឺជាមធ្យោបាយមួយដើម្បីធ្វើដំណើរទៅមុខ។ ជាក់ស្តែង នៅពេលមានការគំរាម និងគំនាបពីអាមេរិក និងសម្ព័ន្ធមិត្ត គេឃើញចិន និងរុស្ស៊ីពង្រឹងកិច្ចសហប្រតិបត្តិការកាន់តែជិតស្និទ្ធទីភ្នាក់ងារព័ត៌មានចិន ស៊ិនហួ ចេញផ្សាយនៅថ្ងៃពុធ ទី១៤ ខែឧសភា ឆ្នាំ២០១៤ ដោយផ្អែកតាមការផ្សាយ របស់សារព័ត៌មាន ក្នុងស្រុករបស់ប្រទេសរុស្ស៊ីថា នាវាជើង
ទឹក ០៦គ្រឿងរបស់រុស្ស៊ី នឹងត្រូវចូលរួមសមយុទ្ធ «ដែនសមុទ្ររួមគ្នាប្រចាំឆ្នាំ២០១៤» ស្ថិតនៅភាគខាងជើងនៃសមុទ្រចិនខាងកើត។ នាវាជើងទឹកទាំង ០៦គ្រឿងនោះ រួមមាន នាវាល្បាតបំពាក់មីស៊ីល, នាវាប្រឆាំងនឹងនាវាមុជទឹក រួមទាំងនាវាទំនើបៗជាច្រើនគ្រឿងទៀត ដើម្បីពង្រឹងទំនុកចិត្ត និងកិច្ចសហប្រតិបត្តិការគ្នាទៅវិញទៅមក នៃប្រទេស និងកងយោធា
ទាំងពីរ រួមទាំងជំរុញ សមត្ថភាពដោះស្រាយពីការគម្រាមកំហែងមកលើសន្តិសុខដែនសមុទ្រផងដែរ។ គួរបញ្ជាក់ផងដែរថា សមយុទ្ធលើកនេះ ជាសមយុទ្ធលើកទីបីហើយ បន្ទាប់ពីសមយុទ្ធរួមគ្នា កាលពីខែកក្កដា ឆ្នាំ២០១៣ នៅឈូងសមុទ្រភាគខាងកើតប្រទេស រុស្ស៊ី និងនៅសមុទ្រលឿង កាលពីខែមេសា ឆ្នាំ២០១២កន្លងទៅនេះ៕ 5
