ខេត្តឧត្តរមានជ័យ ភ្លៀងលាយឡំខ្យល់កន្ត្រាក់បានបំផ្លាញផ្ទះប្រជាពលរដ្ឋចំនួន ៤៤ខ្នង ក្នុងឃុំព្រះប្រឡាយ ស្រុកត្រពាំងប្រាសាទ ខេត្តឧត្តរមានជ័យ ផ្ទះឈើប្រក់ស័ង្ហសីរបស់ប្រជាពលរដ្ឋចំនួន ៤ខ្នងបានរងការខូចខាតទាំងស្រុង និងផ្ទះចំនួន ៤០ខ្នងទៀត ដែលរងការខូចខាតអស់៥០% ប៉ើងដំបូល របើកជញ្ជាំង
ដោយសាររភ្លៀងធ្លាក់មួយមេលាយឡំនឹងខ្យល់កន្ត្រាក់វាយប្រហារ កាលពីយប់មិញថ្ងៃទី២៤ ខែឧសភា ឆ្នាំ២០១៤ ក្នុងភូមិអូរត្រាំប៉ោងជើង និងភូមិអូរត្រាំប៉ោងត្បូង ឃុំព្រះប្រឡាយ ស្រុកត្រពាំងប្រាសាទ ខេត្តឧត្តរមានជ័យ។ យោងតាមរបាយការណ៍របស់លោក នៅសំ ដារារិទ្ធ អាជ្ញាធរស្រុកត្រពាំងប្រាសាទបានឱ្យដឹងថា គ្រោះមហន្តរាយភ្លៀងលាយឡំខ្យល់កន្ត្រាក់ មិនបានឆាបយកជីវិតមនុស្សណាម្នាក់ឡើយ បើកទោះបីទំហំនៃការខូចខាតដោយខ្យល់បក់រលំផ្ទះប្រជាពលរដ្ឋ
ចំនួន៤ខ្នង បានខ្ទេចទាំងស្រុង និងលំនៅដ្ឋានប្រជាពលរដ្ឋចំនួន ៤០ខ្នង ក៏ទទួលរងការខូចខាតខ្យល់ប៉ើងដំបូល និងរបើកជញ្ជាំង អស់ប្រហែល៥០% នៃតួរផ្ទះនីមួយៗក្តី។ តាមស្ថានភាពរងការវាយប្រហារនៃខ្យល់កន្ត្រាក់លាយឡំនឹងទឹកភ្លៀងដោយពពកខ្មៅ ដែលវាយប្រហារទៅលើផ្ទះប្រជាពលរដ្ឋ កាលនៅវេលាម៉ោង១២ អាធ្រាតុ ថ្ងៃទី២៤ ខែឧសភា ឆ្នាំ២០១៤
ក៏បានបំផ្លាញដំណាំកសិកម្មរបស់ប្រជាពលរដ្ឋអស់មួយចំនួនដូចជា ដើមស្វាយ ដើមចាន់ទី រួមទាំងដើមឈើផ្សេងៗដែលនៅក្បែលំនៅដ្ឋានប្រជាពលរដ្ឋ និងដើមឈើនៅក្នុងព្រៃ ក៏ត្រូវខ្យល់រលំដួល បាក់មែកធ្លាក់មកដីជាច្រើនកន្លែង ហើយក៏មិនបានប៉ះពាល់ដល់សត្វពាហនៈគោក្របីរបស់ប្រជាពលរដ្ឋផងដែរ។ បន្ទាប់ពីឧបទ្ទវហេតុគ្រោះមហន្តរាយភ្លៀងលាយឡំ
នឹងខ្យល់កន្ត្រាក់ នៅព្រឹកថ្ងៃទី២៥ ខែឧសភា ឆ្នាំ២០១៤អាជ្ញាំធរស្រុកត្រពាំងប្រាសាទលោកនៅសំ ដារារិទ្ធ បានដឹកនាំក្រុមការងារចុះទៅត្រួតពិនិត្យដល់ទីតាំងកើតហេតុហើយក៏បានធ្វើការវាយតំលៃផលប៉ះពាល់នៃគ្រោះមហន្តរាយនេះ។