ខេត្តបន្ទាយមានជ័យ៖ ជនសង្ស័យជាចោរប្លន់ចំនួន៣នាក់ ដែលចូលទៅប្លន់អ្នកលក់ឥវ៉ាន់ចាប់ហួយបានទ្រព្យសម្បត្តិ១ចំនួនធំ ហើយរត់គេចបាត់ លុះថ្ងៃទី២៥ ត្រូវបានអាវុធហត្ថខេត្តបន្ទាយមានជ័យ ចាប់ឃាត់ខ្លួនរួចបញ្ជូនទៅតុលាការខេត្តដើម្បីចាត់ការទៅតាមនិតិវិធីច្បាប់ ។ ការចាប់ខ្លួនជនសង្ស័យប្លន់បាន៣នាក់នោះនៅស្រុកម៉ាឡៃ ខេត្តបន្ទាយមានជ័យ ។
លោកឧត្តមសេនីយ៍ត្រី ឱ បូរិន មេបញ្ជាការកងរាជអាវុធហត្ថខេត្តបន្ទាយមានជ័យ បានប្រាប់អ្នកយកព័ត៌មានឲ្យដឹងថា៖ ជនសង្ស័យជាចោរប្លន់ដែលត្រូវកម្លាំងអាវុធហត្ថចាប់ឃាត់ខ្លួនបានមានឈ្មោះ ១.ឈ្មោះ មុំ ខ្លឹង ភេទប្រុស អាយុ២៤ឆ្នាំ មុខរបរមិនពិតប្រាកដ ២.ឈ្មោះ កយ ពៅ ប្រុសអាយុ២៤ឆ្នាំ ៣.ឈ្មោះ ឆ្លាម នឿន ភេទប្រុស អាយុ៤២ឆ្នាំ អ្នកទាំង៣រស់នៅភូមិអូរអំពិល ឃុំពង្រ ស្រុកម៉ាឡៃ ខេត្តបន្ទាយមានជ័យ ។
លោក ឱ បូរិន បាននិយាយបន្តថា៖ រយៈពេលកន្លងមកជិត១ខែនោះ មុនពេលកើតហេតុជនសង្ស័យទាំង៣នាក់នោះ បានចូលទៅប្លន់ម្ចាស់លក់ឥវ៉ាន់ចាប់ហួយនៅភូមិអូរអំពិល ឃុំពង្រ ស្រុកម៉ាឡៃ ខេត្តបន្ទាយមានជ័យ ចំណែកម្ចាស់ផ្ទះមានឈ្មោះ សន សុធារិទ្ធិ ភេទប្រុស អាយុ៣២ឆ្នាំ ត្រូវបានចោរវាយដំយ៉ាងខ្លាំងត្រូវដៃខាងឆ្វេងនិងខ្នង ចំណែកប្រពន្ធ
មានឈ្មោះ អៃ អាង អាយុ៣៤ឆ្នាំរងរបួសថ្ងាស និងដើមដៃឆ្វេងនៅយប់ថ្ងៃទី៤ ខែឧសភា ឆ្នាំ២០១៤កន្លងមកនេះ ចំណែកទ្រព្យសម្បត្តិត្រូវចោរយកបានអស់១ចំនួនធំដូចជា លុយខ្មែរចំនួន៥៨ម៉ឺនរៀល ប្រាក់បាត៣.០០០បាត និងឥវ៉ាន់១ចំនួនទៀត ក្រោយពេលធ្វើសកម្មភាពប្លន់ទ្រព្យសម្បត្តិបានហើយ ចោរទាំង៣នាក់នោះធ្វើការគេចខ្លួនបាត់ក្នុងថ្ងៃនោះហើយម្ចាស់ផ្ទះក៏ទៅប្ដឹងអាវុធហត្ថផងដែរ ។
លុះថ្ងៃទី២៤ ខែឧសភា ឆ្នាំ២០១៤នោះ ម្ចាស់ផ្ទះបានឃើញជនល្មើសនៅស្រុកម៉ាឡៃ ក៏បានរាយការណ៍ទៅអាវុធហត្ថដោយមានការឯកភាពពី ព្រះរាជអាជ្ញារងអមសាលាដំបូងខេត្ត ផាន់ ភិរម្យ ក៏បានចុះធ្វើការព័ទ្ធចាប់ជនសង្ស័យជាចោរប្លន់បានចំនួន៣នាក់នៅកន្លែងតែម្ដង ពេលនោះអាវុធហត្ថស្រុកម៉ាឡៃក៏បានបញ្ជូនជនសង្ស័យចោរប្លន់ទាំង៣នាក់នោះ មកទីបញ្ជាការកងរាជអាវុធហត្ថ ដើម្បីធ្វើការសាកសួរ ។
លុះថ្ងៃទី២៦ ខែឧសភា ឆ្នាំ២០១៤នោះ កម្លាំងអាវុធហត្ថខេត្តបន្ទាយមានជ័យក៏បានកសាងសំណុំរឿងជនចោរប្លន់ទាំង៣នាក់នោះបញ្ជូនទៅសាលាដំបូងខេត្តបន្ទាយមានជ័យដើម្បីចាត់ការទៅតាមនិតិវិធីច្បាប់ ៕
