ភ្នំពេញ ៖ លោកស្រីម៉ែន សំអន ឧបនាយករដ្ឋមន្ដ្រី រដ្ឋមន្ដ្រីក្រសួងទំនាក់ទំនង ជាមួយរដ្ឋសភា ព្រឹទ្ធសភា និងអធិការកិច្ច តំណាងសម្ដេចអគ្គមហាសេនាបតីតេជោហ៊ុន សែនបានបញ្ជាក់ថា៖ នៅថ្ងៃទី១ ខែមិថុនា ជាថ្ងៃប្រារព្ធទិវាសាមគ្គីភាព អន្តរជាតិរបស់កុមារ ដែលសកលលោក បានប្រារព្ធពិធីនេះឡើង ក្នុងគោលបំណងបំផុសស្មារតីមនុស្សជាតិ គ្រប់ពណ៌សម្បុរ ឲ្យយកចិត្តទុកដាក់ ចំពោះសុខុមាលភាព សុវត្ថិភាពរបស់កុមារ ហើយក៏ជាថ្ងៃរំលឹកឡើងវិញ នូវព្រឹត្តិការណ៍ដ៏សាហាវ យង់ឃ្នងព្រៃផ្សៃ របស់ហ្វាស៊ីសអ៊ីត្លែរមកលើប្រជាជាតិ និងកុមារនៅភូមិលីឌីស៊ែរ នៅសាធារណរដ្ឋសហព័ន្ធឆែក និងស្លូវ៉ាគី និងនៅភូមិអ៊ូរ៉ាឌូ ប្រទេសបារាំង ពិសេសនៅកម្ពុជាក្នុង របបប្រល័យពូជសាសន៍ប៉ុលពត បានប្រព្រឹត្តឧក្រិដ្ឋកម្ម ដែលមានចរិត សាហារឃោរឃៅព្រៃផ្សៃ មកលើប្រជាជន កុមារ កម្ពុជាខ្លួនឯង និងជាទិវារំលឹក នូវគោលការណ៍ទាំង១០ នៃអនុសញ្ញា អន្តរជាតិ ស្តីពីសិទិ្ធរបស់កុមារ ដែលព្រះរាជាណាចក្រកម្ពុជា ផ្តល់សច្ចាប័ន កាលពីថ្ងៃទី១៥ ខែតុលា ឆ្នាំ១៩៩២ ។
ពិធីនេះប្រារព្ធធ្វើឡើងកាលពីព្រឹកថ្ងៃទី០១ ខែមិថុនា ឆ្នាំ២០១៤ នៅមជ្ឈមណ្ឌលកោះពេជ្រ ដោយមានការចូលរួមពី សិស្សានុសិស្ស កុមារមកពីអង្គការជាតិ និងអន្ដរជាតិ ប្រមាណជាង២០០០នាក់ផងដែរ ។ លោក ស្រីម៉ែន សំអន បានលើកឡើងថា នេះជាការឆ្លុះបញ្ចាំង ពីការយកចិត្តទុកដាក់រាជរដ្ឋាភិបាល ក្នុងការថែរក្សា និងការពារសិទ្ធិកុមារ ដើម្បីឲ្យមានការរៀនសូត្រ ទទួល បាននូវចំណេះដឹងគោរព និងអនុវត្តតែអំពើល្អ ចៀសវាងនូវអំពើអ្វី ដែលខុសឆ្គងនាំឲ្យប៉ះពាល់ដល់សណ្តាប់ធ្នាប់សង្គម ក្នុងសាលារៀនក៏ដូចក្នុងភូមិ ស្រុកដែលយើងរស់នៅ។ ជាងនេះទៅទៀត ក្មួយៗសិស្សានុសិស្ស មិនត្រូវបង្កការលំបាកដល់ គ្រួសារ ឪពុកម្តាយ ដែលលោកបានផ្តល់លទ្ធភាព ដល់ក្មួយៗរៀនសូត្រ ដើម្បី អនាគតភ្លឺស្វាង ជាយុវវ័យល្អ ជាទំពាំងល្អ ក្នុងសង្គមជាតិ ។
ឆ្លៀតក្នុងឱកាសនោះដែរលោកនាយករង ហៀង សុខេង បានដាស់តឿនដល់ក្មួយៗ សិស្សានុសិស្ស ឲ្យឆ្ងាយពីគ្រឿងញៀន បើស្រឡាញ់ខ្លួន ស្រឡាញ់ឪពុកម្តាយ ត្រូវចេះ ទទួលខុសត្រូវសម្រាប់ខ្លួនឯង និងមិត្តភក្តិ ត្រូវចេះណែនាំ អំពីគ្រោះថ្នាក់នៃគ្រឿងញៀន។
លោកស្រីបន្តថា ចូរក្មួយៗគោរពប្រតិបត្តិច្បាប់ចរាចរណ៍ ឲ្យបានខ្ជាប់ខ្ជួន ដោយត្រូវចេះយោគយល់ និងអធ្យាស្រ័យឲ្យគ្នា ដើម្បីធានាសុវត្ថិភាពផ្ទាល់ខ្លួន និងអ្នកដទៃ ក៏ដូចរក្សាសេចក្តី ថ្លៃថ្នូរសម្រាប់សង្គមជាតិយើងផងដែរ។ ជាមួយគ្នានេះ លោកនាយករង បានផ្តាំផ្ញើឲ្យក្មួយៗ សិស្សានុសិស្ស ត្រូវយកចិត្ត ទុកដាក់រៀនសូត្រឲ្យក្លាយទៅជាសិស្សពូកែ ដើម្បីប្រឡង ប្រណាំងជាមួយសិស្ស សាលាផ្សេង ទៀត និងផ្ដល់ រង្វាន់លើកទឹកចិត្តដល់សិស្សានុសិស្សណាដែល រៀនជាប់ចំណាត់ថ្នាក់ល្អ ។
លោកបានថ្លែងថា គ្រោះអវិជ្ជា គឺជាការគំរាមកំហែង ដល់ស្ថានភាពសេដ្ឋកិច្ចគ្រួសារ ដូច្នេះដើម្បីជៀសវាងបញ្ហា នេះសិស្សទាំងអស់ត្រូវរៀន ឲ្យបានជ្រៅជ្រះ សម្រាប់អនាគត ហើយវាក៏នឹងជួយលប់បំបាត់ភាពក្រីក្រ ផងដែរ ។
លោកវង សូត រដ្ឋមន្ដ្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងជាប្រធានក្រុមប្រឹក្សាជាតិកម្ពុជា ដើម្បីកុមារ បានបញ្ជាក់ថា៖ ផ្អែលើទស្សនៈក្នុងការការពារ និងលើកកម្ពស់សិទ្ធកុមារ កម្ពុជាបានផ្ដល់សច្ចាប័នលើអនុសញ្ញាជាច្រើនរួមមាន អនុសញ្ញា ស្ដីពីសិទ្ធិកុមារ អនុសញ្ញាលេខ១៣៨ ស្ដីពីការហាមប្រាម និងសកម្មភាពបន្ទាន់ សម្រាប់ការ លុបបំបាត់ទម្រង់ធ្ងន់ធ្ងរ នៃពលកម្មកុមារ អនុសញ្ញាក្រុងឡាអេ ស្ដីការការពារ និងពិធីសារ បន្ថែម ស្ដីពីការចូលរួមរបស់កុមារក្នុងជម្លោះប្រដាប់អាវុធ និងការជួញដូរកុមារ ការធ្វើពេស្យាកម្មកុមារ និងរូបភាពអាសអាភាសលើកុមារជាដើម ។
លោកបន្ដថា៖ រាជរដ្ឋាភិបាលកម្ពុជា បានគិតគូរ ផ្ដល់នូវក្ដីអាណិតស្រលាញ់ សណ្ដោសប្រណី ចំពោះកុមារគ្រប់ស្រទាប់ទាំងអស់ ជាពិសេស បានជម្រុញការលុបបំបាត់ ទម្រង់ធ្ងន់ធ្ងរ នៃពលកម្មកុមារ ដោយ ផ្អែកលើគោលការណ៍ចម្បង៣ចំណុចសំខាន់ គឺ ១កាដកហូតកុមារពីទម្រង់ធ្ងន់ធ្ងរ ពលកម្មកុមារ ២កិច្ចសហការជាមួយសង្គមស៊ីវិល និងការប្រយុទ្ធប្រឆាំងការជួញដូរស្ដ្រី និងកុមារ ៣លើកកម្ពស់ការងារសមរម្យ និងសុវត្ថិភាពការងារកុមារ ៕ ដោយ៖ សំរិត
