ភ្នំពេញ ៖ រថយន្តឡង់គ្រីស័រមួយគ្រឿងបានរងការខូចខាតមួយកំណាត់មុខស្ទើរទាំងស្រុង ដោយសារតែអ្នកបើកបរស្រវឹងធ្លាក់ភ្នែក បានបើករថយន្តក្នុងល្បឿនលឿន ខណៈមកដល់ផ្លូវ កោងរថយន្តមិនបានបន្ថយល្បឿននោះទេ ក៏ជ្រុលទៅបុករបងថ្មផ្ទះប្រជាពលរដ្ឋបណ្ដាល អោយរងការខូចខាត ដែលហេតុការណ៍នេះបានកើតឡើងកាលពីវេលាម៉ោង២និង២០នាទី រំលងអាធ្រាត្រឈានចូលថ្ងៃទី៣ខែមិថុនាឆ្នាំ២០១៤ ត្រង់ចំណុចមុខវិហារចាម តាមបណ្ដោយផ្លូវ លេខ៣៦៩ ស្ថិតក្នុងសង្កាត់ព្រែកប្រា ខណ្ឌមានជ័យ។
ប្រភពព័តមានពីកន្លែងកើតហេតុបានអោយដឹងថា នៅមុនពេលកើតហេតុមានរថយន្តមួយគ្រឿង ម៉ាកតូយ៉ូតា ឡង់គ្រីស័រ ស៊េរីទំនើបពណ៌ខ្មៅ ពាក់ស្លាកលេខ ភ្នំពេញ 2P-7919 បើកបរ ដោយបុរសម្នាក់ក្នុងស្ថានភាពស្រវឹង បានធ្វើដំណើរតាមបណ្ដោយផ្លូវលេខ៣៦៩ ទិសដៅ ពីជើងទៅត្បូងក្នុងល្បឿនលឿន ខណៈមកដល់ចំណុចកើតហេតុមុខវិហារចាម ជាផ្លូវកោង រថយន្តបង្ក
មិនបានបន្ថយល្បឿននោះទេ ទើបបង្កអោយរថយន្តជ្រុលចង្កូតទៅបុកនិងរបងថ្មផ្ទះ ប្រជាពលរដ្ឋបណ្ដាលអោយរងការខូចខាត ចំណែករថយន្តបង្កខ្ទេចមួយកំណាត់មុខស្ទើរទាំងស្រុង។ បន្ទាប់ពីកើតហេតុសមត្ថកិច្ចមូលដ្ឋានបានចុះមកត្រួតពិនិត្យ ហើយភាគីម្ចាស់រថយន្ត យល់ព្រម ចេញថ្លៃខូចខាតរបងថ្ម ដល់ម្ចាស់ផ្ទះដើម្បីបញ្ជប់រឿង៕
