ភ្នំពេញ៖ តំណាងជាន់ខ្ពស់ នៃរាជរដ្ឋាភិបាលអំពាវនាវដល់សមាជិកក្រុមប្រឹក្សារាជធានី ខេត្ត ស្រុក ខណ្ឌ ទាំងអស់ដែលទើបចូលកាន់តំណែងនោះ ទោះបីមកពីគណៈបក្សនយោបាយ ណាក៏ដោយត្រូវខិតខំយកចិត្តទុកដាក់ចំពោះសុខទុក្ខរបស់ប្រជាពលរដ្ឋជាប្រចាំ ពិសេសការផ្តល់សេវាសាធារៈតាមរយៈរដ្ឋបាលនានាជូនពួកគាត់ឲ្យកាន់តែប្រសើរជាងមុន ប្រកបដោយតម្លាភាព និងគ្មានអំពើពុករលួយ។
លោក កិត្តិសេដ្ឋាបណ្ឌិត គាត ឈន់ ឧបនាយករដ្ឋមន្ត្រីប្រចាំការ បានមានប្រសាសន៏លើកឡើងនៅក្នុងពិធីប្រកាសចូលកាន់តំណែងក្រុមប្រឹក្សារាជធានីភ្នំពេញអណត្តិទី២ កាលពីព្រឹកថ្ងៃទី៥ ខែមិថុនានៅសាលារាចធានីភ្នំពេញនេះថា៖ ក្នុងនាមសមាជិកក្រុមប្រឹក្សា ដែលជាប់ឆ្នោតទាំងអស់ ទោះមានសមាសភាពមកពីគណៈបក្សនយោបាយផ្សេងៗគ្នាក៏ដោយ ក៏ត្រូវខិតខំបំរើផលប្រយោជន៍និងសេចក្តីត្រូវការរបស់ប្រជាពលរដ្ឋទាំងអស់ ដោយស្មើភាព ហើយមិនត្រូវប្រកាន់និន្នាការនយោបាយរើសអើងនោះឡើយ។
លោកឧបនាយករដ្ឋមន្ត្រីប្រចាំការបានបញ្ជាក់ថា ការអំពាវនាវដូច្នេះ ក្នុងគោលបំណងដើម្បីឲ្យសមាជិកក្រុមប្រឹក្សាទាំងនោះ បានអនុវត្តស្របតាមផ្លូវច្បាប់ ព្រោះអស់លោកជាអ្នតំណាងឲ្យប្រជាពលរដ្ឋ ដែលមានភារៈកិច្ចសំខាន់ ត្រូវធ្វើយ៉ាងណាឲ្យប្រជាពលរដ្ឋក្នុងមូលដ្ឋានខ្លួនធានាបានការរស់នៅកាន់តែប្រសើរទាំងជីវភាព សន្តិសុខ និងសណ្តាប់ធ្នាប់។លោកបន្តថា ចាប់ពីពេលនេះទៅ ការផ្តល់សេវារដ្ឋបាលនានាជូនប្រជាពលរដ្ឋ ត្រូវពង្រឹងគុណភាព និងមានតម្លាភាព ជួយទប់ស្កាត់ឲ្យបានរាល់អំពើពុករលួយគ្រប់រូបភាព ដែលនេះជាយន្តការមួយជួយជំរុញដល់ ការកាត់បន្ថយភាពក្រីក្រនិងការអភិវឌ្ឍកម្ពុជាកាន់តែរីកចំរើនទៅមុខ ពិសេសគ្មានភាពថ្នាំងថ្នាក់ រវាងប្រជាពលរដ្ឋ ដែលម្ចាស់ឆ្នោត។
លោក ម៉ប់ សារិន ប្រធានក្រុមប្រឹក្សារាជធានីភ្នំពេញបានប្តេជ្ញានឹងខិតខំពង្រឹងឲ្យបាននូវសាមគ្គីភាព ដោយមិនប្រកាន់និន្នាការនយោបាយ សំដៅឲ្យរាល់ការដោះស្រាយនានាជូនប្រជាពលរដ្ឋប្រកប ដោយប្រសិទ្ធិភាពខ្ពស់។ លោកបញ្ជាក់ថា ក្នុងកិច្ចការជាអាទិភាពសម្រាប់អនុវត្តនៅរាជធានីភ្នំ ពេញនេះ នឹងផ្តោតជាសំខាន់លើការអភិវឌ្ឍហេដ្ឋារចនាសម្ពន្ធ័ប្រកបដោយគុណភាព ធានាឲ្យបាន នូវសន្តិសុខសណ្តាប់ធ្នាប់ និងសុវត្ថិភាពជូនប្រជាពលរដ្ឋ រួមជាមួយនឹងការកាត់បន្ថយភាពក្រីក្រ របស់ប្រជាពលរដ្ឋជាដើម។
សូមបញ្ជាក់ថា ផ្អែកតាមលទ្ធផលជាផ្លូវការដែលប្រកាសដោយគណៈកម្មាធិការជាតិរៀបចំការបោះ ឆ្នោតកាលពីថ្ងៃទី២៧ ខែឧសភាថ្មីៗនេះ ចំនួនក្រុមប្រឹក្សា រាជធានី ខេត្ត ក្រុង ស្រុក ខណ្ឌអណត្តិទី២ នេះមាន៣៣២៤រូប ក្នុងនោះក្រុមប្រឹក្សារាជធានីខេត្តមានចំនួន៣៩៣រូប និងក្រុមប្រឹក្សាក្រុងស្រុកខណ្ឌ មានចំនួន២៩៣១រូប។
ដោយឡែកសម្រាប់រាជធានីភ្នំពេញ មានគណៈបក្ស២ដែលទទួលបានអសន ក្នុងក្រុមប្រឹក្សារាជធានី ខណ្ឌ ជាលទ្ធផលក្រុមប្រឹក្សារាជធានីគណៈបក្សប្រជាជនកម្ពុជាទទួលបាន សម្លេងគាំទ្រ៥៧១សម្លេង គណៈបក្សសង្គ្រោះជាតិទទួលបាន២៣៧សម្លេង ចំណែកលទ្ធផលក្រុម ប្រឹក្សាខណ្ឌគណៈបក្សប្រជាជនកម្ពុជាទទួលបានសម្លេងគាំទ្រ៥៧១សម្លេង និងគណៈបក្សសង្គ្រោះជាតិទទួលបាន២៣៦សម្លេង ក្នុងអង្គបោះឆ្នោតដែលជាសមាជិកក្រុមប្រឹក្សាសង្កាត់ក្នុងអណត្តិសរុបចំនួន៨១០នាក់៕ ដោយ៖ សំរិត
