ខេត្តកំពត. ថ្ងៃទី០៧ ខែកុម្ភៈឆ្នាំ២០១៧
នៅសាលប្រជុំសាលាខេត្ត មានបើកធ្វើអង្គសិក្ខាសាលាស្ដីពី ការផ្សព្វផ្សាយ លទ្ធផលនៃការគណនា ផលិតផលក្នុងស្រុកសរុប(GDP) របស់ខេត្តកំពត
ដែល បានរៀបចំឡើង ដោយក្រុមការងារនៃមន្ទីរ និងក្រសួងផែនការ។
លោក ជីង-ផល្លា អភិបាលរងនៃគណៈអភិបាលខេត្ត បានមានរបាយការណ៍ បញ្ជាក់ថា៖ នៅក្នុងរយៈពេលប៉ុន្មានឆ្នាំចុងក្រោយនេះ ប្រទេសជាតិមានសុខសន្តិភាព ក្រោមការដឹកនាំរបស់សម្ដេច តេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជា ការអភិវឌ្ឍប្រទេសជាតិមានការរីកចំរើនលើគ្រប់វិស័យឥតឈប់ឈរ ពីមួយឆ្នាំទៅមួយឆ្នាំ បានកែប្រែជីវភាព រស់នៅរបស់ប្រជាពលរដ្ឋមានភាពល្អប្រសើរជាលំដាប់។ ដោយឡែកជាក់ស្ដែងសម្រាប់ខេត្តកំពត តាមរយៈការអនុវត្តកម្មវិធីអត្តសញ្ញាណកម្មគ្រួសារក្រីក្រឆ្នាំ២០១៤ បានបង្ហាញថា អត្រាភាពក្រីក្រក្នុងខេត្ត បានធ្លាក់ចុះ នៅត្រឹម ១៤.៤% មានកម្រិតទាបជាងឆ្នាំ២០១១ ដែលមានអត្រាភាពក្រីក្រ១៥.៦%។ ទន្ទឹមនោះ តាមរយៈលទ្ធផល នៃ ការគណនា ផលិតផលក្នុងស្រុកសរុប(GDP)របស់ខេត្ត ដែលបានចងក្រងដោយនាយកដ្ឋានគណនេយ្យជាតិ វិទ្យាស្ថានជាតិ ស្ថិតិ នៃក្រសួងផែនការ បានបង្ហាញអោយឃើញថាមានអត្រាសេដ្ឋកិច្ចកំណើនជារៀងរាល់ឆ្នាំ(៦.៦% នៅឆ្នាំ២០១៥ធៀបឆ្នាំ២០១៤) ហើយចំណូលជាមធ្យមក្នុងប្រជាជនម្នាក់ស្មើ ១,១២២ដុល្លារ ក្នុងឆ្នាំ២០១៥ និង១,០៣៧.៤ដុល្លានៅឆ្នាំ២០១៤។
ឯ-ឧ រិន-វិរៈរដ្ឋលេខាធិការ ក្រសួងផែនការ បានមានប្រសាសន៍កោតសរសើរចំពោះអាជ្ញាធរខេត្តនិងមន្ទីរពាក់ព័ន្ធដែលបានសហការគ្នាល្អនិង វាយតម្លៃខ្ពស់ចំពោះទិន្នន័យចងក្រងគណនេយ្យជាតិខេត្តកំពត ហើយត្រូវបានប្រកាសផ្សព្វផ្សាយលទ្ធជាផលជាផ្លូវការនាពេលនេះ គឺជាការបង្ហាញថា ខេត្តកំពតមានការសម្រេចបានក្នុងការគ្រប់គ្រងសេដ្ឋកិច្ចខេត្តដោយរក្សាបានអត្រាកំណើនផ្អែកលើសក្ដានុពលសេដ្ឋកិច្ចចម្បងៗចំនួន៣ គឺវិស័យកសិកម្ម ឧស្សាហកម្ម និង សេវាកម្ម។ ឯកឧត្ដម រិន-វិរៈក៏បានគូសបញ្ជាក់ថា៖ រាជរដ្ឋាភិបាលកម្ពុជា ក្នុង រយៈពេល១០ឆ្នាំកន្លងមកនេះ សេដ្ឋកិច្ចជាតិកម្ពុជា មានកំណើនជាមធ្យម៧,៧% ដែលជាកំណើនខ្ពស់ក្នុងបណ្ដាប្រទេសក្នុងតំបន់ ហើយត្រូវបានដៃគូរអភិវឌ្ឍន៍កោតសរសើរ។ ហើយទន្ទឹមនឹងការទទួលបានជោគជ័យក្នុងការរក្សាកំណើនសេដ្ឋកិច្ចថ្នាក់ជាតិនេះគឺមិនអាចកាត់ផ្ដាច់ពីការខិតខំប្រឹងប្រែងរបស់ខេត្ត ពិសេសខេត្តកំពតដែលមានសក្ដានុពលសេដ្ឋកិច្ចសំខាន់ៗ ដែលជាចលករជំរុញកំណើនសេដ្ឋកិច្ចជាតិកម្ពុជា ហើយទៅពេលបណ្ដាឆ្នាំខាងមុខ សង្ឃឹមថានឹងសម្រេចបានជោគជ័យធំៗបន្ថែមទៀត តាមរយៈ ការលើកម្ពស់គុណភាពការងារចងក្រងផលិតផលក្នុងស្រុកសរុប GDP ដើម្បីជាប្រយោជន៍សម្រាប់ទាក់ទាញ ដល់ស្ថាប័នរដ្ឋ និងវិស័យឯកជនយកទៅ ប្រើប្រាស់និន្នន័យក្នុងការគ្រប់គ្រងម៉ាក្រូសេដ្ឋកិច្ចខេត្តឲ្យមានស្ថេរភាព ក៏ដូចជាការអភិវឌ្ឍខេត្ត និងបន្តកំណើនសេដ្ឋកិច្ចខេត្តទាំងមូល។
សូមបញ្ជាក់ថា ផ្អែកតាមលទ្ធផលទិន្នន័យ GDP ឆ្នាំ២០១៥ខេត្តកំពតមានសក្ដានុពលកសិកម្មជាចម្បង និងសេវាកម្មជាសំខាន់ ដោយសមាមាត្រចូលរួម នៃវិស័យកសិកម្មក្នុងGDPមាន៦៣,៣% វិស័យសេវាកម្មមាន៣២%និងវិស័យឧស្សាហកម្មមាន៤,៧%។