បន្ទាយមានជ័យ៖ ស្នងការនគរបាល ខេត្តបន្ទាយមានជ័យ លោកឧត្តមសេនីយ៍ត្រី អាត់ ខែម នៅព្រឹកថ្ងៃទី៨ ខែមិថុនា ឆ្នាំ២០១៤នេះ បានអញ្ជើញចូលរួមក្នុងកម្មពិធី ចែកអត្តសញ្ញាណប័ណ្ណ ជូនប្រជាពលរដ្ឋ នៅសង្កាត់ ប៉ោយប៉ែត និងសង្កាត់ផ្សារកណ្តាលក្រុងប៉ោយប៉ែត ក្រោយពី
អត្តសញ្ញាណប័ណ្ណទាំងនោះត្រូវបានធ្វើរួចរាល់ ជាស្ថាពរ។
នៅក្នុងពិធីនេះ ក៏មានការអញ្ជើញចូលរួមថ្នាក់ដឹកនាំក្រុងប៉ោយប៉ែត អធិការនគរបាលក្រុងប៉ោយប៉ែត លោក អ៊ុំ សុផល និងមន្ត្រីនគរបាលពាក់ព័ន្ធមួយចំនួនទៀត ។
លោក អ៊ុំ សុផល បានរាយការណ៍ និងលើកឡើងនូវលទ្ធផលការងារជាច្រើន ដែលអធិការដ្ឋាននគរបាលក្រុង ប៉ោយប៉ែត បានសម្រេចនាពេលកន្លងទៅ ជាពិសេស ការបង្ក្រាបបទល្មើសនានា ដែលកើតមានឡើង នៅក្នុង ក្រុង ក្នុងនោះលោកបានលើកឡើងនូវការរៀបចំវេទិការសាធារណ: ភូមិ ឃុំ មានសុវត្ថិភាព ជាបន្តបន្ទាប់ តាម រយ:ការអញ្ជើញឲ្យប្រជាពលរដ្ឋ បានចូលរួម និងលើកឡើងនូវបញ្ហានានា ដែលពួកគាត់ បាន និងកំពុងជួបប្រទះ ។
នៅក្នុងឱកាសខាងលើនេះ លោកឧត្តមសេនីយ៍ អាត់ ខែម បានមានប្រសាសន៍ថា ក្រោយពីបងប្អូន បានអញ្ជើញ ទៅថតរូបរួចមក ឥឡូវនេះបងប្អូន បានទទួលអត្តសញ្ញាណប័ណ្ណហើយ ដើម្បីយកទៅប្រើប្រាស់ជាផ្លូវការ ក្នុង ការងារប្រចាំថ្ងៃ ដែលត្រូវការប្រើអត្តសញ្ញាណប័ណ្ណ ។ លោកបានអំពាវនាវឲ្យប្រជាពលរដ្ឋ ដែលបានមក ទទួលអត្តសញ្ញាណប័ណ្ណទាំងអស់ ត្រូវថែរក្សាឲ្យបានល្អ និងគង់វង្ស ហើយបើបាត់ ឬខូចខាត ត្រូវរាយការណ៍ ជូនអាជ្ញាធរ និងមន្ត្រីនគរបាលមូលដ្ឋាន ដើម្បីរៀបចំធ្វើឡើងវិញ ។
លោកស្នងការបាន ផ្តាំផ្ញើឲ្យប្រជាពលរដ្ឋ ដែលមានអាយុចាប់ពី១៥ឆ្នាំឡើងទៅ ហើយមិនទាន់មាន អត្តសញ្ញាណប័ណ្ណ ត្រូវមកចូលរួមធ្វើបានគ្រប់ៗគ្នា ខណ:មន្ត្រីនគរបាលតាមមូលដ្ឋាន រៀបចំការថតរូប ដើម្បីធ្វើអត្តសញ្ញាណប័ណ្ណ ជាប្រចាំនោះ។
ជាមួយគ្នានេះលោកស្នងការ បានពន្យល់ទៅកាន់ប្រជាពលរដ្ឋ នូវអនុក្រិតថ្មីរបស់ប្រមុខរាជរដ្ឋាភិបាល ចំពោះ ការគិតលុយពីការធ្វើអត្តសញ្ញាណប័ណ្ណចំនួន១០០០០ ម៉ឺនរៀល ក្នុងម្នាក់ៗ ពីព្រោះត្រូវចំណាយសម្រាប់ សេវាពលកម្មផ្សេងៗ របស់មន្ត្រីនគរបាលដែលចុះធ្វើ ។
យ៉ាងណាក៏ដោយ ស្នងការនគរបាលខេត្តលោក អាត់ ខែម បានព្រមានចំពោះភាពមិនប្រក្រតីណាមួយ ដែល អាចកើតឡើង ដូចជាករណីយកលុយពីប្រជាពលរដ្ឋ ដែលចូលរួមធ្វើ ហួសពីអ្វីដែលរាជរដ្ឋាភិបាលបានកំណត់៕
