ខេត្តប៉ៃលិន ៖ សមត្ថកិច្ចព្រហ្មទណ្ឌកម្រិតធ្ងន់ សហការជាមួយកម្រិតស្រាល ចាប់បានក្រុមលេងចតុរង្គ(អុក) ចំនួនពីរក្រុម ដោយមួយក្រុមជាភាគីថៃម្នាក់ និងមួយក្រុមទៀតជាភាគីខ្មែរម្នាក់ ព្រមទាំងបក្ខពួកមួយចំនួន និងរឹបអូសបានប្រាក់ប្រហែល៦០ម៉ឺនបាត (ប្រាក់ថៃ) ។ការចាប់
ឃាត់ខ្លួនអ្នកលេងទាំងពីរក្រុមនេះ បានកើតឡើងនៅវេលាម៉ោងប្រហែល២រសៀលថ្ងៃទី៧ ខែមិថុនា ២០១៤ ស្ថិតនៅចំណុចហាងកាហ្វេ ម្ចាស់ផ្ទះ ឈ្មោះ ឡាយ ឃៀង ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
អ្នកលេងអុកដែលសមត្ថកិច្ចឃាត់ខ្លួនបានទី១ ឈ្មោះ វ័យ រ៉ា ភេទប្រុស អាយុប្រហែល៤២ឆ្នាំ ដែលត្រូវបានគេស្គាល់ថា ជាស្តេចលេងអុកលេខ១ប្រចាំស្រុកខ្មែរ មានទីលំនៅភ្នំពេញ និងបក្ខពួកប្រហែល១០នាក់ទៀត ,ទី២. ឈ្មោះ ប៊ុន សឿប ភេទប្រុស អាយុប្រហែល៥៧ឆ្នាំ ជាជនជាតិថៃ រស់នៅខេត្តចាន់បូរី ប្រ ទេសថៃ ជាស្តេចអុកប្រចាំប្រទេសថៃ និងបក្ខពួកម្នាក់ទៀត ។
ប្រភពព័ត៌មានពីសាក្សីនៅកន្លែងកើតហេតុបានឱ្យដឹងថា ក្រុមលេងចតុរង្គ(អុក) ភ្នាល់គ្នាដាក់ប្រាក់ ភាគីថៃ និងខ្មែរនេះ បានមកលេងអុកនៅភូមិផ្សារព្រំជាច្រើនលើកមកហើយ ដោយភាគីម្ខាងមកពីរាជធានីភ្នំពេញ មានបក្ខពួករថយន្តពីរគ្រឿង មានគ្នាជាង១០នាក់ ។ ចំណែកភាគីម្ខាងទៀតជាជនជាតិថៃមានគ្នាជាង១០នាក់ ហើយនៅពេលចុងក្រោយនេះ ពួកគេមកលេងនៅភូមិកើតហេតុខាងលើ បានទើបតែរយៈពេល១ថ្ងៃប៉ុណ្ណោះ ។ ប្រភពដដែលបានឱ្យដឹងទៀតថា ខណៈ លេង ភាគីថៃស្មើនឹងភាគីខ្មែរពីរក្តារ ដាក់ប្រាក់២សែនបាត ក្តារទីបីខ្មែរចាញ់ថៃ១ក្តារអស់ ប្រាក់២សែនបាត លុះនៅក្តារទីបួនពួកគេទាំងពីរភាគីដាក់ប្រាក់ចំនួន៦សែនបាតកំពុងតែលេ ង ស្រាប់តែត្រូវសមត្ថកិច្ចចុះមកក្របួចចាប់ឃាត់ខ្លួនតែម្តង ដោយប្រមូលយកប្រាក់នៅក្នុងកំ ប៉ុងលុយអស់រលីង រួចក៏ឃាត់ខ្លួនពួកគេបញ្ជូនទៅស្នងការដ្ឋាននគរបាលខេត្ត ។
ទាក់ទិនទៅនឹងបញ្ហាលេងអុកទាំងនេះ ខណៈអ្នកសារព័ត៌មានកម្ពុជាថ្មី ចូលទៅសុំយកព័ត៌មាននៅក្នុងស្នងការដ្ឋាននគរបាលខេត្តប៉ៃលិន នៅវេលាម៉ោង៤រសៀល តែត្រូវសមត្ថកិច្ចមិនអនុញ្ញាតិឱ្យចូលជួប ដើម្បីសួរនាំនោះទេ ដោយប្រាប់ឱ្យត្រឡប់ទៅផ្ទះវិញសិន ចាំផ្តល់ព័ត៌មាននៅពេលក្រោយ លុះក្រោយមកប្រហែលជាវេលាម៉ោង៥ល្ងាចថ្ងៃដដែល បន្ទាប់ពីផាកពិន័យទឹកប្រាក់មួយចំនួនធំរួច ក៏ដោះលែងឱ្យត្រឡ ប់ទៅផ្ទះរៀងៗខ្លួន ។ ក្រោយមកភ្នាក់ងារសារព័ត៌មានសួរនាំតាមទូរស័ព្ទទៅមន្ត្រីសមត្ថកិច្ចស្នងការមួយចំនួនបានប្រាប់ថា ពួកគេគ្រាន់តែលេងអុកដាក់ប្រាក់ធម្មតា ១ពាន់ទៅ២ពាន់បាត(ប្រាក់ថៃ) ប៉ុណ្ណោះ លុះចាប់ឃាត់ខ្លួនយកទៅអប់រំរួច ក៏ដោះលែងឱ្យទៅផ្ទះវិញរៀងៗខ្លួន ៕