កំពង់ធំៈ នាសម័យបច្ចុប្បន្ននារីភេទ ត្រូវបានរាជរដ្ឋាភិបាល ក៏ដូចជាពិភពលោក ជម្រុញឲ្យមានការគាំទ្រ គ្រប់សកម្មភាពរបស់ស្ត្រី ឲ្យសិទ្ធិសេរីភាពគ្រប់បែបយ៉ាង ស្មើរនឹងបុរស មិនតែប៉ុណ្ណោះស្ត្រីត្រូវបានអប់រំ ផ្សព្វផ្សាយតាមរយះកម្មវិធីសិក្ខាសាលា អប់រំនៅតាមមូលដ្ឋាន និងអង្គប្រជុំនានា ដើម្បីឲ្យមនុស្សប្រុសនឹង មនុស្សស្រីបានយល់ពីតំលៃនិងសមត្ថភាពដែលមានគុណភាពស្មើរគ្នា ក្នុងគោលបំណង លុបបំបាត់ចោល រាល់ទម្រង់នៃការរើសរអើងប្រឆាំងទៅលើនារីភេទ និងលើកកម្ពស់សីលធម៌សង្គម តម្លៃស្ត្រី គ្រួសារខ្មែរ ។
អង្គសិក្ខាសាលាស្តីពីវគ្គបណ្តុះបណ្តាលបញ្ជ្រាបយេនឌ័រ ត្រូវបានចូលរួមពីសំណាក់ លោកជំទាវ សម មុន្នីកា រដ្ឋលេខាធិការ និងជាប្រធានគណៈកម្មការយេនឌ័រ ក្រសួងទេសចរណ៍លោក ប្រាក់ សារ៉ាត អភិបាលរងខេត្តកំពង់ធំ និងលោក សេង អាន ប្រធានមន្ទីរទេសចរណ៍ខេត្តកំពង់ធំ ដោយមានការអញ្ជើញចូលរួម ពីប្រតិបត្តិករណ៍ទេសចរណ៍ដែលបំរើការងារ នៅតាមហាងខារ៉ាអូខេ ភោជនីយដ្ឋាន ផ្ទះសំណាក់ សណ្ឋាគារនិងស្ថាប័នពាក់ព័ន្ឋផងដែរ នៅសណ្ឋាគារ ពន្លឺថ្មី ក្រុងស្ទឹងសែន ខេត្តកំពង់ធំ ព្រឹកថ្ងៃទី ១០ និង១១ ខែមិថុនា ឆ្នាំ ២០១៤នេះ ។
លោកស្រីឈូក ឈូវង្ស អគ្គនាយករងរដ្ឋបាល និងហិរញ្ញវត្ថុក្រសួងទេសចរណ៍ បានអានអនុសាសន៍១៦ចំនុច របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានជម្រុញឲ្យមានការផ្សព្វផ្សាយឲ្យបានទូលំទូលាយ ដល់ថ្នាក់ក្រុង ខណ្ទ ឃុំ សង្កាត់ ដើម្បីស្វែងយល់អំពីឧបស័គ្គក្នុងការបំពេញតួនាទីនិងត្រូវស្វែងរកសេវាផ្លូវច្បាប់ ជូនដល់ស្ត្រីរងគ្រោះដោយអំពើហឹង្សា និងលុបំបាត់ នូវ ការរើសរអើងប្រឆាំងនិងនារីភេទ ។
លោក សេង អាន ប្រធានមន្ទីរទេសចរណ៍ ខេត្តកំពង់ធំ បានឲ្យដឹងថា បញ្ហាយេឌ័រនៅក្នុងវិស័យទេសចរណ៍ បានឆ្លុះបញ្ចាំងឲ្យឃើញថាស្ត្រី បានដើរតួរនាទីសំខាន់ នៅក្នុងការរួមចំនែក អភិវឌ្ឍន៍សេដ្ឋកិច្ចសង្គម គ្រួសារព្រមទាំងលើកកម្ពស់តួនាទី និងសមត្ថភាពរបស់ខ្លួនផងដែរ ដោយឡែក សេវាកម្មទេសចរណ៍ សម្រាប់បម្រើ ជូនភ្ញៀវទេសចរណ៍ ក្នុងខេត្តកំពង់ធំមានសណ្ឋាគារ ០៧កន្លែង ផ្ទះសំណាក់២៩កន្លែង ផ្ទះស្នាក់២កន្លែង ភោជនីយដ្ឋាន៩២កន្លែង សេវាកំសាន្តមាន ៣០កន្លែង រមណីយដ្ឋានប្រវត្តិសាស្ត្រមាន២កន្លែង រមណីដ្ឋានធម្មជាតិ ១កន្លែង រមណីយដ្ឋានកែច្នៃ ៣កន្លែង និងមគ្គុទ្ទេសទេសចរន៍សហគមន៍ ៧នាក់។
លោក ប្រាក់ សារ៉ាត អភិបាលរងខេត្តកំពង់ធំ បានសម្តែងនូវកិច្ចស្វាគមន៍ចំពោះលោកជំទាវ សម មុន្នីកា បានអញ្ជើញជាអធិបតី និងបាននាំយកនូវចំណេះដឹងមកចែករំលែក ដល់ស្ត្រីដែលបំរើការងារក្នុងខេត្តកំពង់ធំ និងជាបញ្ហាដែលមានសារៈសំខាន់ណាស់ សម្រាប់ស្ត្រី ក្នុងការយល់ដឹងពី តួនាទីនិងភារៈកិច្ច ព្រមទាំងការពារខ្លួន និងការទប់ស្កាត់ទៅលើស្ត្រី ដូចជាអំពើហឹង្សាទៅលើស្ត្រី អំពើហឹង្សាទៅលើការសេពសទ្ទវៈ និងអំពើហឹង្សាការជួញដូរមនុស្ស។
លោក ជំទាវ សម មុន្នីកា បានមានប្រសាសន៍ថា អ្នកប្រព្រឹត្តនូវបទល្មើសទៅលើស្ត្រី ដែលមានបានចែង នៅក្នុងច្បាប់ព្រហ្មទណ្ទ ក្នុងវគ្គសិក្ខាសាលានេះ គឺក្នុងគោលបំណង ចង់ឲ្យស្ត្រីគ្រប់រូប យល់ដឹងពីច្បាប់ ក្នុងកិច្ចការពារសិទ្ធិដែលទទួលបាន និងចូលរួមលុបបំបាត់ការរើសរអើងទៅលើនារីភេទ និងទប់ស្កាត់ការ ប្រើអំពើហឹង្សាទៅស្ត្រី មិនតែប៉ុណ្ណោះស្ត្រីត្រូវបានលើតំម្កើងជាឆ្អឹងខ្នងសង្គម និងលើកកម្ពស់សីលធម៌ សង្គម ។ ដោយ ប៊ុន រដ្ឋា
