កំពង់ឆ្នាំង៖ ក្រុមគ្រួសារប្រជាពលរដ្ឋក្រីក្រចំនួន៣គ្រួសារ រស់នៅក្នុងភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង នៅព្រឹកថ្ងៃទី០៩ ខែមិថុនា ឆ្នាំ២០១៤នេះបានទទួលអំណោយមានអង្ករនិងថវិកា ពីសប្បុរសជននៅក្រុងភ្នំពេញនិងក្នុងខេត្តកំពង់ឆ្នាំង តាមរយះភ្នាក់ងារកាសែតកម្ពុជាថ្មី
ដែលមានការចូលរួមចែកអំណោយនេះដោយផ្ទាល់ ពីអាជ្ញាធរភូមិ សង្កាត់កំពង់ឆ្នាំង ក្រុងកំពង់ឆ្នាំងផងដែរ។
លោកស្រី កែវ សុផាត ចៅសង្កាត់កំពង់ឆ្នាំងបានអោយដឹងថា៖ ប្រជាពលរដ្ឋក្រីក្រចំនួន៣គ្រួសារដែលខ្វះខាតជាងគេនៅក្នុងភូមិស្រែព្រីង សង្កាត់កំពង់ឆ្នាំង នឹងដែលត្រូវចែកអំណោយនៅពេលនេះចំនួនមាន៣គ្រួសារគឺ៖ ១ឈ្មោះយន្ត យ៉ាន់ អាយុ៦៥ឆ្នាំ ជាស្ត្រីមេម៉ាយ និងមានជម្ងឺគរនិយាយមិនរួច មានកូនម្នាក់ជាស្រីមេម៉ាយនិង មានកូនប្រុសតូចអាយុ៧ឆ្នាំម្នាក់ គ្មានផ្ទះសម្បែងឡើយ។សព្វថ្ងៃសុំផ្ទះគេស្នាក់នៅ ពីមុនមកជាង២០ឆ្នាំ សុំវត្តអារញ្ញស្នាក់នៅ ក្រោយពីគណៈកម្មការវត្តមិនអោយស្នាក់នៅពួកគាត់បានមកសុំផ្ទះគេជ្រកកោនស្នាក់នៅបណ្តោះអាសន្នពួកគាត់សំណូមពរដល់អាជ្ញាធរខេត្តមេត្តាជួយរកដីធ្លីអោយពួកគាត់បានរស់នៅផង។ មុខរបរពួកគាត់ដើរស៊ីឈ្នួលបោកខោអាវអោយគេ និងធ្វើជាកម្មករសំណង់បានព្រឹកខ្វះល្ងាច។
គ្រួសារទី២ ប្តីឈ្មោះ ទេព ឃុន អាយុ៨១ឆ្នាំ ធ្លាប់បួសជាព្រះសង្ឃចំនួន១៥ព្រះវស្សា និងបានសឹកមកវិញព្រោះមានជម្ងឺប្រចាំកាយ ប្រពន្ធឈ្មោះ ប៊ុន ថាត អាយុ៨០ឆ្នាំ មានមុខរបរដើរបោកខោអាវអោយគេ អត់មានផ្ទះសម្បែងទេ បានអ្នកក្នុងស្រុកសង់កូនខ្ទមទំហំ២ម៉ែត្រ៤ជ្រុងអោយស្នាក់នៅក្នុងភូមិរបស់គេ ពួកគាត់មានកូនប្រុសម្នាក់ដែរតែគ្រួសារគេក៏មានជីវភាពខ្វះខាតខ្លាំងណាស់ដែរ គ្មានអ្នកណាជួយអ្នកណាបានឡើយ។
គ្រួសារទី៣ ប្តីឈ្មោះ ឯក ជឿន អាយុ៥៨ឆ្នាំ មុខរបរចងស្ទូច ដាក់មង ប្រពន្ធឈ្មោះ
ពេជ ណា អាយុ៥៥ឆ្នាំ មុខរបរស៊ីឈ្នួលមើលគោ និងដើរបោកខោអាវអោយគេ មានកូនស្រី៤នាក់នៅក្នុងបន្ទុកបានចូលរៀនសាលាបាន២នាក់ ពេលទំនេរកូនៗបានជួយដើររើសខ្យង ក្តាម លក់ទិញអង្ករហូបមានជីវភាពខ្វះខាតមុខក្រោយ គាត់មានផ្ទះខ្ទមស្លឹកតូច១ខ្នង សង់នៅលើប្រឡាយទឹកសាធារណៈ។
លោកស្រីចៅសង្កាត់អោយដឹងទៀតថា៖ អំណោយដែលត្រូវចែកជូនពេលនេះ ក្នុង១គ្រួសារៗ មានអំណោយសប្បុរសជននៅភ្នំពេញមានអង្ករ២៥គីឡូ ទឹកស្អីវ១ឡូត៍ និងថវិកា៥ម៉ឺនរៀល អំណោយរបស់លោកស្រី ចៅសង្កាត់កំពង់ឆ្នាំង ក្នុង១គ្រួសារៗ ២ម៉ឺនរៀល អំណោយរបស់លោកស្រី អ៊ុន ណាវី ប្រធានអង្គការ រោងនៃសេចក្តីសង្ឃឹមនោក្នុងខេត្តកំពង់ឆ្នាំង ក្នុង១គ្រួសារៗ ចំនួន៤ម៉ឺនរៀល សារុបក្នុង១ក្រួសារៗទទួលបានថវិកាចំនួន១១ម៉ឺនរៀល។ ដោយឡែកលោកស្រី អ៊ុន ណាវី ក៏បានឧបត្ថម្ភថវិកាដល់លោកមេភូមិនិងចាស់ៗក្នុងភូមិចំនួន៤នាក់ផ្សេងទៀត ដែលបានជូនដំណើរនៅពេលចែកអំណោយពេលនេះ ក្នុងម្នាក់ៗទទួលបាន១ម៉ឺនរៀលផងដែរ។
ការចែកអំណោយជូនជនក្រីក្រក្នុងពេលនេះ គឺជាកាយវិការមនុស្សធម៌ដ៏ល្អមួយរបស់
សប្បុរសជនខ្មែរយើង ដែលបានចូលរួមចំណែកជាមួយប្រមុខរាជរដ្ឋាភិបាល និងកាកបាទក្រហមកម្ពុជា ដើម្បីកាត់បន្ថយភាពក្រីក្រ និងជួយដោះស្រាយការខ្វះខាតជូនប្រជាពលរដ្ឋចំពោះមុខ បានហូបចុកមួយរយះពេលដែរទោះបីអំណោយនេះតិចតួចក៏ដោយ។
លោកស្រី កែវ សុផាត ចៅសង្កាត់កំពង់ឆ្នាំង និងប្រជាពលរដ្ឋទាំង៣គ្រួសារសូមថ្លែងអំណរគុណយ៉ាងជ្រាលជ្រៅដល់សប្បុរសទាំងអស់ សូមលោកបានទទួលសេចក្តីសុខគ្រប់ប្រការ រកស៊ីមានបានគ្រប់ៗក្រុមគ្រួសារ និងទទួលបានជោគជ័យគ្រប់ភារកិច្ច៕