រាជធានីភ្នំពេញៈ ប្រភេទរថយន្តម៉ាកប្រណីតនិងមានតម្លៃថ្លៃកំពុងបង្ហាញនូវវត្តមានជាបន្តបន្ទាប់នៅរយៈពេលប៉ុន្មានឆ្នាំចុងក្រោយនេះនៅកម្ពុជា ដែលមានដូចជា BMW, Audi, Mercedes, Porsche, Land Over និង Jaguar ជាដើម។ ពេលនេះ រថយន្តម៉ាក Rolls Royce ក៏បានចូលមកទីផ្សារកម្ពុជាជាផ្លូវការក្នុងពិធីចុះហត្ថលេខាកាលពីថ្ងៃចន្ទ ដែលនេះវាបានបង្ហាញថា កម្ពុជាមានស្ថិរភាព និងមានទំនុកចិត្តសម្រាប់ប្រទេសមួយនេះ។
នៅក្នុងពិធីចុះហត្ថលេខាលោក Paul Harris នាយកប្រចាំតំបន់អាស៊ីរបស់ក្រុមហ៊ុន Rolls Royce Motor Cars បានឲ្យដឹងថា កម្ពុជាមានសេដ្ឋកិច្ចដែលមានកំណើនទៅមុខជាលំដាប់ហើយចំនួនកើនឡើង នៃសហគ្រិនដែលជោគជ័យក្នុងមុខជំនួញជាសញ្ញាវិជ្ជមានដល់ទីផ្សារ រថយន្តប្រណីត និងទំនើបបែបនេះ។ ក្រុមហ៊ុនមើលឃើញដូចនេះទើបនាំចូលរថយន្ត Rolls Royce ចូលមកទីផ្សារកម្ពុជា ហើយសង្ឃឹមថានឹងទទួលបានជោគជ័យ។
បើតាមប្រភពព័ត៌មាននានាបានឲ្យដឹងថា រថយន្តទំនើបម៉ាក Rolls Royce ថ្លៃទាបបំផុតចាប់ផ្តើមពី ៤៥ ម៉ឺនដុល្លារដល់ខ្ទង់លានគឺអាចមានតម្លៃដល់ ១ លាន ឬ ២ លានដុល្លារ ឬ ច្រើនជាងនេះ អាស្រ័យលើការចង់បានរបស់អតិថិជន។ នៅក្នុងការចូលរួមជាអធិបតីក្នុងពិធីនោះ ឯឧ. ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្ម ដែលមានវត្តមានក្នុងពិធីចុះហត្ថលេខាដែរនោះឲ្យដឹងថា រថយន្តប្រភេទទំនើបម៉ាក Rolls Royce មានជាង ១០ គ្រឿងហើយដែលកំពុងធ្វើចរាចរណ៍នៅកម្ពុជា។
តាមលោក Paul កាលពីឆ្នាំមុនក្រុមហ៊ុន Roll Royce លក់រថយន្តបានចំនួន ៣៦៣០ គ្រឿងនៅទីផ្សារទូទាំងពិភពលោក។ សហរដ្ឋអាមេរិកគឺជាទីផ្សារធំ ទី១ ដែលបន្ទាប់មកមាន ប្រទេសចិន ឥណ្ឌា និង ជប៉ុន។ ដោយឡែក ក្រុមហ៊ុន Rolls Royce Motor Cars Phnom Penh របស់ក្រុមហ៊ុន HGB Group Co., Ltd នឹងជាអ្នកចែកចាយផ្លូវការរថយន្ត Rolls Royce បែបប្រណីត និងមានតម្លៃខ្ពស់នេះនៅកម្ពុជា៕
