ក្រុងប៉ោយប៉ែត៖ គម្រោងផ្លូវរថភ្លើងទិសដៅពីក្រុងសេរីសោភ័ណ មកកាន់ក្រុងប៉ោយប៉ែតត្រូវបានចប់គាំងស្តូក បន្ទាប់ពីបានសាង់សង់បានប្រវែង៤០គីឡូម៉ែត្ររួចរាល់ ប៉ុន្តែនៅសល់ប្រវែង៦គីឡូម៉ែត្រទៀតអាជ្ញាធរផ្លូវដែកបានផ្អាកការសាង់សង់បណ្តុះអាសន្ន ព្រោះតែមានក្រុមហ៊ុន
ឯកជន ឈ្មួញទូចចរិត បានសាងសង់តូប និងអាគារផ្សេងជួលឲ្យគេលក់ដូរ និងមិនព្រមចាលចេញពីគម្រោងដីផ្លូវរថភ្លើង បើទោះបីជារដ្ឋាភិបាលបានចេញសំណង និងដោះដូរលំនៅដ្ឋាន ជូនពួកគាត់ ផ្តល់ដីនៅក្រោយវត្តផ្សារកណ្តាលហើយក៏ដោយ ទើបធ្វើឲ្យការអភិវឌ្ឍន៍ផ្លូវដែកត្រូវបានផ្អាកទាំងស្រុង ។
ប្រភពមួយចំនួនបានបង្ហើបឲ្យដឹងថា មានឈ្មួញមួយចំនួនហ៊ានធ្វើព្យុះ ធ្វើភ្លៀង យកដីចំណីផ្លូវជាតិ ផ្លូវរថភ្លើង សង់តូប ជួលអ្នកលក់ដូរក្នុងតម្លៃ៣០០ដុល្លា ទៅ៥០០ដុល្លាក្នុងមួយខែ ក្រោមលេស ដោយសារតែគេមិនទាន់ធ្វើផ្លូវរថភ្លើង។ផ្ទុយទៅវិញសកម្មភាពនេះ គឺជាការបង្កភាពរាំងស្ទះយ៉ាងធ្ងន់ធ្ងរ ដល់ការសាងសង់ផ្លូវដែក របស់អាជ្ញាធរនិងរដ្ឋាភិបាល ។
ប្រភពដដែលបានបន្តថា ការសាងសង់តូបយ៉ាងអាណាធិបតេយ្យលើដីផ្លូវរថភ្លើងមួយកន្លែង មុខស្នាក់ការសាខាគយក្រុងប៉ោយប៉ែត ជារឿងខុសច្បាប់យ៉ាងធ្ងន់ធ្ងរ បែរជាគ្មានការទប់ស្កាត់ទៅវិញ។ គេនៅចាំបានថា អំឡុងនៅឆ្នាំ២០១៣ ទីតាំងមួយនេះធ្លាប់ត្រូវបានអាជ្ញាធរក្រុង មានសមត្ថកិច្ច បានចុះទប់ស្កាត់យ៉ាងក្តៅគគុក មិនធ្វើឲ្យសាងសង់អាគារទៀតផង ក្រោយពីស្ងាត់មួយរយះខ្លី ស្រាប់តែម្ចាស់ទីតាំងប្រៃសនីយ៍ បានសង់អាគារជាច្រើនល្វែង សំយ៉ាប និងរៀបឥដ្ឋការ៉ូឡា រំលោភពេញទំហឹងលើដីចំណីផ្លូវជាតិ និងដីផ្លូវរថភ្លើង ធ្វើជាកម្មសិទ្ធផ្តាច់មុខរបស់ខ្លួន និងបានជួលអោយអ្នកលក់ដូរក្នុងតម្លៃយ៉ាងខ្ពស់។ ព្រមទាំងបានបណ្តេញអ្នកលក់ដូរកំប៉ិកកំប៉ុក រកព្រឹកខ្វះល្ងាច ខ្ចាត់ខ្ចាយចេញពីទីនោះ ដោយប្រើឥរិយាបទបែបនេះ ត្រូវបានមជ្ឈដ្ឋានទូទៅមានចម្ងល់ថា ( តើម្ចាស់ទីតាំងប្រៃសនីយ៍ឈ្មោះ ផួន ផេង ជា អាជ្ញាធរ រឺជាពលរដ្ឋ? បានជាហ៊ានដើរដេញគេឯងតាមអំពើរចិត្ត ដោយចោទប្រកាន់ថាគេលក់ដូរបាំងកន្លែងរបស់ខ្លួន)។
មូលហេតុឈ្មួញ ផួន ផេង ហ៊ានប្រើអំណាចក្រអើតក្រទម របស់ខ្លួនបណ្តេញគេឯង។ត្រូវបានប្រភពទុកចិត្តមួយ ឲ្យដឹងថា ការធ្វើបែបនេះគឺឈ្មួញ ផូន ផេង បានឃុបឃិត និងបានចំណាយថវិការយ៉ាងច្រើន សូកប៉ាន់អភិបាលរងក្រុងប៉ោយប៉ែតម្នាក់ ឈ្មោះទូច មុន្នី និងឈ្មោះ ខាត់ ធា នាយករងរដ្ឋបាលសាលាក្រុងប៉ោយប៉ែត ឲ្យកាងអំពើរល្មើសច្បាប់របស់ខ្លួនពេញទំហឹង។ ទើបមកដល់ថ្ងៃទី០៩ ខែមិថុនា ឆ្នាំ២០១៤នេះ គេបានឃើញសំណងរបស់ឈ្មួញ ផួន ផេង រីកស្គុះស្គាយពេញលើដីរថភ្លើង ហើយបានយកចិញ្ចើមផ្លូវជាតិលេខ៥ យកមករៀបឥដ្ឋការ៉ូឡា រួចជួលអោយអ្នករត់តាក់ស៊ី ធ្វើជាន្លែងចតរថយន្ត ហើយ១គ្រឿង តម្លៃ៥ពាន់រៀល ទោះគេដឹងថាទីនោះជាដីរបស់រដ្ឋក៏ដោយ។
នៅព្រឹកថ្ងៃដដែលនេះ ព្រោះតែប្រយោជន៍ខ្លួន ផួន ផេង បានទៅជេប្រមាថ ស្តីបន្ទោស បណ្តេញ ស្ត្រីអ្នកលក់បាយតាម រទេះរុញម្នាក់ ឲ្យចេញពីលើដីចិញ្ចើមផ្លូវ ដោយចោទប្រកាន់ថា ស្ត្រីរូបនោះលក់ដូរបាំងកន្លែងគេរកស៊ី ដូច្នោះគេមិនអាចអោយលក់បន្តទៀតបានទេ ។
ស្ត្រីអ្នកលក់បាយរទេះរុញ បានប្រាប់ឲ្យអ្នកសារព័ត៌មានដឹងថា ការលក់ដូររបស់គាត់គឺគាត់លក់តាំងពីឆ្នាំ២០០០មកម្ល៉េះ គ្រាន់តែជាមុខរបចិញ្ចឹមក្រពះមួយថ្ងៃទៅមួយថ្ងៃតែប៉ុណ្ណោះ ហើយគាត់ក៏មិនបាន លក់ដូររំលោភលើដីបុគ្គលណាម្នាក់ផងដែរ គឺគាត់លក់ដូរតែលើចិញ្ចើមផ្លូវជាតិលេខ៥ ដែលជាដីរបស់រដ្ឋ បើរដ្ឋត្រូវការពេលណា ឬពេលរកកន្លែងថ្មីបាន គាត់និងចាកចេញពីទីនោះ។
ស្ត្រីរូបនេះបានបន្តថា នៅពេលដែលឈ្មួញ ផួន ផេង ចេញមុខមកអាងវ៉ាង ថាដីចំណីផ្លូវជាតិ និងដីរថភ្លើងជាដីរបស់ខ្លួនគឺជារឿងមិនត្រឹមត្រូវទេ ព្រោះការលក់ដូររបស់គាត់គឺគាត់លក់លើដីរដ្ឋ អ្នកដែលមានសិទ្ធដេញមិនអោយគាត់ឈប់លក់ គឺមានតែអាជ្ញាធរក្រុងប៉ុណ្ណោះដែលមានសិទ្ធ ចំពោះលោក ផួន ផេង គ្មានសិទ្ធបណ្តេញរូបគាត់ទេ។ ចំពោះការលក់ដូរនេះលោកស្ត្រីក៏បានស្នើរសុំការអនុញ្ញាតិ ពីលោក ង៉ោ ម៉េងជ្រួនអភិបាលក្រុងប៉ោយប៉ែតរួចរាល់ផងដែរ។
ចំពោះការចោទប្រកាន់ថា លោកទូច មុន្នី អភិបាលរងក្រុងប៉ោយប៉ែត និងលោក ខាត់ ធា នាយករងរដ្ឋបាលសាលាក្រុងប៉ោយបែត កាងឲ្យឈ្មួញខាងលើសាងសង់សំណងអាណាធិបតេយ្យលើដីរដ្ឋ យើងខ្ញុំមិនទាន់បានសុំការបំភ្លឺអ្នកទាំងពីរបាននៅឡើយទេ ព្រោះទូរស័ព្ទមិនចូល។ បញ្ហានេះយើងខ្ញុំនិងធ្វើការស៊ើបអង្កេតបន្ត ដើម្បីយកមកចុះផ្សាយនៅលេខក្រោយៗទៀត៕