កំពង់ឆ្នាំង៖ឯកឧត្តមបណ្ឌិត អ៊ុក រ៉ាប៊ុន រដ្ឋមន្ត្រីក្រសួងកសិកម្មរុក្ខាប្រម៉ាញ់ និងនេសាទ និងជាប្រធានក្រុមការងារថ្នាក់ជាតិចុះជួយមូលដ្ឋានខេត្តកំពង់ឆ្នាំង និងមានឯកឧត្តម លោកជំទាវ មន្ត្រីរាជការចូលរួមជាច្រើននាក់ទៀតបានអញ្ជើញចូលរួមក្នុងពិធីប្រកាសចូលកាន់តំណែងរបស់
ក្រុមប្រឹក្សាខេត្តកំពង់ឆ្នាំងអាណត្តិទី២ ដែលបានធ្វើឡើងនៅព្រឹកថ្ងៃទី០៩ ខែ មិថុនាឆ្នាំ២០១៤នេះនៅក្នុងសាលប្រជុំសាលាខេត្តកំពង់ឆ្នាំង ។
ឯកឧត្តម ឈួរ ច័ន្ទឌឿន អភិបាលនៃគណៈអភិបាលខេត្តកំពង់ឆ្នាំង បានរាយការណ៍ជូននូវលទ្ធផលការងារសំខាន់ៗដែលបានសម្រេចបាន ក្នុងអាណត្តិទី១ របស់ក្រុមប្រឹក្សាខេត្តរយៈពេល ៥ឆ្នាំកន្លងមកយ៉ាងក្បោះក្បាយ ។
លោក ជា ម៉ុង អគ្គនាយរងនៃអគ្គនាយកដ្ឋានរដ្ឋបាលមូលដ្ឋានក្រសួងមហាផ្ទៃបានអាននូវព្រះរាជក្រឹត្យទទួលស្គាល់សមាជិកក្រុមប្រឹក្សាខេត្តកំពង់ឆ្នាំងអាណត្តិទី២ ដែលមាន១៥អាសនៈមកពីគណបក្សប្រជាជនកម្ពុជា ១១រូប និង គណបក្សសង្គ្រោះជាតិ ៤រូប ក្នុងនោះលោកជំទាវដោកសុទ្ធាមកពីគណបក្សប្រជាជនកម្ពុជា ជាប្រធានក្រុម ប្រឹក្សាខេត្តកំពង់ឆ្នាំង។
បន្ទាប់មកឯកឧត្តមបណ្ឌិត អ៊ុក រ៉ាប៊ុន បានប្រគល់នូវព្រះរាជក្រឹត្យ ទទួលស្គាល់សមាជិកក្រុមប្រឹក្សាខេត្តកំពង់ឆ្នាំងចំនួន១៥រូបមានបេក្ខជនជានារីចំនួន២រូបគឺលោកជំទាវដោកសុទ្ធាជាប្រធានក្រុមប្រឹក្សា និងលោកជំទាវ តុង ណារី ជាសមាជីកក្រុមប្រឹក្សាខេត្តកំពង់ឆ្នាំងអាណត្តិទី២នេះ។
លោកជំទាវ ដោក សុទ្ធា ប្រធានក្រុមប្រឹក្សាខេត្តកំពង់ឆ្នាំងអាណត្តិទី២បានមានចំណាប់អារម្មណ៍ប្តេជ្ញាចិត្ត រួចមក ឯកឧត្តមបណ្ឌិត អ៊ុក រ៉ាប៊ុន បានមានប្រសាសន៍សំណេះសំណាលដោយបានកោតសរសើរនិង វាយតម្លៃខ្ពស់ ចំពោះឯកឧត្តម លោកជំទាវសមាជិក សមាជិកា ក្រុមប្រឹក្សាខេត្តដែលត្រូវបានតំណាងប្រជាពលរដ្ឋ ជាសមាជិកក្រុមប្រឹក្សាឃុំ សង្កាត់បានផ្តល់នូវសេចក្តីទុកចិត្ត បោះឆ្នោតជ្រើសរើស ជាសមាជិកក្រុមប្រឹក្សាខេត្តអាណត្តិទី២ ដើម្បីបន្តដឹកនាំខេត្ត និង បន្តអភិវឌ្ឍន៍អោយមានការរីកចម្រើនលើគ្រប់វិស័យបន្ថែមទៀត។
ឯកឧត្តមបណ្ឌិត បានបន្តទៀតថា ទោះបីឯកឧត្តមលោកជំទាវ ដែលមានសមាសភាពមកពីគណបក្សនយោបាយផ្សេងគ្នាក៏ពិតមែន តែគោលការណ៍ច្បាប់ក្រុមប្រឹក្សាគឺជាតំណាងអោយប្រជាពលរដ្ឋ ក្នុងការបម្រើនូវផលប្រយោជន៍ និង សេចក្តីតម្រូវការរបស់ប្រជាពលរដ្ឋមិនប្រកាន់និន្នាការគណបក្សនយោបាយ ឡើយ។ ក្នុងនោះដែរឯកឧត្តមបណ្ឌិតក៏បានឯកភាពទៅសមិទ្ធផលស្នាដៃដែលខេត្តកំពង់ឆ្នាំងសម្រេចបានកន្លងមក សំខាន់ការពង្រឹងសន្តិភាព ស្ថិរភាពនយោបាយសង្គម ជាហេតុធ្វើអោយកម្ពុជា មានការគាំទ្រពីសំណាក់មជ្ឈដ្ឋានជាតិ អន្តរជាតិ និងដៃគូអភិវឌ្ឍន៍ ក៏ដូចអ្នកវិនិយោគនានា ដែលជាមូលដ្ឋានធ្វើអោយជីវភាពរបស់ប្រជាជនមានភាពប្រសើរឡើង។
ឯកឧត្តមបណ្ឌិតក៏បានធ្វើការវាយតម្លៃនៃការបោះឆ្នោតជ្រើសរើសក្រុមប្រឹក្សា រាជធានីខេត្ត ក្រុង ស្រុក ខណ្ឌ អាណត្តិ ទី២ កន្លងមកនេះមានលក្ខណៈសេរី ត្រឹម ត្រូវ យុត្តិធម៌គ្មានអំពើហិង្សា ហើយលទ្ធ ផលនៃការបោះឆ្នោត ត្រូវបានទទួលស្គាល់ពីគណបក្សនយោបាយដែលបានចូលរួមផងដែរ។ ឯកឧត្តមក៏បានលើកផងដែរ ពីការកំណែទម្រង់តាមបែប វិមជ្ឈការ និង វិសហមជ្ឈការ នៅរដ្ឋបាលថ្នាក់ក្រោមជាតិនៃកិច្ចដំណើរការរៀបចំ ដឹកនាំ គ្រប់គ្រងរដ្ឋបាល តាមបែប ប្រជាធិបតេយ្យក្នុងគោលដៅលើកកម្ពស់អភិបាលកិច្ចល្អនៅថ្នាក់មូលដ្ឋាន ដើម្បីពង្រឹងការទទួលខុសត្រូវ និង គណនេយ្យភាពរបស់មន្ត្រីបុគ្គលិក ខ្សែបណ្តោយរបស់ក្រសួងស្ថាប័ន រដ្ឋបាលថ្នាក់ក្រោមជាតិ ហើយការបណ្តុះបណ្តាលនិង កសាងសមត្ថភាពមន្ត្រីគ្រប់ថ្នាក់ អំពីការកំណែទម្រង់វិមជ្ឈការ វិសហមជ្ឈការក៏ត្រូវបានរៀបចំទាំងនៅថ្នាក់ជាតិ និង ថ្នាក់ក្រោមជាតិ។
ឯកឧត្តមបណ្ឌិតអ៊ុករ៉ាប៊ុន ក៏លើកឡើងនូវទិសដៅសំខាន់ៗសម្រាប់ការអនុវត្តរបស់ក្រុមប្រឹក្សា អាណត្តិទី២ក្នុងការបន្តដឹកនាំរដ្ឋបាលរបស់ខ្លួនអោយ មានការអភិវឌ្ឍ លើគ្រប់វិស័យបន្ថែមទៀត ព្រមទាំងបានគូសបញ្ជាក់ថា ក្នុងនាមតំណាងរាជរដ្ឋាភិបាល ក្រសួង ស្ថាប័ន របស់ រាជរដ្ឋាភិបាល ក្រុមប្រឹក្សា និងគណៈអភិបាលខេត្ត ត្រូវបន្ត យកចិត្តទុកដាក់អនុវត្តនូវកិច្ចការ ស្របច្បាប់ និងលិខិតបទដ្ឋាននានាទាំងការផ្តល់សេវាសាធារណ ការបង្ការទប់ស្កាត់ និង បង្ក្រាបបទល្មើសនានាទៀតផង។
ឯកឧត្តមបណ្ឌិតក៏បានលើកឡើង ពីភារកិច្ចរបស់ក្រុមការងារថ្នាក់ ជាតិ គឺដើម្បីរួមគ្នាធ្វើការដោះស្រាយបញ្ហាប្រឈមនៅមូលដ្ឋានព្រមទាំង ជំរុញការផ្សព្វផ្សាយអោយបានទូលាយដល់ ប្រជាពលរដ្ឋមន្ត្រីរាជការគ្រប់លំដាប់ថ្នាក់ ពីកម្មវិធីនយោបាយយុទ្ធសាស្ត្រចតុកោណដំណាក់កាលទី៣ផែនការ យុទ្ធសាស្ត្រអភិវឌ្ឍន៍ជាតិ គោលនយោបាយឃុំ ភូមិមានសុវត្ថិភាព នយោបាយតាមវិស័យដោយផ្សារភ្ជាប់ជាមួយសភាព ការណ៍នៅមូលដ្ឋានឲ្យបានជាប់ជាប្រចាំ។
ឯកឧត្តមបណ្ឌិតអ៊ុករ៉ាប៊ុនក៏បានលើកឡើងទៀតថា ដើម្បីសម្រេចបានភារកិច្ចទាំងនេះ ត្រូវខិតខំពង្រឹងស្មារតី សាមគ្គីឯកភាពផ្ទៃក្នុងអោយបានល្អក្នុងក្រុមប្រឹក្សា គណៈអភិបាល មន្ត្រីរាជការ និង កងកម្លាំង សមត្ថកិច្ចដើម្បីលើកកម្ពស់ការទទួលខុសត្រូវ ភាពម្ចាស់ការ ក្នុងការបំពេញតួនាទីភារកិច្ចសំដៅអភិវឌ្ឍន៍មូលដ្ឋាន ក្នុង ការឆ្លើយតបតម្រូវការរបស់ប្រជាពលរដ្ឋក្នុងដែនសមត្ថកិច្ចរបស់ខ្លួន ព្រមទាំងផ្តាំផ្ញើ ដល់ឯកឧត្តម លោកជំទាវ ជា សមាជិកក្រុមប្រឹក្សាខេត្តអាណត្តិទី២ត្រូវយកចិត្ដទុកដាក់ បំពេញភារកិច្ចដើម្បីការពារផលប្រយោជន៍បងប្អូនប្រជាពល រដ្ឋនិងសម្រេចបាននូវសមិទ្ធផលថ្មីៗ ក្នុងរយៈពេល៥ឆ្នាំខាងមុខនេះ៕