ភ្នំពេញ៖ អាជ្ញាធររាជធានីភ្នំពេញ បានព្រមាននឹងផាកពិន័យយ៉ាងតឹងរឹង ចំពោះពលរដ្ឋណាពុំព្រមស្តាប់ការណែនាំរបស់អាជ្ញាធរ នៅតែទុកដាក់សំរាមមិនបានត្រឹមត្រូវគ្មាន សណ្តាប់ធ្នាប់ចោលពាសវាលពាសកាល ដើម្បីលើកកម្ពស់ អនាម័យបរិស្ថានក្នុងរាជធានីភ្នំពេញ ឲ្យកាន់តែស្រស់ស្អាត។
ក្នុងពិធីប្រារព្វទិវាបរិស្ថានពិភពលោក និងធ្វើយុទ្ធនាការប្រមូលសំរាមក្នុងរាជធានីភ្នំពេញកាលពីព្រឹកមិញនេះ លោក ប៉ា សុជាតិវង្ស អភិបាលរាជធានីភ្នំពេញមានប្រសាសន៍ថា ចាប់ពីពេលនេះទៅអាជ្ញាធររាជធានីភ្នំពេញ នឹងបង្កើនវិធានការម៉ឺងម៉ាត់មិនអត់ឱនឲ្យឡើយ ផាក់ពិន័យឲ្យបានតឹងរឹងបំផុតចំពោះជនណានៅតែទុកដាក់សំរាមពុំបានត្រឹមត្រូវ ដែលធ្វើឲ្យប៉ៈពាល់ដល់អនាម័យ បរិស្ថាននៅតាមទីសាធារណៈ។
លោក អភិបាលបញ្ជាក់ថា៖ ការពង្រឹងយន្តការបែបនេះ គឺដើម្បីឆ្លើយតបឲ្យស្របទៅនឹងការប្តេជ្ញាចិត្តក្នុង ការប្រែក្លាយរាជធានីភ្នំពេញ ឲ្យកាន់តែស្រស់ស្អាត ពិសេសគ្មានសំរាមនៅរាយប៉ាយ សម្រាប់បង្អួតភ្ញៀវទេសចរណ៍ជាតិ អន្តរជាតិនឹងធានាដល់សុខភាពរស់នៅរបស់ប្រជាពលរដ្ឋផងដែរ។
ការរួមគ្នាធ្វើយុទ្ធនាការនេះឡើង ខណៈពេលដែលសព្វថ្ងៃនេះប្រជាពលរដ្ឋមួយចំនួននៅតែមិនទាន់យកចិត្តទុកដាក់ ក្នុងការទុកដាក់សំរាមឲ្យបានល្អនៅឡើយ ពិសេសការផ្តល់សេវាសំអាត ប្រមូល និងការដឹកជញ្ជូនសំរាមនៅក្នុងក្រុងពុំទាន់មានការរីកចំរើន ដោយធ្វើឲ្យសំរាមនៅតែមានរាយប៉ាយហោះហើរតាមទីសាធារណៈ។លោក ប៉ាសុជាតិវង្សបញ្ចាក់ថាដើម្បី
ឲ្យគោលដៅគ្មានសំរាមនៅក្នុងភូមិសាស្ត្ររាជធានីភ្នំពេញ ទទួលបានជោគជ័យក្រៅពីការផាកពិន័យនោះ អាជ្ញាធរដែនដីគ្រប់លំដាប់ថ្នាក់នឹងបន្តអប់រំដល់ប្រជាពលរដ្ឋឲ្យបានច្រើនបន្តទៀត ព្រោះសព្វថ្ងៃនេះ ពួកគាត់ជាអ្នកបង្កើតសំរាមដោយខ្លួនឯង។ ដូច្នេះត្រូវឲ្យបងប្អូនផ្លាស់ប្តូរឥរិយាបថនូវទំលាប់អាក្រក់ចោលពីការទុកដាក់សំរាមគ្មានសណ្តាប់ធ្នាក់ ងាកមកទុកសំរាមឲ្យបានត្រឹមត្រូវតាមពេលវេលានិងកន្លែងដែលបានកំណត់។
លោក ស៊ូ សាវុធ អនុរដ្ឋលេខាក្រសួងបរិស្ថានបានបញ្ជាក់ថា ការចូលរួមនឹងការយល់ដឹងរបស់ប្រជាពលរដ្ឋចមពោះបរិស្ថាននេះ ពិតជាប្រសិទ្ធិភាពបំផុតក្នុងការកែប្រែសំរាមនៅរាជធានីភ្នំពេញឲ្យកាន់តែមានស្ថានភាពល្អប្រសើរ។ លោកបន្តថា ការទុកដាក់សំរាមពុំបានត្រឹមត្រូវ គឺបាននាំមក នូវបញ្ហាប៉ៈពាល់ជាច្រើនដល់សុខភាពមនុស្ស សោភណ្ឌភាពទីក្រុង និងបណ្តាលឲ្យកកស្ទះចរន្តទឹកហូរនៅតាមប្រពន្ធ័លូជាដើមដោយត្រូវចាត់វិធានការនេះឲ្យបានម៉ឹងម៉ាតបំផុតទើបធានាបានការលិចលង់បានមួយផ្នែក។
លោក ជៀក អាង ប្រធានមន្ទីរបរិស្ថានរាជធានីភ្នំពេញបានបញ្ជាក់ថា យន្តការផាកពិន័យលើបញ្ហាសំរាមនេះ ត្រូវបានចាប់ផ្តើមអនុវត្តចាប់តាំងពីឆ្នាំ២០១០មកម្ល៉េះ ដោយកំណត់ថាបើជនណាទុកដាក់សំរាមពុំបានត្រឹមត្រូវ ឬដាក់រាយប៉ាយនៅតាមទីសាធារណៈខុសពីគោលដៅកំណត់នោះនឹងត្រូវ ផាកពិន័យចាប់ពី១ម៉ឺនរៀល រហូតដល់១០ម៉ឺនរៀល។
លោកបន្តទៀតថា ក្នុងយុទ្ធការនេះបើបងប្អូន បានយល់ពីបរិស្ថាន សង្ឃឹមថា នៅរាជធានីភ្នំពេញក៏ដូចនៅទូទាំងប្រទេស បញ្ហាសំរាមវេចខ្ចប់ល្អនិងទុកដាក់បានត្រឹមត្រូវ។ មួយវិញទៀតដើម្បីឲ្យយុទ្ធនាការនេះទទួលបានជោគជ័យអាជ្ញាធរក្រុងជំរុញការផ្សព្វផ្សាយថ្នាក់ខណ្ដ សង្កាត់ឲ្យរឹតបណ្តឹងចំពោះពលរដ្ឋក្នុងការទុកដាក់សំរាមនោះពិតជាសេដ្ឋកិច្ចមានការរីកចំរើន៕ ដោយ៖ សំរិត
