ភ្នំពេញ ៖ មានករណីគ្រោះថ្នាក់ចរណ៍រថយន្តបីគ្រឿងបុកបន្តគ្នា កាលពីវេលាម៉ោង ១១និង៣០នាទីយប់ ថ្ងៃទី ១២មិថុនា ២០១៤ នៅចំណុចក្បែររូបសំណាក សម្តេចតា ស្ថិតនៅក្នុងសង្កាត់ទន្លេបាសាក់ ខណ្ឌចំការមន ។ហេតុការណ៍នេះបានបណ្តាលឱ្យរថយន្តទាំងបីគ្រឿង រងការខូចខាត
ប៉ុន្តែអ្នកបើកបរពុំមានរងគ្រោះនោះទេ ។
យោងតាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញរថយន្ត កូរ៉ូឡា ពណ៌ស្ករ ពាក់ស្លាកលេខភ្នំពេញ 2W-7958 បានធ្វើដំណើរតាមផ្លូវព្រះសីហុ ក្នុងទិសដៅពីលិចមកកើត មកដល់ចំណុចកើតហេតុ ក៍បានទៅបុកពីក្រោយចំហៀងខាងឆ្វេងរថយន្តកាមរី ពណ៌ស្លែ ពាក់ស្លាកលេខកំពង់ធំ2A-0287 ស្របទិសគ្នា ពេលនោះរថយន្តកាមរីក៍បានវិលគូថទៅប៉ះនិងរថយន្តឡង់គ្រីស័រ៥៧០ មួយគ្រឿងទៀត ពាក់ស្លាកលេខភ្នំពេញ 2V-5252 ។
បន្ទាប់ពីបើកបុកគេហើយរថយន្តកូរ៉ូឡា បានបើករត់រហូតដល់មុខផ្ទះលេខ២០៤ ផ្លូវ២០៨ ក៏ត្រូវបានរថយន្តមួយគ្រឿងទៀតម៉ាក មីស៊ុយប៊ីស៊ី ពាក់ស្លាកលេខភ្នំពេញ 2X-0818 ពណ៌ទឹកប្រាក់បើកដេញតាមទាន់និងបាននាំតំណាងអ្នកបើករថយន្តកូរ៉ូឡាទៅដោះស្រាយជាមួយម្ចាស់រថយន្តពីរគ្រឿងទៀត ។
