ភ្នំពេញ ៖ បុរសម្នាក់បានរងរបួសធ្ងន់ហើយត្រូវបានបញ្ជូនទៅព្យាបាលនៅមន្ទីរពេទ្យឯកជន ដោយសារបុរសរូបនោះជិះម៉ូតូក្នុងស្ថានភាពស្រវឹង ហើយជ្រុលចង្កូតបុកក្បាលព្រួញពុះចែក ទ្រូងផ្លូវចំពេញទំហឹង ដែលហេតុការនេះបានកើតឡើងកាលពីវេលាម៉ោង៣និង១០នាទី រំលងអាធ្រាត្រ
ឈានចូលថ្ងៃទី១៣ខែមិថុនាឆ្នាំ២០១៤ ត្រង់ចំណុចហាងខារ៉ាអូខេ១៦៨ តាមបណ្ដោយផ្លូវជាតិលេខ២ ស្ថិតក្នុងសង្កាត់ចាក់អង្រែលើ ខណ្ឌមានជ័យ។
បើតាមសម្ដីបុរសម្នាក់ជាអ្នករត់ម៉ូតូឌុបបានឃើញហេតុការណ៍បានអោយដឹងថា គេឃើញបុរសម្នាក់ ជិះម៉ូតូគ្រឿងម៉ាកហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខ កំពង់ចាម 1C-0155 ក្នុង ស្ថានភាពស្រវឹង ធ្វើដំណើរតាមបណ្ដោយផ្លូវជាតិលេខ២ ទិសដៅពីជើងទៅត្បូងក្នុងល្បឿនលឿន ខណៈមកដល់ចំណុចកើតហេតុក៏ជ្រុលចង្កូតបុកក្បាលព្រួញពុះចែកទ្រូងផ្លូវចំពេញទំហឹង បណ្ដាល អោយដួលបោកផ្ទប់និងថ្នល់រងរបួសធ្ងន់។បន្ទាប់ពីកើតហេតុជនរងគ្រោះត្រូវបានរថយន្តសាមុយរបស់មន្ទីរពេទ្យឯកជនដឹកយកទៅសង្គ្រោះភ្លាមៗ ចំណែកម៉ូតូត្រូវបានសមត្ថកិច្ចយកមករក្សាទុកនៅប៉ុស្ដិ៍នគរបាលចាក់អង្រែលើ រងចាំបងប្អូន ជនរងគ្រោះមកទទួលយកវិញ៕
