គ្រូបង្វឹកក្រុមខ្លាអាហ្វ្រិកកាម៉េរូនលោក Volker Finke (វុលគើ ហ្វីនកេ) ជឿជាក់ថា ខ្សែប្រយុទ្ធ Samuel Eto'o (សាមូអេល អេតូ) អាចជួយឲ្យកាម៉េរូនយកឈ្នះលើក្រុមមិចស៊ីកូបានសម្រាប់ការប្រកួត World Cup ជុំដំបូងរបស់ខ្លួននៅយប់នេះ ។ ក្រុមទាំងពីរនឹងត្រូវជួបគ្នាក្នុងទីក្រុងណាតាល់ហើយលោក Finke បានអះអាងថា ប្រធានក្រុមរបស់លោកមានបទពិសោធន៍ដែលអាចជួយឲ្យកាម៉េរូនរកបានបីពិន្ទុសម្រាប់ការប្រកួតក្នុងពូល A ។
លោកនិយាយប្រាប់អ្នកសារព័ត៌មានថា “ខ្ញុំគិតថាអ្នកគ្រប់គ្នាប្រហែលជាស្គាល់ Eto'o និងសមត្ថភាពរបស់គាត់ហើយ” ។ “គាត់ជាប្រធានក្រុមរបស់យើង គាត់ពោរពេញដោយបទពិសោធន៍ជាច្រើនហើយយើងសង្ឃឹមថាគាត់អាចរកជ័យជម្នះឲ្យយើងបាន” ។ គួរបញ្ជាក់ថា Eto'o គឺជាកីឡាករដែលតែងតែស៊ុតបញ្ចូលទីឲ្យក្រុមជម្រើសជាតិកាម៉េរូនដោយរូបគេស៊ុតបាន៥៦គ្រាប់ក្នុងការចូលលេង១១៧ប្រកួត ៕
