បន្ទាយមានជ័យ៖កំឡុងពេល០៦ថ្ងៃនេះរាជរដ្ឋាភិបាលថៃបានចាប់បញ្ជូនពលករខ្មែរខុសច្បាប់មកវិញតាមច្រកព្រំដែលអន្តរជាតិប៉ោយប៉ែតចំនួន៤៦៦ឡានស្មើនិងចំនួនមនុស្ស២៨៩៤៦នាក់ការចាប់បញ្ជូននេះរាប់ចាប់តាំងពីថ្ងៃទី០៧ដល់ថ្ងៃទី១២ម្សិលមិញនេះ ។
យោងតាមរបាយការណ៏ដែលបានបង្ហាញមកថា៖នាថ្ងៃទី០៧ថៃបានបញ្ជូនពលករខ្មែរត្រឡប់មកវិញតាមច្រកព្រំដែនអន្តរជាតិប៉ោយប៉ែតចំនួន៥ឡានថ្ងៃទី០៨ថៃបញ្ជូនមកចំនួន០៩ឡានថ្ងៃទី០៩ថៃបញ្ជូនមកចំនួន៤៣ឡាននៅថ្ងៃទី១០ថៃបានបញ្ជូនមកចំនួន៨១ឡានថ្ងៃទី១១ថៃបានចាប់បញ្ជូនពលករមកវិញចំនួន១៣១ឡាននិងថ្ងៃទី១២ថៃបានបញ្ជូនពលករខ្មែរខុសច្បាប់មកវិញចំនួន១៩៧ឡានសរុបឡានទាំងអស់ដែលថៃបានបញ្ជូនមកត្រឹមថ្ងៃទី១២មានចំនួន៤៦៦ឡានស្មើនិង២៨៩៤៦នាក់ ។
ពាក់ពន្ធ័ការចាប់បញ្ជូនពលករខ្មែរដោយរដ្ឋាភិបាលថៃនេះត្រូវបានអង្គការសង្គមស៊ីវិលជាច្រើនបានចាប់អារម្មណ៏និងយកចិត្តទុកដាក់លើពលករខ្មែរដែលត្រូវបានថៃចាប់បញ្ជូនមកវិញនោះ ។ក្រុមអង្គការទាំងនោះបានសហការជាមួយមន្ត្រីអាជ្ញាធរមូលដ្ឋានយ៉ាងល្អប្រសើរដោយអង្គការខ្លះបានជួលរថយន្តជាច្រើនគ្រឿងសម្រាប់ដឹកនាំពលករដោយមិនយកកំរ៉ៃជួនពួកគាត់ទៅកាន់លំនៅដ្ឋានរៀងៗខ្លួន ជាមួយគ្នានេះដែរអង្គការខ្លះទៀតបានរាប់រងលើផ្នែកអាហារដើម្បីផ្គត់ផ្គង់ដល់ពលករទាំងនោះចំណែកមន្ត្រីអាជ្ញាធរក្រុងប៉ោយប៉ែតបានរាប់រងផ្នែកសុខាភិបាលនិងរៀបចំសណ្តាប់ធ្នាប់ជូនដល់ពលករទាំងនោះផងដែរ ។
បើទោះជាមានការយកចិត្តទុកដាក់គាំពារពីសំណាក់អាជ្ញាធរនិងអង្គការសង្គមស៊ីវិលមកលើក្រុមពលករខ្មែរដែលត្រូវបានរដ្ឋាភិបាលយោធាថៃចាប់បញ្ជូនមកវិញក៏ដោយក៏ចំណុចខ្វះខាតខ្លះៗនៅតែប្រឈមចំពោះពលករទាំងនោះផងដែរ រហូតមកទល់និងថ្ងៃសុក្រទី១៣ខែមិថុនាឆ្នាំ២០១៤នេះដោយមើលឃើញពីភាពលំបាកនិងខ្វះខាតចំពោះពលករទើបរាជរដ្ឋាភិបាលបានសម្រេចបញ្ចេញរថយន្តកងយោធាប្រមាណជា១២៣គ្រឿងដើម្បីដឹកពលករដែលត្រូវរាជរដ្ឋាភិបាលថៃបញ្ជូនមកវិញតាមច្រកទ្វារព្រំដែនអន្តរជាតិប៉ោយប៉ែតទៅកាន់លំនៅដ្ឋានវិញដោយមិនយកកំរ៉ៃ ។
ជាមួយគ្នានេះ លោក ជា សុផល តំណាងអង្គការទស្សនៈពិភពលោក(វើលវីហ្សិន)បានប្រាប់ឲ្យដឹងដែរថា៖នៅថ្ងៃទី១៣ខែមិថុនានេះអង្គរបស់លោកបានរៀបចំគំរោងជួលរថយន្តក្រុងចំនួន១០គ្រឿងសម្រាប់ដឹកពលករទៅកាន់លំនៅដ្ឋានប៉ុន្តែត្រូវបានមន្ត្រីសាលាខេត្តបន្ទាយមានជ័យឲ្យលោកបង្វិលថវិកានោះទៅជាការសាងបង្គន់សាធារណៈវិញលោកថា៖ថ្ងៃអង្គការរបស់លោកនឹងជួយបង្គន់ចំនួន២០កន្លែងសម្រាប់ពលករខ្មែរដែលត្រូវថៃបញ្ជូនមកវិញនោះស្រួលងាយដល់ពួកគាត់បន្ទោបង់និងប្រើប្រាស់តាមការគួរ ។
យ៉ាងណាក៏ដោយសកម្មភាពដឹកជញ្ជូនពលករខ្មែរពីសំណាក់កងយោធាថៃហាក់មិនបានថយចុះឡើយពោលគឺចំនួនរថយន្តនៅតែមានកំណើនកើនឡើងពីមួយថ្ងៃទៅមួយថ្ងៃដោយឥតឈប់ឈរ ចំណែកប្រភពមួយពីមន្ត្រីទំនាក់ទំនងព្រំដែនខ្មែរថៃបានឲ្យដឹងដែរថា៖ពលករខ្មែរដែលចូលទៅធើ្វការនៅក្នុងប្រទេសថៃដោយខុសច្បាប់នោះមានចំនួនអាចជាង៥សែននាក់ឯណោះបើដូច្នោះមែននោះពលករខ្មែរដែលនៅសេស់សល់ក្នុងទឹកដីថៃនឹងនៅមានចំនួនជិត៤៧១០៤៥នាក់ទៀតផងដែរ ។
