កំពង់ធំ: គម្រោងមូលនិធិឃុំ-សង្កាត់ ចំនួន៣គម្រោង ដែលបានដាក់ឲ្យដេញថ្លៃ កាលពីពេលកន្លងទៅថ្មីៗ នៅសាលាឃុំបឹង ស្រុកបារាយណ៍ ត្រូវបានគណៈកម្មការ រកឃេីញមានភាពមិនប្រក្រតីជាច្រើន ហើយបានធ្វើការប្រកាសឆាចោល បន្ទាប់
មកត្រូវដាក់ឲ្យដេញថ្លៃឡើងវិញ កាលពីព្រឹកថ្ងៃទី២២ ខែធ្នូ ឆ្នាំ២០១៧ នៅសាលាឃុំបល្ល័ង្ក ស្រុកបារាយណ៍ ខេត្តកំពង់ធំ ដោយមានរបៀបរៀបរយ និងតម្លៃធ្លាក់ចុះច្រើនហួសពីការស្មានផងដែរ។
នាឱកាសនោះដែរ លោកអួង សារឿន អភិបាលរងស្រុកបារាយណ៍ បានធ្វើការផ្តាំផ្ញើរដល់តំណាងក្រុមហ៊ុន ដែលទើបតែទទួលបានគម្រោងជាថ្មី តាមរយៈនៃការដេញថ្លៃដែលមានការប្រកួតប្រជែង ដោយសេរី និងយុត្តិធម៌ សូមឲ្យការសាងសង់ផ្លូវ ត្រូវតាមស្តង់ដារ លក្ខណៈបច្ចេកទេស និងមានគុណភាពខ្ពស់ក្នុងការប្រើប្រាស់បានយូរអង្វែងផងដែរ។
គម្រោងដែលបានដាក់ឲ្យដេញថ្លៃខាងលើនេះ ទឺ១ គឺគម្រោងរបស់ឃុំបល្ល័ង្ក ការសាងសង់ផ្លូវបេតុងអារមេ ប្រវែង២១០ម៉ែត្រ ទទឹង៤ម៉ែត្រ ក្នុងតម្លៃទឹកប្រាក់ប៉ាន់ស្មានជាង៩៣លានរៀល ត្រូវបានក្រុមហ៊ុន ជាម សៀង ទទួលយកក្នុងតម្លៃជាង៥៥លានរៀល។ និងទី២ គម្រោងរបស់ឃុំបឹង ការកែលម្អផ្លូវក្រាលគ្រួសក្រហម ប្រវែង១៣៥០ម៉ែត្រ ទទឹង៤,៥ម៉ែត្រ និងដាក់លូកាត់ផ្លូវចំនួន២កន្លែង ក្នុងតម្លៃទឹកប្រាក់ប៉ាន់ស្មានជាង៨០លានរៀល ត្រូវបានក្រុមហ៊ុន ស្រេង ប៊ុនឡេង ទទួលយកក្នុងតម្លៃជាង៤៩លានរៀល។ ដោយឡែកគម្រោងរបស់ឃុំបារាយណ៍ គ្មានសំណើរគ្រប់គ្រាន់ គណៈកម្មការទុកសម្រេចនៅពេលក្រោយ។
ដោយការដេញថ្លៃគម្រោងសាងសង់ផ្លូវ ទាំង២ខ្សែខាងលើ បានដំណើរការដោយមានរបៀបរៀបរយល្អ និងតម្លៃធ្លាក់ចុះច្រើនទៀតនោះ ដូច្នេះប្រធានគណៈកម្មាការម្ចាស់លទ្ធកម្មឃុំទាំង២ បានធ្វើការប្រកាសទទួលយកដោយរីករាយ ព្រមទាំងបានធ្វើការផ្តាំផ្ញើរដល់ម្ចាស់ក្រុមហ៊ុនអ្នកទទួលការទាំងអស់ ត្រូវអនុវត្តន៍ការងារសាងសង់ផ្លូវ ឲ្យមានគុណភាពល្អ និងត្រូវតាមស្តង់ដារ លក្ខណៈបច្ចេកទេស ប្រយោជន៍ដល់ការប្រើប្រាស់ របស់ប្រជាពលរដ្ឋផងដែរ។
សូមបញ្ជាក់ផងដែរថា គម្រោងដែលបានដាក់ឲ្យដេញថ្លៃខាងលើនេះ គឺធ្លាប់ដាក់ឲ្យដេញថ្លៃម្តងរួចមកហើយ កាលពីព្រឹកថ្ងៃទី២៧ ខែតុលា ឆ្នាំ២០១៧ នៅសាលាឃុំបឹង តែត្រូវគណៈកម្មការប្រកាសឆាចោល បន្ទាប់ពីរកឃេីញមានភាពមិនប្រក្រតីជាច្រើន ដែលសង្ស័យថាមានការឃុបឃិតគ្នាប្រព្រឹត្តអំពើពុករលួយទៀតផង ៕
