អួង វឹង 3:
ខេត្តកំពតធ្វើពិធីបិទការប្រកួតកីឡាពានរង្វាន់អបអរខួបលើកទី៣៩ទិវាជ័យជំនះ៧មករា ១៩៧៩៧មករា២០១៨
នៅរសៀលថ្ងៃអាទិត្យ០៦រោចខែបុស្ស ឆ្នាំរកា នព្វស័ក ព.ស២៥៦១ត្រូវនឹងថ្ងៃទី០៧ខែមករាឆ្នាំ២០១៨ នាទីលានមណ្ឌល កីឡាដ្ឋានខេត្តកំពត។
លោក ស៉ឹម វុទ្ធា អភិបាលរងខេត្ត តំណាង ឯកឧត្តម ជាវ តាយ អភិបាលនៃគណៈអភិបាលខេត្ត។ បានអញ្ជើញចូលរួម ជាអធិបតី បិទការប្រកួតកីឡាពានរង្វាន់អបអរសាទរខួបអនុស្សាវរីយ៍លើកទី៣៩នៃទិវាជ័យជំនះ០៧មករា ១៩៧៩ ០៧មករា ២០១៨។
លោក តាក ហាប់ ប្រធានមន្ទីរអប់រំយុវជននិងកីឡាខេត្ត បានបញ្ជាក់អោយដឹងថា៖ ពានរង្វាន់កីឡាពេលនេះមានកីឡា២ប្រភេទ គឺ៖ពានរង្វាន់កីឡាបាល់ទាត់ដែលមានក្រុមកីឡាករចូលរួមប្រកួតចំនួន១៩ក្រុមស្មើកីឡាករ៣៤២នាក់ និងកីឡាប៉េតង់មានក្រុមកីឡាករចូលរួមប្រកួតចំនួន១៧ក្រុមស្មើកីឡាករ៦៨នាក់។ ការប្រកួតនេះបានចាប់ផ្ដើមតាំងពីថ្ងៃទី២០ខែធ្នូឆ្នាំ២០១៧ និងត្រូវបានបិទបញ្ចប់ប្រកបដោយជោគជ័យនាពេលនេះ។ រីឯលទ្ធផលចំណាត់ថ្នាក់ផ្នែកបាល់ទាត់លេខ១៖បានទៅក្លឹបមន្ទីរ ការងារបណ្ដុះបណ្ដលនិងវីជ្ជាជីវៈខេត្តកំពតទទួលបានពាន១អមដោយប្រាក់១លាន៥សែនរៀល លេខ២៖ក្លឹបកំពង់កណ្ដាលទទួលបានប្រាក់១លានរៀល លេខ៣៖ក្លឹបស្នងការនគរបាលខេត្តទទួលបានប្រាក់៨០ម៉ឺនរៀលនិងលេខ៤៖ក្លឹបយុវជនស្រឡាញ់សន្តិភាពទទួលបានប្រាក់៦០ម៉ឺនរៀល។ ចំណែកកីឡាប៉េតង់លេខ១៖ ក្លឹបមន្ទីរអប់រំ”២”ទទួលបានពាន១អមដោយប្រាក់៨០ម៉ឺនរៀល លេខ២៖ក្លឹបមន្ទីរសម្ភពសុខសាន្តទទួលបានប្រាក់៦០ម៉ឺនរៀល លេខ៣៖ក្លឹបមន្ទីរអប់រំ”៣” ទទួលបានប្រាក់៤០ម៉ឺនរៀលនិងលេខ៤៖ ក្លឹបសុវណ្ណសាគររីករាយទទួលបានប្រាក់៣០ម៉ឺនរៀល។
មានមតិបិទការប្រកួតនេះលោកស៉ឹម វុទ្ធា ក្នុងនាមឯកឧត្តម ជាវ តាយអភិបាលខេត្តបានថ្លែងអំណរ
គុណកោតសរសើរចំពោះឯកឧត្តម ចាន់ចេស្ដា អនុរដ្ឋលេខាធិការក្រសួងកសិកម្មរុក្ខាប្រមាញ់និងនេសាទនិងជាអតីតៈអភិបាលខេត្តកំពត ដែលតែងតែបានយកចិត្តទុកដាក់ជំរុញលើវិស័យកីឡាក្នុងខេត្តកំពតកន្លងមក ។ ពិសេសការផ្ដួចផ្ដើមអោយមានពានរង្វាន់ដើម្បីអបអរសាទរថ្ងៃជ័យជំនះ៧មករាជាប្រវត្តិសាស្ត្រនាពេលនេះ។
លោកស៉ឹម វុទ្ធា ក៏បានកោតសរសើរនិងបានវាយតម្លៃខ្ពស់ផងដែរ ចំពោះកិច្ចខិតខំរបស់បណ្ដាផ្នែកពាក់ព័ន្ធ រួមនឹងអាជ្ញាធរគ្រប់ថ្នាក់ក្នុងខេត្ត ដែលបានបញ្ជូនក្រុមកីឡាមកចូលរួម ប្រកួតក្នុងព្រឹត្តិការណ៍ដ៏មានអត្ថន័យនិងសារៈសំខាន់នាពេលនេះដែរ។ ព្រោះថា៖វិស័យអប់រំកាយនិងកីឡាត្រូវបានរាជរដ្ឋាភិបាលដែលមានសម្ដេចតេជោ ហ៊ុន សែនជាប្រមុខដឹកនាំ គឺតែងបានយកចិត្តទុកដាក់ជំរុញលើកទឹកចិត្តបំផុសចលនាប្រជាពលរដ្ឋលេងកីឡាគ្រប់រូបភាពពីថ្នាក់មូលដ្ឋាន រហូតដល់ថ្នាក់ជាតិដើម្បីលើកម្ពស់សុខមាលភាពផ្លូវកាយនិងផ្លូវចិត្ត។
លោកស៉ឹម វុទ្ធាក៏បានចាត់ទុកព្រឹត្តិការណ៍នៃការប្រកួតកីឡានាពេលនេះ ពិតជាមានតម្លៃសម្រាប់ទាំងអស់គ្នា ដើម្បីជាបទពិសោធន៍ ដឹកនាំគ្រប់គ្រង បច្ចេកទេស និងវិទ្យាសាស្ត្រកីឡាដែលឈានទៅរកភាពជោគជ័យសម្រាប់កីឡាករនិងអង្គភាពនាពេលអនាគត។
សូមបញ្ជាក់ថាក្នុងឱកាសនោះ ថ្នាក់ដឹកនាំនិងមន្ទីរក៏បានជួយឧបត្ថម្ភថវិកាសម្រាប់បម្រើការប្រកួតនេះ ។ រួមមានឯកឧត្តមចាន់ ចេស្ដាបានផ្ដល់ថវិកាចំនួន៤លានរៀល ឯកឧត្តមជាវ តាយចំនួន៣លានរៀលលោកម៉ៅ ច័ន្ទមធុរិទ្ធស្នងការនគរបាលខេត្តកំពត១លានរៀល និងមន្ទីរអប់រំចំនួន៣លាន៣៥ម៉ឺនរៀលរួមនិងសប្បុរសជនមួយចំនួនទៀតផងដែរ។