កំពតៈ លោកស៉ឹម វុទ្ធាអភិបាលរងនៃគណៈអភិបាលខេត្ត បានថ្លែងនៅក្នុងឱកាសដែលលោកបានអញ្ជើញចូលរួមបើកសន្និបាតបូកសរុបនិងវាយតម្លៃការងារអប់រំ យុវជននិងកីឡាខេត្តកំពតដំណាច់ឆ្នាំសិក្សា២០១៦-២០១៧ និងទិសដៅការងារបន្តឆ្នាំសិក្សា២០១៧-២០១៨។ ដែលមន្ទីរអប់រំយុវជននិងកីឡាខេត្តកំពត បានធ្វើឡើងកាលពីព្រឹកថ្ងៃព្រហស្បតិ៍ ៩កើត ខែមាឃឆ្នាំរ កានព្វស័ក ព.ស២៥៦១ ត្រូវថ្ងៃទី២៥ខែមករា ឆ្នាំ២០១៨។
លោក ស៉ឹម វុទ្ធាបានបន្តលើកឡើងទៀតថា វិស័យអប់រំតែងបានដើរតួនាទីយ៉ាងសំខាន់ ក្នុងការកសាង ធនធានមនុស្ស សម្រាប់ការអភិវឌ្ឍសង្គមជាតិនិងកាត់បន្ថយភាពក្រីក្រ។ លោកអភិបាលរងខេត្ត ក៏បានវាយតម្លៃខ្ពស់ និងកោតសរសើរចំពោះថ្នាក់ដឹកនាំ និងសហការី នៃមន្ទីរអប់រំយុវជននិងកីឡាខេត្តកំពតទាំងអស់ រួមទាំងអាជ្ញាធរដែនដីគ្រប់លំដាប់ថ្នាក់ ស្ថាប័ន អង្គភាព ពាក់ព័ន្ធ សហគមន៍ សប្បុរសជន មាតាបិតាសិស្ស ដៃគូអភិវឌ្ឍជាតិ អន្តរជាតិ ដែលបានខិតខំយកចិត្តទុកដាក់រួមចំណែកគាំទ្រគ្រប់បែបយ៉ាងក្នុងភារកិច្ចអប់រំសម្រាប់ទាំងអស់គ្នា។
ផ្ដើមចេញសកម្មភាពទាំងអស់នេះ បានធ្វើអោយវិស័យអប់រំយុវជននិងកីឡាខេត្តកំពតទទួលបានសមិទ្ធិផលជោគជ័យថ្មីៗស្របតាមទិសដៅឆ្នាំសិក្សា២០១៦-២០១៧កន្លងទៅ។ និងបានធ្វើអោយមានការប្រែប្រួលទាំងបរិមាណនិងគុណភាព ឆ្លើយតបបានតាមផែនការយុទ្ធសាស្ត្រវិស័យអប់រំឆ្នាំ២០១៤-២០១៨។
លោកស៉ឹម វុទ្ធាក៏បានផ្ដាំផ្ញើដល់មន្ត្រីអប់រំទាំងអស់ត្រូវពង្រឹងវិន័យក្រមសីលធម៌វិជ្ជាជីវៈរបស់ខ្លួនពិសេសសម្រាប់គ្រូបង្រៀន ដែលជាអ្នកផ្ទេរឬផ្ដល់ចំណេះដឹងដល់
សិស្ស។ និងក៏បានផ្ដាំផ្ញើដល់អង្គសន្និបាតទាំងមូល ក្នុងរយៈពេល ពីរថ្ងៃនេះ ត្រូវរួមគ្នារកអោយឃើញនូវមេរៀនពិសោធន៍ថ្មីៗ បញ្ហាប្រឈមនានា ដំណោះស្រាយបែបវិជ្ជមាន វិធីសាស្ត្រល្អៗ ជាគន្លឹះបន្ថែមទៀតនិងប្រមូលផ្ដុំចំណុចសេសសល់ដើម្បីកែលម្អរកសាងនិងអភិវឌ្ឍន៍ វិស័យអប់រំក្នុងខេត្តអោយបានកាន់តែទទួលលទ្ធផលប្រែប្រួលទាំងបរិមាណនិងគុណភាពល្អប្រសើរជាងឆ្នាំកន្លងទៅថែមទៀត។
