បន្ទាយមានជ័យ ៖ ចាប់តាំងពីពេលដែលលោក គោ ស៊ុំសារឿត ត្រូវបានតែងតាំង ឲ្យធ្វើជាអភិបាលខេត្តបន្ទាយមានជ័យក្នុងស្ថានភាពដ៏ចម្រូងចម្រាសគេសង្កេតឃើញ ភាពអសកម្មក្នុងជួរមន្ត្រីរដ្ឋបាល ក៏ដូចជាសមត្ថកិច្ចប្រដាប់អាវុធហាក់ដូចជាមិនសូវចុះសម្រុងជាមួយគ្នា នោះទេ។ ពេលខ្លះអាជ្ញាធរថ្នាក់ស្រុក ក្រុង ចង់អនុវត្តន៍តាមសេចក្តីណែនាំរបស់លោក គោ ស៊ុំសារឿត ក្នុងការលុបបំបាត់បនល្បែងស៊ីសងខុសច្បាប់ ដែលកំពុងធ្វើសកម្មភាពយ៉ាងអនាធិបតេយ្យលើទឹកដីក្រុងប៉ោយប៉ែត ក៏មិនអាចធ្វើបាន ក៏ព្រោះតែបនល្បែងទាំងនោះ ជាមុខរបររបស់សមត្ថកិច្ចប្រដាប់អាវុធ ជ្រកក្រោមស្លាកកងរាជអាវុធហត្ថ ធ្វើឲ្យអាជ្ញាធរថ្នាក់ក្រោមជួប
ផលលំបាក មិនដឹងជាត្រូវអនុវត្តន៍បែបណាដើម្បីឲ្យសេចក្តីណែនាំរបស់លោក គោ ស៊ុំសារឿត មានប្រសិទ្ធភាពឬទទួលបានជោគជ័យនោះទេ។ សេចក្តីរាយការណ៍ពីខេត្តបន្ទាយមានជ័យបានឲ្យដឹងថា បញ្ហាបនល្បែងស៊ីសង នៅក្នុងខេត្តជាប់ព្រំដែនមួយនេះ បានកើតឡើងពេញបន្ទុកគួរឲ្យភ័យខ្លាចបំផុត មិនដែលមានសមត្ថកិច្ចឬអាជ្ញាធរចុះទៅបង្ក្រាបនោះទេ
បើទោះបីជាក្នុងកិច្ចប្រជុំលោក គោ ស៊ុំសារឿត បានដាក់វិធានការតឹងតែងឲ្យមន្ត្រីគ្រប់ជាន់ថ្នាក់បោសសម្អាតបន ល្បែងស៊ីសងខុសច្បាប់ និងលុបបំបាត់ភាពអសកម្មក៏ដោយ ក៏គ្មានប្រសិទ្ធភាពដដែល នាំឲ្យប្រជាពលរដ្ឋរិះគន់ថា ការដឹកនាំរបស់លោក គោ ស៊ុំសារឿត អន់ជាងអភិបាលខេត្តជំនាន់មុនៗឆ្ងាយណាស់។ គេមិនច្បាស់ទេថា តើបញ្ហា
សមត្ថភាពរបស់លោក គោ ស៊ុំសារឿត ដែលមិនអាចដោះស្រាយបញ្ហាប្រចាំថ្ងៃ ឬធ្វើឲ្យបទបញ្ជារបស់ខ្លួនមានប្រសិទ្ធភាពនោះ កើតឡើងដោយសារតែការឡើងកាន់តំណែងរបស់លោក គោ ស៊ុំសារឿត គ្មានការគាំទ្រពីថ្នាក់អភិបាលរង ឬមន្ត្រីសមត្ថកិច្ចថ្នាក់ក្រោម ឬក៏យ៉ាងណានោះទេ ព្រោះថាការដឹកនាំមួយដែលខ្វះភាពស៊ីសង្វាក់គ្នា មិនអាចធ្វើអ្វីៗឲ្យទទួលបាន
ជោគជ័យទេ។ ដោយឡែក នៅលើទឹកដីក្រុងប៉ោយប៉ែត គេសង្កេតឃើញបនល្បែងស៊ីសងកើតឡើងស្អេកស្កះដូចផ្សិត ភាគច្រើនមានសមត្ថកិច្ចកងរាជអាវុធហត្ថជាអ្នកកាងឬធ្វើជាខ្នងបង្អែក ឲ្យមេបនល្បែងស៊ីសងទាំងនោះមិនដែលមាននរណាហ៊ានអើពើចុះទៅបង្ក្រាប នោះទេ ព្រោះតែមេបនល្បែងស៊ីសងខុសច្បាប់មានលុយបិទភ្នែកបិទត្រចៀក សមត្ថកិច្ច
និងមន្ត្រីពាក់ព័ន្ធ ហើយបើរំពឹងថាលោក គោ ស៊ុំសារឿត ចុះទៅជ្រែងជើងបង្ក្រាបបនល្បែងស៊ីសងទាំងនោះដោយផ្ទាល់ ក៏មិនអាចធ្វើទៅបាន។ រឿងធំបំផុតនោះបនល្បែងស៊ីសងយ៉ាងច្រើននៅទូទាំងក្រុងប៉ោយប៉ែត សុទ្ធសឹងតែមានភាគហ៊ុនរបស់សមត្ថកិច្ចកងរាជអាវុធហត្ថហើយបនល្បែង មួយណាក៏ដោយមានឈ្មោះ ម៉ែន ភិរម្យ ជាមេបញ្ជាការរងអាវុធហត្ថ
ខេត្តបន្ទាយមានជ័យ ជាអ្នកចេញមុខកាងជានិច្ច ដូច្នេះមន្ត្រីថ្នាក់ក្រោមមិនហ៊ានក្អកជាមួយម្ចាស់ទីតាំងបនល្បែង ខុសច្បាប់ទាំងនោះទេ។ ដោយឡែក លោក មែ៉ន ភិរម្យ ក៏ត្រូវគេដឹងថាមានភាគហ៊ុនជាមួយមេបនល្បែងអនឡាញដ៏មានឥទ្ធិពល ម្នាក់ឈ្មោះ ធី ចំណែកលោក សានវិជ្ជា សារ៉ាវុធ ជាអនុប្រធានស្នាក់ការកាំកុងត្រូលក្រុងប៉ោយប៉ែត ក៏មានភាគហ៊ុនរកស៊ី
បង្កើតទីតាំងបនល្បែងស៊ីសងតាមប្រព័ន្ធអនឡាញ ខុសច្បាប់ជាមួយឈ្មោះ ធី នេះផងដែរ។ បញ្ហាបនល្បែងស៊ីសងដ៏អនាធិបតេយ្យនៅពាសពេញក្រុងប៉ោយប៉ែត កើតឡើងដោយសារតែសមត្ថកិច្ចកងរាជអាវុធហត្ថជាអ្នកកាងយ៉ាងពេញទំហឹង តាមរយៈការរកស៊ីចូលហ៊ុន ចែកផលចំណេញជាមួយមេបនល្បែងស៊ីសងទាំងនោះ ប៉ុន្តែគេមិនដែលឃើញ
លោក ឱ បូរិន្ទ ជាមេបញ្ជាការកងរាជអាវុធហត្ថខេត្តបន្ទាយមានជ័យ ចាត់វិធានការណែនាំឬពិន័យទៅលើលោក ម៉ែន ភិរម្យ ដែលកំពុងបង្កឲ្យមានភាពអសកម្មនិងធ្វើជាខ្នងបង្អែកឲ្យម្ចាស់បន ល្បែងស៊ីសងខុសច្បាប់យ៉ាងអនាធិបតេយ្យទាល់តែសោះ។ និយាយ ពីបញ្ហាបនល្បែងស៊ីសងខុសច្បាប់នៅលើទឹកដីក្រុងប៉ោយប៉ែត មានច្រើនគគ្រឹកគគ្រេង ដែល
សូម្បីតែលោក តែម ប៉ូឡា ជាមេបញ្ជាការរងកងរាជអាវុធហត្ថក្រុងប៉ោយប៉ែត ក៏បានបង្កើតទីតាំងបនល្បែងស៊ីសងតាមប្រព័ន្ធអនឡាញដ៏ធំមួយកន្លែង ស្ថិតនៅភូមិក្បាលស្ពាន១ ក្រុងប៉ោយប៉ែត ចំណែកបនល្បែងរបស់ឈ្មោះ ធី មានទីតាំងក្នុងភូមិក្បាលស្ពាន២ បើកអាជីវកម្មឡើងដុះស្លែទៅហើយគ្មាននរណាអើពើបង្ក្រាបទេ។ ដោយសារតែបញ្ហានេះហើយ ទើបបទបញ្ជាឬសេចក្តីណែនាំរបស់លោក គោ ស៊ុំសារឿត ឲ្យមន្ត្រីនិងអាជ្ញាធរគ្រប់ជាន់ថ្នាក់លុបបំបាត់ភាពអសកម្មពង្រឹង
គោលនយោបាយភូមិ ឃុំ មានសុវត្ថិភាព លុបបំបាត់បញ្ហាបនល្បែងស៊ីសង អំពើពុករលួយធ្វើមិនបានសម្រេចជោគជ័យណាមួយការដឹកនាំរបស់ គោ ស៊ុំសារឿត មានភាពចម្រូងចម្រាសខ្វះការបង្រួបបង្រួមផ្ទៃក្នុងធ្វើឲ្យមន្ត្រី ថ្នាក់ក្រោមមិនសូវ
ខ្វាយខ្វល់អនុវត្តន៍បទបញ្ជារបស់លោក គោ ស៊ុំសារឿត គឺមន្ត្រីខ្លះស្តាប់បទបញ្ជារបស់អភិបាលខេត្តតែក្នុងអង្គប្រជុំ ហើយពេលចេញមកក្រៅបន្ទប់ប្រជុំក៏ភ្លេចទៅវិញអស់ ទុកឲ្យភាពអសកម្មនិងបញ្ហាបនល្បែងស៊ីសងខុសច្បាប់បន្តកើតឡើងយ៉ាង អនាធិបតេយ្យពេញបន្ទុក។ គេកំពុងតាមដានយ៉ាង យកចិត្តទុកដាក់ថាតើការដឹកនាំរបស់លោក គោ ស៊ុំសារឿត អាច
ដំណើរការបានយូរប៉ុនណាទៀត ព្រោះបទបញ្ជាឬសេចក្តីណែនាំជាច្រើនរបស់លោក គោ ស៊ុំសារឿត មិនត្រូវបានអាជ្ញាធរនិងមន្ត្រីថ្នាក់ក្រោមយកចិត្តទុកដាក់អនុវត្តន៍ ឲ្យមានប្រសិទ្ធភាពនោះទេ ធ្វើឲ្យពលរដ្ឋខ្លះយល់ឃើញថា ប្រសិនបើទឹកមាត់របស់លោកគោ ស៊ុំសារឿត មិនប្រៃ តើត្រូវដោះស្រាយអ្វីបានខ្លះជូនពលរដ្ឋ ដូចជាករណីអ្នកមានជម្លោះដីធ្លី នាំគ្នាទៅតវ៉ាទាមទារសុំកិច្ចអន្តរាគមន៍ពី គោ ស៊ុំសារឿត ប៉ុន្មានលើករួចមកហើយ មិនឃើញមានដំណោះស្រាយអ្វីទាំងអស់។
ខេត្តបន្ទាយមានជ័យ ត្រូវបានគេចាត់ទុកជាតំបន់ភូមិសាស្ត្រដ៏ស្មុគស្មាញមួយដូចដែល មន្ត្រី មួយចំនួនបានលើកឡើងថា អភិបាលខេត្តគួរជ្រើសតាំងក្នុងជួរអភិបាលរងឬមន្ត្រីដែលស្គាល់ការងារ ស្គាល់ភូមិសាស្ត្រ ហើយការតែងតាំងលោក គោ ស៊ុំសារឿត ឲ្យឡើងធ្វើជាអភិបាលខេត្តបន្ទាយមានជ័យ ធ្វើឲ្យមន្ត្រីជាច្រើនមិនសូវសប្បាយចិត្តនោះទេ៕ 
